ଆର୍ୟାଲାଣ୍ଡ ଓ ଇଂଲଣ୍ଡ ଗସ୍ତ ପୂର୍ବରୁ ଟିମ୍ ଇଣ୍ଡିଆକୁ ଲାଗିଛି ବଡ଼ ଝଟକା । ଆଘାତ କାରଣରୁ ଏହି ଦୁଇଟି ସିରିଜ୍‌ରୁ ବାଦ୍ ପଡ଼ିଛନ୍ତି ଟିମ୍ ଇଣ୍ଡିଆର ଷ୍ଟାର ଅଲରାଉଣ୍ଡର ନୀତିଶ କୁମାର ରେଡ୍ଡୀ । ତାଙ୍କ ସ୍ଥାନରେ ଅଲରାଉଣ୍ଡର ସୂର୍ଯ୍ୟାଂଶ ଶେଡଗେଙ୍କୁ ଟି-୨୦ ଦଳରେ ସାମିଲ କରାଯାଇଛି ।

ବିସିସିଆଇ ଏକ ସରକାରୀ ବିବୃତ୍ତି ଜାରି କରି କହିଛି ଯେ ଆଫଗାନିସ୍ତାନ ବିପକ୍ଷ ତୃତୀୟ ଦିନିକିଆ ପରେ ନୀତିଶ କୁମାରଙ୍କ ମାଂସପେଶୀରେ ସମସ୍ୟା ଦେଖିବାକୁ ମିଳିଥିଲା । ପରୀକ୍ଷା ପରେ ଡାକ୍ତରୀ ଦଳ ନୀତିଶଙ୍କୁ ପୁନର୍ବାସ କରିବାକୁ ପରାମର୍ଶ ଦେଇଥିଲା, ଯାହା ତାଙ୍କୁ ଆୟର୍ଲାଣ୍ଡ ଏବଂ ଇଂଲଣ୍ଡ ଟି-୨୦ ସିରିଜରୁ ଓହରି ଯିବାକୁ ବାଧ୍ୟ କରିଥିଲା ।

🚨 News 🚨

Suryansh Shedge replaces injured Nitish Kumar Reddy in #TeamIndia's squads for Ireland and England series.

More Details 🔽 | #IREvIND | #ENGvIND https://t.co/M92NI1TbE0

— BCCI (@BCCI) June 23, 2026

ସୂର୍ଯ୍ୟାଂଶ ଶେଡଗେ ସମ୍ପ୍ରତି ଶ୍ରୀଲଙ୍କାରେ ଖେଳାଯାଇଥିବା ଟ୍ରାଇ-ସିରିଜରେ ଭାରତ 'ଏ' ପାଇଁ ଖେଳିଥିଲେ । ସେ ପାଞ୍ଚଟି ମ୍ୟାଚରେ ୧୪୭ ରନ୍ କରିଥିଲେ । ସେ ଶ୍ରୀଲଙ୍କା 'ଏ' ବିପକ୍ଷରେ ମଧ୍ୟ ୭୨ ରନ୍ କରିଥିଲେ, ଯାହା ସମଗ୍ର ଟୁର୍ଣ୍ଣାମେଣ୍ଟର ତାଙ୍କର ଏକମାତ୍ର ଅର୍ଦ୍ଧଶତକ ଥିଲା । ସେ ଏହି ସିରିଜ୍‌ରେ ଦୁଇଟି ଓ୍ବିକେଟ୍‌ ମଧ୍ୟ ନେଇଥିଲେ ।
ହାର୍ଦ୍ଦିକ ପାଣ୍ଡ୍ୟା ବର୍ତ୍ତମାନ ଆଘାତ ଯୋଗୁଁ ଟିମ୍ ଇଣ୍ଡିଆରୁ ବାହାରେ ଅଛନ୍ତି । ତାଙ୍କ ଅନୁପସ୍ଥିତିରେ ନୀତିଶଙ୍କୁ ଭାରତର ପ୍ଲେଇଂ ଇଲେଭେନରେ ଲଗାତାର ସୁଯୋଗ ମିଳୁଛି । ଏବେ ତାଙ୍କର ଆଘାତ ଟିମ୍ ଇଣ୍ଡିଆ ପାଇଁ ଏକ ବଡ଼ ଝଟକା । ସୂର୍ଯ୍ୟାଂଶଙ୍କୁ ଆୟର୍ଲାଣ୍ଡ ଏବଂ ଇଂଲଣ୍ଡର ପିଚ୍‌ରେ ଆଶାଠାରୁ ଅଧିକ ବୋଲିଂ କରିବାକୁ ପଡ଼ିପାରେ ।

ଭାରତୀୟ ଦଳ ପ୍ରଥମେ ଆୟର୍ଲାଣ୍ଡ ଯାତ୍ରା କରିବ । ଯେଉଁଠାରେ ଜୁନ୍ ୨୬ ଏବଂ ୨୮ ତାରିଖରେ ଉଭୟ ଦଳ ମଧ୍ୟରେ ଦୁଇଟି ଟି-୨୦ ମ୍ୟାଚ୍ ଖେଳାଯିବ । ଏହା ପରେ, ଟିମ୍ ଇଣ୍ଡିଆ ଇଂଲଣ୍ଡ ଅଭିମୁଖେ ଯାତ୍ରା କରିବ । ଯେଉଁଠାରେ ଏହା ପାଞ୍ଚଟି ଟି-୨୦ ମ୍ୟାଚ୍ ଏବଂ ତିନୋଟି ଦିନିକିଆ ଖେଳିବ । ଟିମ୍ ଇଣ୍ଡିଆର ଇଂଲଣ୍ଡ ଗସ୍ତ ଜୁଲାଇ ୧ ତାରିଖରୁ ଆରମ୍ଭ ହୋଇ ୧୯ ତାରିଖ ପର୍ଯ୍ୟନ୍ତ ଚାଲିବ ।