ବିଶ୍ବକପ୍‌ ସେମିଫାଇନାଲ ରେସ୍‌ରୁ ବାଦ୍‌ ପଡ଼ିଲା ପାକିସ୍ତାନ । ICC ଟି-୨୦ ବିଶ୍ୱକପ୍ ୨୦୨୬ର ସେମିଫାଇନାଲ ଦୌଡ଼ରୁ ପ୍ରଥମେ ବାଦ ପଡ଼ିଥିବା ଶ୍ରୀଲଙ୍କା ଦଳ ପାକିସ୍ତାନର ସ୍ୱପ୍ନକୁ ଧୂଳିସାତ କରିଦେଇଛି । ଶନିବାର ରାତିରେ ଶ୍ରୀଲଙ୍କାର ପାଲେକେଲ ଅନ୍ତର୍ଜାତୀୟ କ୍ରିକେଟ ଷ୍ଟାଡିୟମରେ ଖେଳାଯାଇଥିବା ମ୍ୟାଚରେ ପ୍ରଥମେ ବ୍ୟାଟିଂ କରି ପାକିସ୍ତାନ ୮ ୱିକେଟ୍ ହରାଇ ୨୧୨ ରନର ବିଶାଳ ସ୍କୋର କରିଥିଲା । ପାକିସ୍ତାନ ପକ୍ଷରୁ ଓପନର ସାହିବଜାଦା ଫରହାନଙ୍କ ଶତକ ଏବଂ ଫଖର ଜମାନଙ୍କ ୮୪ ରନ୍‌ ବଳରେ ପାକିସ୍ତାନ ବଡ଼ ସ୍କୋର କରିପାରିଥିଲା ।

ଦାସୁନ୍ ଶାନାକା ଏବଂ ପବନ ରତ୍ନାୟକେ ପାକିସ୍ତାନର ସ୍ୱପ୍ନକୁ ଧୂଳିସାତ କରିଦେଲେ

ସେମିଫାଇନାଲରେ ପହଞ୍ଚିବା ପାଇଁ ପାକିସ୍ତାନକୁ ଯେକୌଣସି ମୂଲ୍ୟରେ ଶ୍ରୀଲଙ୍କାକୁ ୧୪୭ ରନରେ ସୀମିତ ରଖିବା ଦରକାର ଥିଲା । କିନ୍ତୁ ତାହା ବିଫଳ ହୋଇଥିଲା । ଶ୍ରୀଲଙ୍କା ଦଳ ୬ ୱିକେଟ୍ ହରାଇ ୨୦୭ ରନ୍ କରିଥିଲା ​​ଏବଂ ମ୍ୟାଚ୍ ୬ ରନରେ ହାରିଯାଇଥିଲା । ଅଧିନାୟକ ଦାସୁନ୍ ଶାନାକା ଅପରାଜିତ ୭୬ ରନ୍ ଏବଂ ପବନ ରତ୍ନାୟକେ ୫୮ ରନ୍‌ର ଚମତ୍କାର ଅର୍ଦ୍ଧଶତକ ହାସଲ କରିଥିଲେ । ଶ୍ରୀଲଙ୍କା ଦଳ ୧୪୭ ରନ୍ ଅତିକ୍ରମ କରିବା ମାତ୍ରେ ପାକିସ୍ତାନ ସେମିଫାଇନାଲ ରାଉଣ୍ଡରୁ ବାଦ ପଡ଼ିଥିଲା । ପାକିସ୍ତାନ ପରିବର୍ତ୍ତେ ନ୍ୟୁଜିଲାଣ୍ଡ ସେମିରେ ନିଜ ସ୍ଥାନ ପକ୍କା କରିଛି ।

ସେମିଫାଇନାଲରେ ପହଞ୍ଚିବା ପାଇଁ ଟିମ୍ ଇଣ୍ଡିଆକୁ କ'ଣ କରିବାକୁ ପଡିବ?

ଯଦି ଟିମ୍ ଇଣ୍ଡିଆ ସେମିଫାଇନାଲରେ ପହଞ୍ଚିବାକୁ ଚାହେଁ, ତେବେ ଆଜି ୧ ମାର୍ଚ୍ଚରେ କୋଲକାତାର ଇଡେନ୍ ଗାର୍ଡେନରେ ହେବାକୁ ଥିବା ମ୍ୟାଚରେ ସେମାନଙ୍କୁ ୱେଷ୍ଟଇଣ୍ଡିଜକୁ ପରାସ୍ତ କରିବାକୁ ପଡିବ । ଯଦି ଟିମ୍ ଇଣ୍ଡିଆ ଏଠାରୁ ଏହାର ସମସ୍ତ ବାକି ମ୍ୟାଚ୍ ଜିତିଯାଏ ତେବେ ହିଁ ସେମାନେ ବିଶ୍ୱ ଚାମ୍ପିଅନ୍ ଆଖ୍ୟା ବଜାୟ ରଖିପାରିବେ । ଉଲ୍ଲେଖନୀୟ ଯେ ଭାରତୀୟ ଦଳ ରୋହିତ ଶର୍ମାଙ୍କ ଅଧିନାୟକତ୍ୱରେ ୨୦୨୪ ଟି-୨୦ ବିଶ୍ୱକପ୍ ଜିତିଥିଲା ।