IPL ର ଗୁରୁତ୍ବପୂର୍ଣ୍ଣ ମ୍ୟାଚ୍‌ ପୂର୍ବରୁ RCB ପାଇଁ ବଡ଼ ଖବର । IPL ୨୦୨୬ର ବଳକା ମ୍ୟାଚ୍‌ ଖେଳିବା ପାଇଁ ଭାରତ ଫେରିଛନ୍ତି ଫିଲ୍‌ ସଲ୍ଟ । ଆଙ୍ଗୁଠିରେ ଆଘାତ ଲାଗିବା ପରେ ସଲ୍ଟ ଇଂଲଣ୍ଡ କ୍ରିକେଟ୍ ବୋର୍ଡର ନିର୍ଦ୍ଦେଶରେ ଘରକୁ ଫେରିଥିଲେ । ତାଙ୍କ ଅନୁପସ୍ଥିତିରେ RCB ବିରାଟ କୋହଲିଙ୍କ ସହ ଓପନିଂ କରିବାକୁ ଜ୍ୟାକବ୍ ବେଥେଲଙ୍କୁ ଚୁଡ଼ାନ୍ତ ଏକାଦଶକୁ ଆଣିଥିଲା । କିନ୍ତୁ ବେଥେଲ୍ ବିଶେଷ ପ୍ରଭାବ ପକାଇପାରିଲା ନାହିଁ ।

ଫିଲ୍ ସଲ୍ଟ ବିମାନବନ୍ଦରରେ ପହଞ୍ଚିବାର ଏକ ଭିଡିଓ ସୋସିଆଲ ମିଡିଆରେ ଦ୍ରୁତ ଗତିରେ ଭାଇରାଲ ହେଉଛି । ସଲ୍ଟ IPL ୨୦୨୬ରେ RCB ପାଇଁ ପ୍ରଥମ ଛଅଟି ମ୍ୟାଚ୍ ଖେଳିଥିଲେ ଏବଂ ମୋଟ ୨୦୨ ରନ୍ କରିଥିଲେ । ଏହି ସିଜିନରେ ଯେତେବେଳେ ବେଙ୍ଗାଲୁରୁ ଏବଂ ମୁମ୍ବାଇ ପ୍ରଥମ ଥର ପାଇଁ ମୁହାଁମୁହିଁ ହୋଇଥିଲେ ସଲ୍ଟ ସେହି ମ୍ୟାଚ୍‌ ୭୮ ରନ୍‌ର ଏକ ଚମତ୍କାର ଇନିଂସ ଖେଳିଥିଲେ । ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ଶେଷ ମ୍ୟାଚରେ ସେ ୬୩ ରନ୍ କରିଥିଲେ ।

ଫିଲ୍ ସଲ୍ଟ ଏପ୍ରିଲ ୧୮ରେ ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ମ୍ୟାଚ୍‌ରେ ଫିଲ୍ଡିଂ କରୁଥିବା ସମୟରେ ଆହତ ହୋଇଥିଲେ । ସେ ବାଉଣ୍ଡରୀରେ ଏକ ବଲକୁ ଅଟକାଇବା ପାଇଁ ଡାଇଭ୍ ମାରିଥିଲେ, ଯାହାଫଳରେ ତାଙ୍କ ବାମ ଆଙ୍ଗୁଠିରେ ବାଜିଥିଲା । ଇଂଲଣ୍ଡ କ୍ରିକେଟ୍ ବୋର୍ଡ ସଲ୍ଟଙ୍କୁ ତୁରନ୍ତ ଫେରିବାକୁ ନିର୍ଦ୍ଦେଶ ଦେଇଥିଲା, ଯାହା ପରେ ସେ ଇଂଲଣ୍ଡ ଚାଲିଯାଇଥିଲେ । ତାଙ୍କର ସ୍କାନ କରାଯାଇଥିଲା ଏବଂ ତାଙ୍କ ଆଘାତର ଗମ୍ଭୀରତା ଆକଳନ କରାଯାଇଥିଲା । ଏବେ ସେ ପୁଣି ଭାରତ ଫେରିଆସିଛନ୍ତି ।

ଫିଲ୍ ସଲ୍ଟ ଭାରତ ଫେରିଆସିଛନ୍ତି, କିନ୍ତୁ ଆଜି ସେ ମୁମ୍ବାଇ ଇଣ୍ଡିଆନ୍ସ ବିପକ୍ଷରେ ଖେଳିବାର ସମ୍ଭାବନା କମ୍ । ଏହି ସିଜିନ୍‌ରେ ଏପର୍ଯ୍ୟନ୍ତ ଫର୍ମରେ ନଥିବା ଜ୍ୟାକବ୍ ବେଥେଲ୍‌ଙ୍କ ଉପରେ ପୁଣି ନିର୍ଭର କରାଯିବ । ସଲ୍ଟଙ୍କ ସ୍ଥାନରେ ବେଥେଲ୍‌ଙ୍କୁ ସାମିଲ କରାଯାଇଥିଲା, ବିରାଟ କୋହଲିଙ୍କ ସହିତ ଓପନିଂ କରିଥିଲେ, କିନ୍ତୁ ସେ ଏକ ଗୁରୁତ୍ୱପୂର୍ଣ୍ଣ ଇନିଂସ ସ୍କୋର କରିପାରି ନଥିଲେ । ପ୍ଲେଅଫ୍ ଦୃଷ୍ଟିକୋଣରୁ ଆଜିର ମ୍ୟାଚ୍ ମୁମ୍ବାଇ ଇଣ୍ଡିଆନ୍ସ ପାଇଁ କର ବା ମର ମ୍ୟାଚ୍ । ଯଦି RCB ଆଜି ଜିତିଯାଏ, ତେବେ MI ଆନୁଷ୍ଠାନିକ ଭାବରେ ପ୍ଲେଅଫ୍ ଦୌଡ଼ରୁ ବାଦ ପଡ଼ିଯିବ ।