Next Virat Kohli / ଟିମ୍‌ ଇଣ୍ଡିଆର ପରବର୍ତ୍ତୀ ବିରାଟ କୋହଲି କିଏ ? ଇରଫାନ୍‌ ପଠାନ୍‌ ଦେଲେ ବଡ଼ ବୟାନ

ବିରାଟ କୋହଲି । ଟିମ୍‌ ଇଣ୍ଡିଆର ଷ୍ଟାର ବ୍ୟାଟ୍ସମ୍ୟାନ୍‌ । ବିରାଟ ୨୦୨୪ ଟି-୨୦ ବିଶ୍ବକପ୍‌ ବିଜୟ ପରେ ଟି-୨୦ରୁ ଅବସର ନେଇସାରିଛନ୍ତି । ସେହିପରି ୨୦୨୫ରେ ସେ ଟେଷ୍ଟ କ୍ରିକେଟକୁ ମଧ୍ୟ ଅଲବିଦା କହିଛନ୍ତି । ଏବେ କୋହଲି କେବଳ ଦିନିକିଆରେ ଖେଳୁଛନ୍ତି । ସେ ହୁଏତ ୨୦୨୭ ଦିନିକିଆ ବିଶ୍ବକପ୍‌ ପରେ ODI ରୁ ଅବସର ନେଇପାରନ୍ତି । ଏସବୁ ମଧ୍ୟରେ କିଏ ହେବ ଟିମ୍‌ ଇଣ୍ଡିଆ ପରବର୍ତ୍ତୀ ବିରାଟ କୋହଲି ତାହାକୁ ନେଇ ସୋସିଆଲ ମିଡିଆରେ ଚର୍ଚ୍ଚା ଜାରି ରହିଛି ।

ଏହାରି ମଧ୍ୟରେ ପୂର୍ବତନ ଭାରତୀୟ କ୍ରିକେଟର ଇରଫାନ ପଠାନ କହିଛନ୍ତି ଯେ ଶୁବମନ ଗିଲ୍‌ ଟିମ୍ ଇଣ୍ଡିଆର ପରବର୍ତ୍ତୀ ବିରାଟ କୋହଲି ହୋଇପାରନ୍ତି । ଗିଲ୍‌ ବର୍ତ୍ତମାନ ଭାରତର ଟେଷ୍ଟ ଏବଂ ଏକଦିବସୀୟ ଦଳର ଅଧିନାୟକ ଅଛନ୍ତି । ତାଙ୍କୁ ଟିମ୍ ଇଣ୍ଡିଆର ପରବର୍ତ୍ତୀ ସୁପରଷ୍ଟାର ଖେଳାଳି ଭାବରେ ଦେଖାଯାଉଛି । ସେ ଟେଷ୍ଟ ଫର୍ମାଟରେ ନମ୍ବର ୪ ସ୍ଥାନ ଗ୍ରହଣ କରିଛନ୍ତି, ଯେଉଁ ସ୍ଥାନରେ ବିରାଟ କୋହଲି ଖେଳୁଥିଲେ।

ଇରଫାନ ପଠାନ କହିଛନ୍ତି, କିପରି ବିରାଟ କୋହଲିଙ୍କୁ ତାଙ୍କ କ୍ୟାରିୟରର ଆରମ୍ଭରେ ସଚିନ ତେନ୍ଦୁଲକରଙ୍କ ସହ ତୁଳନା କରାଯାଉଥିଲା । ସେହିପରି ଶୁବମନ ଗିଲଙ୍କୁ ଏବେ ବିରାଟ କୋହଲିଙ୍କ ସହ ତୁଳନା କରାଯାଉଛି ।

ଇରଫାନ ପଠାନ କହିଛନ୍ତି, "ଗିଲ୍‌ ବହୁତ ପ୍ରତିଭାଶାଳୀ । ତୁଳନା ସବୁବେଳେ କରାଯିବ । ବିରାଟଙ୍କୁ ସଚିନଙ୍କ ସହ ତୁଳନା କରାଯାଇଥିଲା, ଯିଏ ୨୫ ହଜାରରୁ ୩୦ ହଜାର ରନ୍ କରିଛନ୍ତି । ମୁଁ ଭାବୁଛି ଗିଲ୍‌ଙ୍କ ପାଖରେ ଏଭଳି କିଛି କରିବାର ସମ୍ଭାବନା ଅଛି । ସେ ବିଭିନ୍ନ ପ୍ରକାରର ସଟ୍ ଖେଳିପାରିବେ । ଜଣେ କ୍ରିକେଟର ଭାବରେ ସେ ଯେତେ ଅଧିକ ଦାୟିତ୍ୱ ଏବଂ ଚ୍ୟାଲେଞ୍ଜ ପାଇବେ, ସେ ସେତେ ଭଲ ହେବେ । ମୁଁ ତାଙ୍କୁ ସବୁବେଳେ କ୍ରିକେଟ ପାଇଁ ପ୍ରସ୍ତୁତ ଥିବା ଦେଖିଛି ।"

ଭାରତୀୟ ଅଲରାଉଣ୍ଡରଙ୍କ ପୂର୍ବରୁ ଇଂଲଣ୍ଡର କିମ୍ବଦନ୍ତୀ ସ୍ପିନର ମଣ୍ଟି ପାନେସର୍ ସନ୍ଦେହ ପ୍ରକାଶ କରିଥିଲେ ଯେ ଶୁବମନ ଗିଲ କେବେ ଟିମ୍ ଇଣ୍ଡିଆରେ ବିରାଟ କୋହଲିଙ୍କ ସ୍ଥାନ ନେଇପାରିବେ । ଅନ୍ୟପକ୍ଷରେ, ଦିନିକିଆରେ ଅଧିନାୟକ ହେବା ପରେ ଶୁବମନ ଗିଲ୍ କହିଥିଲେ ଯେ ରୋହିତ ଶର୍ମା ଏବଂ ବିରାଟ କୋହଲିଙ୍କ ସହ ତାଙ୍କର ସମ୍ପର୍କ ପ୍ରଭାବିତ ହେବ ନାହିଁ ।

ଇରଫାନ ପଠାନଙ୍କ ଏହି ବୟାନ ଏପରି ସମୟରେ ଆସିଛି ଯେତେବେଳେ, ODI ଏବଂ ଟେଷ୍ଟ ଦଳର ଅଧିନାୟକ ହେବା ସତ୍ତ୍ୱେ ଶୁବମନ ଗିଲ୍‌ଙ୍କୁ ୨୦୨୬ ଟି-୨୦ ବିଶ୍ୱକପ୍ ପାଇଁ ଭାରତୀୟ ଦଳରୁ ବାଦ ଦିଆଯାଇଛି । ଟି-୨୦ ଦଳର ଉପ-ଅଧିନାୟକ ହେବା ସତ୍ତ୍ୱେ ଗିଲ୍‌ଙ୍କୁ ବିଶ୍ୱକପ୍ ଦଳରୁ ବାଦ୍‌ ଦିଆଯାଇଛି ।