India A Nepal T20 series / ଟିମ୍ ଇଣ୍ଡିଆର ନୂଆ ମିଶନ୍, ଡିସେମ୍ବରରେ ନେପାଳ ବିପକ୍ଷରେ ହେବ ବଡ଼ T20 ଲଢ଼େଇ

ଭାରତର ଷ୍ଟାର ପ୍ଲେୟାରଙ୍କ ସହ ଏବେ ନେପାଳର ହେବ ବଡ଼ ଲଢ଼େଇ । ନେପାଳ ପାଇଁ ଆସିଛି ଏକ ବଡ଼ ସୁଯୋଗ । ଆସନ୍ତା ଡିସେମ୍ବର ମାସରେ ନେପାଳ ଗସ୍ତ କରିବ ଭାରତ 'A' ଟିମ୍‌ । ଏହି ସିରିଜ୍ କେବଳ ତିନୋଟି ମ୍ୟାଚ୍ ନୁହେଁ, ବରଂ ନେପାଳ କ୍ରିକେଟ ପାଇଁ ଏକ ଐତିହାସିକ ଅବସର ।

ଚଳିତ ବର୍ଷ ଡିସେମ୍ବରରେ ଭାରତୀୟ ଦଳ ନେପାଳ ଗସ୍ତ କରିବ । ଶୁକ୍ରବାର ନେପାଳ କ୍ରିକେଟ ଆସୋସିଏସନ (CAN) ଏକ ବିବୃତ୍ତି ଜାରି କରି କହିଛି ଯେ ଭାରତ 'A' ଦଳ ଡିସେମ୍ବରରେ ତିନି ମ୍ୟାଚ୍ ବିଶିଷ୍ଟ T-20 ସିରିଜ ପାଇଁ ନେପାଳ ଗସ୍ତ କରିବ । CAN ଆଗାମୀ ସିରିଜର କାର୍ଯ୍ୟସୂଚୀ ମଧ୍ୟ ପ୍ରକାଶ କରିଛି, ଯାହା ଡିସେମ୍ବର ୯ ରୁ ୧୩ ତାରିଖ ମଧ୍ୟରେ ଖେଳାଯିବ ।

ଅଧିକ ପଢ଼ନ୍ତୁ: ବ୍ୟାଟ୍‌ରେ ଫେଲ୍, କିନ୍ତୁ କୋର୍ଟରେ ବଡ଼ ବିଜୟ ! ଅଭିଷେକ ଶର୍ମାଙ୍କୁ ମିଳିଲା ନ୍ୟାୟ

ନେପାଳ କ୍ରିକେଟ ଆସୋସିଏସନ (CAN) ସଭାପତି ଚତୁର ବାହାଦୁର ଚାନ୍ଦ, CAN ସଚିବ ପାରସ ଖାଡକା ଏବଂ BCCI ସଚିବ ଦେବଜିତ ସାଇକିଆଙ୍କ ମଧ୍ୟରେ ଏକ ବୈଠକ ପରେ ଦ୍ୱିପାକ୍ଷିକ ସିରିଜ ବିଷୟରେ ନିଷ୍ପତ୍ତି ନିଆଯାଇଛି । ଏହି ଦ୍ୱିପାକ୍ଷିକ ସିରିଜ୍‌ର ସମସ୍ତ ମ୍ୟାଚ୍ କୀର୍ତ୍ତିପୁରର ତ୍ରିଭୁବନ ୟୁନିଭର୍ସିଟି ସ୍ଥିତ ଟିୟୁ ଇଣ୍ଟରନ୍ୟାସନାଲ କ୍ରିକେଟ ଗ୍ରାଉଣ୍ଡରେ ଖେଳାଯିବ ।

ଡିସେମ୍ବର ୯ - ପ୍ରଥମ ଟି-୨୦
ଡିସେମ୍ବର ୧୧ - ଦ୍ୱିତୀୟ ଟି-୨୦
ଡିସେମ୍ବର ୧୩ - ତୃତୀୟ ଟି-୨୦

ନେପାଳ ପାଇଁ ଏହି ସିରିଜ୍ ବହୁତ ବଡ଼ ସୁଯୋଗ । କାରଣ ଭାରତ ‘A’ ଦଳରେ IPLର ଅନେକ ଚର୍ଚ୍ଚିତ ଖେଳାଳି ଓ ଭାରତୀୟ ସିନିୟର ଟିମ୍‌ର ଅନୁଭବୀ ଖେଳାଳିମାନେ ସାମିଲ ହୋଇପାରନ୍ତି । ଏହା ନେପାଳର ଯୁବ ଖେଳାଳିଙ୍କୁ ଭାରତୀୟ କ୍ରିକେଟର ମାନଦଣ୍ଡ ପରୀକ୍ଷା କରିବାର ଅବସର ଦେବ ।

ଗତ କିଛି ବର୍ଷ ଧରି ନେପାଳ କ୍ରିକେଟ ଦ୍ରୁତ ଗତିରେ ଆଗକୁ ବଢ଼ିଛି । ଦଳ ଲଗାତାର ଦୁଇଟି ଟି-୨୦ ବିଶ୍ୱକପ୍ ପାଇଁ ଯୋଗ୍ୟତା ହାସଲ କରି ନିଜର କ୍ଷମତା ଦେଖାଇଛି । ୨୦୨୪ ଟି-୨୦ ବିଶ୍ୱକପ୍‌ରେ ନେପାଳ ଗୋଟିଏ ବି ମ୍ୟାଚ୍‌ ଜିତିପାରିନଥିଲେ ମଧ୍ୟ ୨୦୨୬ ବିଶ୍ୱକପ୍‌ରେ ଦଳ ଅଧିକ ଶକ୍ତିଶାଳୀ ରୂପ ଦେଖାଇଛି । ସ୍କଟଲ୍ୟାଣ୍ଡ ବିପକ୍ଷରେ ଚମତ୍କାର ବିଜୟ ହାସଲ କରିବା ସହ ଇଂଲଣ୍ଡକୁ ମଧ୍ୟ ହରାଇବାର ନିକଟରେ ପହଞ୍ଚିଥିଲା । ଶେଷରେ ମାତ୍ର ୪ ରନ୍‌ରେ ପରାଜୟର ସ୍ବାଦ ଚାଖିଥିଲା ।

ଏବେ ଭାରତ ‘ଏ’ ବିପକ୍ଷରେ ଖେଳି ନେପାଳ ପ୍ରମାଣ କରିବାକୁ ଚାହିଁବ ଯେ ସେମାନେ କେବଳ ଉଦୟମାନ ଟିମ୍ ନୁହେଁ, ବରଂ ବିଶ୍ୱ କ୍ରିକେଟରେ ଏକ ନୂଆ ଶକ୍ତି ହେବାକୁ ପ୍ରସ୍ତୁତ ।