ଓଡ଼ିଶା ଆଜି ଭାରତୀୟ ହକିର ଏକ ପ୍ରମୁଖ କେନ୍ଦ୍ର ଭାବେ ପରିଚିତ। ବିଶେଷ କରି ସୁନ୍ଦରଗଡ଼ ଜିଲ୍ଲାକୁ ଭାରତୀୟ ହକିର ନର୍ସରୀ ବୋଲି କୁହାଯାଏ। ଏହି ମାଟିରୁ ଅନେକ ପ୍ରତିଭାଶାଳୀ ଖେଳାଳି ଜାତୀୟ ଏବଂ ଆନ୍ତର୍ଜାତୀୟ ସ୍ତରରେ ଦେଶର ନାମ ଉଜ୍ଜ୍ୱଳ କରିଛନ୍ତି। ସମ୍ପ୍ରତି ହକି ଇଣ୍ଡିଆ ବେଲଜିୟମ ଗସ୍ତ ପାଇଁ ୨୨ ଜଣିଆ ଭାରତୀୟ ଜୁନିଅର ପୁରୁଷ ହକି ଦଳ ଘୋଷଣା କରିଛି। ଏହି ଦଳରେ ଓଡ଼ିଶାର ୯ ଜଣ ଖେଳାଳି ସ୍ଥାନ ପାଇଥିବା ବେଳେ ସମସ୍ତେ ସୁନ୍ଦରଗଡ଼ ଜିଲ୍ଲାର। ଏହା ଓଡ଼ିଶା ହକି ଇତିହାସରେ ଏକ ନୂଆ ଅଧ୍ୟାୟ ସୃଷ୍ଟି କରିଛି। ଏତେ ସଂଖ୍ୟକ ଖେଳାଳି ଏକାସାଙ୍ଗରେ ଭାରତୀୟ ଦଳରେ ସୁଯୋଗ ପାଇବା ରାଜ୍ୟ ପାଇଁ ଗର୍ବର ବିଷୟ।

ଏହାସହ ପଢ଼ନ୍ତୁ: ଅଭିଷେକଙ୍କୁ ବଡ଼ ଝଟକା, ଟି-୨୦ରେ ନମ୍ବର-୧ ବ୍ୟାଟ୍ସମ୍ୟାନ୍‌ ହେଲେ ଇଶାନ କିଶାନ

ଓଡ଼ିଶା ହକି ଇତିହାସରେ ଏହା ପ୍ରଥମ ଥର ଯେ ଭାରତୀୟ ହକି ଦଳ ପାଇଁ ନଅ ଜଣ ଖେଳାଳିଙ୍କୁ ମନୋନୀତ କରାଯାଇଛି। ସୁନ୍ଦରଗଡ଼ର ଅନମୋଲ ଏକ୍କାଙ୍କୁ ଦଳର ଅଧିନାୟକ ନିଯୁକ୍ତ କରାଯାଇଛି। ଆଗାମୀ ଜୁନିଅର ଏସିଆ କପ୍ ହକି ଚାମ୍ପିଅନସିପ୍ ପାଇଁ ପ୍ରସ୍ତୁତି ପାଇଁ ଅଭିଜ୍ଞତା ହାସଲ କରିବା ପାଇଁ ଦଳକୁ ବେଲଜିୟମ ପଠାଯାଉଛି।

ଓଡ଼ିଶା ସରକାର ହକିର ବିକାଶ ପାଇଁ ଦୀର୍ଘଦିନ ଧରି ବିଶେଷ ପଦକ୍ଷେପ ନେଇଆସୁଛନ୍ତି। ବିଶ୍ୱସ୍ତରୀୟ ଷ୍ଟାଡିୟମ୍, ଉନ୍ନତ ପ୍ରଶିକ୍ଷଣ ସୁବିଧା ଏବଂ ଗ୍ରାସରୁଟ୍ ସ୍ତରରେ ପ୍ରତିଭା ଚିହ୍ନଟ କାର୍ଯ୍ୟକ୍ରମ ଯୋଗୁଁ ରାଜ୍ୟରେ ହକିର ଲୋକପ୍ରିୟତା ଅଧିକ ବଢ଼ିଛି।  ଦଳ ପାଇଁ ମନୋନୀତ ଅନ୍ୟ ଖେଳାଳିମାନଙ୍କ ମଧ୍ୟରେ ଗୋଲକିପର ବିବେକ ଲାକ୍ରା, ଡିଫେଣ୍ଡର ରୋହିତ କୁଲୁ, ପ୍ରଶାନ୍ତ ବାର୍ଲା ଏବଂ ସଞ୍ଜିତ ତିର୍କୀ, ମିଡଫିଲ୍ଡର ଆଦ୍ରୋହିତ ଏକ୍କା, ମୁକେଶ ଟପ୍ପୋ ଏବଂ ହ୍ରିତିକ୍ ଲାକ୍ରା ଏବଂ ଫରୱାର୍ଡ ଆର୍ଯ୍ୟାନ ଖେସ୍ ଅଛନ୍ତି। ଦଳ ଜୁଲାଇ 4 ରେ ବେଲଜିୟମ ଅଭିମୁଖେ ଯାତ୍ରା କରିବେ।

ଜୁଲାଇ ୫ ରୁ ଜୁଲାଇ ୧୮ ମଧ୍ୟରେ ହେବାକୁ ଥିବା ଏହି ଗସ୍ତ ସମୟରେ, ଭାରତୀୟ ଦଳ ଆୟୋଜକ ବେଲଜିୟମ, ଅଷ୍ଟ୍ରିଆ, ଜର୍ମାନୀ ଏବଂ ନେଦରଲ୍ୟାଣ୍ଡ ବିପକ୍ଷରେ ମ୍ୟାଚ୍ ଖେଳିବ। କାର୍ଯ୍ୟସୂଚୀ ଅନୁଯାୟୀ, ଭାରତ ଜୁଲାଇ ୭ ଏବଂ ୮ ରେ ଅଷ୍ଟ୍ରିଆ ବିପକ୍ଷରେ ପ୍ରଥମ ଦୁଇଟି ମ୍ୟାଚ୍ ଖେଳିବ। ଏହା ପରେ, ଜୁଲାଇ ୧୦ ଏବଂ ୧୪ ରେ ଆୟୋଜକ ବେଲଜିୟମ ବିପକ୍ଷରେ ମ୍ୟାଚ୍ ଖେଳାଯିବ। ଦଳ ଜୁଲାଇ ୧୩ ରେ ଜର୍ମାନୀ ଏବଂ ଜୁଲାଇ ୧୭ ରେ ନେଦରଲ୍ୟାଣ୍ଡ ବିପକ୍ଷରେ ଶେଷ ମ୍ୟାଚ୍ ଖେଳିବ। ବେଙ୍ଗାଲୁରୁରୁ ଅଧିନାୟକ ଅନମୋଲ ଏକ୍କା କହିଛନ୍ତି ଯେ ଦଳର ସମସ୍ତ ଖେଳାଳି ଖୁବ ଏକ୍ସାଇଟେଡ ଅଛନ୍ତି ଏବଂ ଦୃଢ ଆତ୍ମବିଶ୍ୱାସର ସହିତ ୟୁରୋପୀୟ ଦଳଗୁଡ଼ିକର ମୁକାବିଲା କରିବାକୁ ପ୍ରସ୍ତୁତ।