ପୁଣି ବଦଳିଲେ ଓଡ଼ିଶା ସିନିୟର ଦଳର କୋଚ୍ । ପ୍ରଭଞ୍ଜନ ମଲ୍ଲିକଙ୍କୁ ଓଡ଼ିଶା ସିନିୟର ଦଳର କୋଚ୍ ଭାବେ ନିଯୁକ୍ତି ଦେଇଛି ଓଡ଼ିଶା କ୍ରିକେଟ ଅସୋସିଏସନ । କୋଚ୍ ଭାବେ ସୁରେନ୍ଦ୍ର ଭାବେ ଦାୟିତ୍ୱ ନେବା ପରେ ଓଡ଼ିଶା ସିନିୟର ଦଳର ନୈରାଶ୍ୟଜନକ ପ୍ରଦର୍ଶନ ପରେ ଭାବେଙ୍କୁ ହଟାଇ ପ୍ରଭଞ୍ଜନଙ୍କୁ ଦାୟିତ୍ୱ ଦିଆଯାଇଛି । ତେବେ ରାଜ୍ୟ ବାହାରର କୋଚଙ୍କୁ ବାରମ୍ବାର କୋଟି କୋଟି ଟଙ୍କା ବ୍ୟୟ କରି ନିଯୁକ୍ତି ଦେଇ କୌଣସି ସଫଳତା ଦେଇନଥିବାରୁ ଉଠିଛି ବଡ଼ ପ୍ରଶ୍ନ ।

ଚାଲିଛି ଫଟାଫଟ୍ କ୍ରିକେଟର ମହାକୁମ୍ଭ ଆଇପିଏଲ ୨୦୨୬ । କିନ୍ତୁ ଓଡ଼ିଶାରୁ ଜଣେ ହେଲେ ବି ଏହି ମେଗା ଟୁର୍ଣ୍ଣାମେଣ୍ଟରେ ନାହାନ୍ତି । ସେହିପରି ଗତ ୨୩ ବର୍ଷ ହେଲା ଓଡ଼ିଶାରୁ କେହି ଜଣେ ବି ଟିମ୍‌ ଇଣ୍ଡିଆରେ ଖେଳିବାର ସୁଯୋଗ ପାଇ ନାହାନ୍ତି । ଏମିତିକି ଗତ ରଣଜୀ ସିଜିନରେ ନିଜ ଗ୍ରୁପରେ ୭ ନମ୍ବରରେ ଥିଲା ଓଡ଼ିଶା । ବିଜୟ ହଜାରେ ଓ ମୁସ୍ତାକ ଅଲ୍ଲୀରେ ବି ଶୋଚନୀୟ ପ୍ରଦର୍ଶନ କରୁଛି ଦଳ । ଓଡ଼ିଶାର କ୍ରିକେଟର ଏହି ମହାସଂକଟଙ୍କ ମଧ୍ୟରେ ସଞ୍ଜୀବନୀ ସାଜିବେ କି ପ୍ରଭଞ୍ଜନ ?

ଅଧିକ ପଢ଼ନ୍ତୁ: ଅଷ୍ଟମ ସ୍ଥାନରୁ ମଧ୍ୟ ପ୍ଲେଅଫ୍‌କୁ ଯାଇପାରେ KKR, ଜାଣନ୍ତୁ ପୂରା ଗଣିତ...

ପ୍ରଭଞ୍ଜନ ମଲ୍ଲିକ । ଓଡ଼ିଶା ସିନିୟର କ୍ରିକେଟ ଦଳର କୋଚ୍ ଭାବେ ନିଯୁକ୍ତି ପାଇଛନ୍ତି । ସେ ହେଉଛନ୍ତି ଓଡ଼ିଶା ରଣଜୀ ଦଳର ପୂର୍ବତନ କ୍ୟାପଟେନ୍ । ଡୋମେଷ୍ଟିକ୍ କ୍ରିକେଟରେ ବଡ଼ ନାଁ । ପ୍ରଭଞ୍ଜନ ୮୮ ଫାଷ୍ଟ କ୍ଲାସ୍‌ ମ୍ୟାଚ୍ ଖେଳି ୪୭.୩୦ ହାରରେ ୫ ହଜାର ୮୧୮ ରନ୍‌ କରିଛନ୍ତି । ଯେଉଁଥିରେ ରହିଛି ୧୮ ଶତକ । ପୂର୍ବରୁ ଅଣ୍ଡର -୧୯ କୋଚିଂ ଦାୟିତ୍ବ ସମ୍ଭାଳି ସାରିଛନ୍ତି ପ୍ରଭଞ୍ଜନ । ସେ ବର୍ଷ ବର୍ଷ ଧରି ଓଡ଼ିଶା କ୍ରିକେଟ ସହ ଜଡ଼ିତ ରହିଥିବାବେଳେ ଜୁନିୟର ଏବଂ ବରିଷ୍ଠ ଦଳର ଖେଳାଳିଙ୍କୁ ବେଶ୍‌ ପାଖରୁ ଜାଣିଛନ୍ତି । ପ୍ରଭଞ୍ଜନ ବି ଓଡ଼ିଶା କ୍ରିକେଟ ପାଇଁ ପ୍ରସ୍ତୁତ କରୁଛନ୍ତି ନୂଆ ରଣନୀତି।

ତେବେ ପ୍ରଭଞ୍ଜନଙ୍କ ଆଗରେ ଚ୍ୟାଲେଞ୍ଜ ବି ଅନେକ

୧-ଟିମରେ ଜୁନିୟର-ସିନିୟର ଖେଳାଳିଙ୍କ ମଧ୍ୟରେ ସମନ୍ବୟ
୨-ମାନସିକ ଭାବେ ଦୁର୍ବଳ ଥିବା ଖେଳାଳିଙ୍କ ମନୋବଳ ବଢାଇବା
୩-ଚୟନ ପ୍ରକ୍ରିୟାରେ ସ୍ବଚ୍ଛତା
୪-ତୂଣମୂଳରୁ ପ୍ରତିଭା ଚିହ୍ନଟ
୫-ଡୋମେଷ୍ଟିକ କ୍ରିକେଟରେ ପ୍ରଦର୍ଶନରେ ଉନ୍ନତି

ପ୍ରଭଞ୍ଜନଙ୍କ ଠାରୁ ଢେର ଆଶା ରଖିଛି ଓଡ଼ିଶା କ୍ରିକେଟ୍ ଆସୋସିଏସନର । ପୂର୍ବରୁ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରି ଓସିଏ ବାହାର ରାଜ୍ୟ ସହ କିଛି ଅନ୍ତର୍ଜାତୀୟ ଖେଳାଳିଙ୍କୁ କୋଚ୍‌ ଭାବେ ଦାୟିତ୍ୱ ଦେଇଥିଲା । ମାଇକେଲ ବେଭାନ, ସବା କରିମ, ଭେଙ୍କଟ ପତି ରାଜୁ, ଓ୍ବାସିମ ଜାଫର, ଦିନେଶ ମୋଙ୍ଗିଆ, ଆଉ ସୁରେନ୍ଦ୍ର ଭାବେ । ହେଲେ ଓଡ଼ିଶା କ୍ରିକେଟର ଭାଗ୍ୟ ବଦଳିଲା ନାହିଁ । ଏବେ ଓଡ଼ିଶା କ୍ରିକେଟକୁ କେବଳ ପ୍ରଭଞ୍ଜନ ଭରସା । ଆଗାମୀ ଦିନରେ ପ୍ରଭଞ୍ଜନଙ୍କ ଗୁରୁମନ୍ତ୍ର ଓଡ଼ିଶା କ୍ରିକେଟ ଦଳରେ କି ପରବର୍ତ୍ତନ ଆଣୁଛି, ତା ଉପରେ ରହିବ ସମସ୍ତଙ୍କ ନଜର ।