Team India Chief Selector / ଅଗରକରଙ୍କ ପରେ କିଏ ? ପାର୍ଥିବଙ୍କ ନା, ଓଡ଼ିଆ ପୁଅ ପ୍ରଜ୍ଞାନ ହେବେ କି ଟିମ୍ ଇଣ୍ଡିଆର ଚିଫ୍ ସିଲେକ୍ଟର ?

ଭାରତୀୟ ସିନିୟର ପୁରୁଷ କ୍ରିକେଟ୍‌ର ଚୟନ କମିଟିରେ ପରିବର୍ତ୍ତନକୁ ନେଇ ଅନିଶ୍ଚିତତା ବଢ଼ିଛି । ପୂର୍ବତନ ମୁଖ୍ୟ ଚୟନକର୍ତ୍ତା ଅଜିତ ଅଗରକରଙ୍କ ପରେ ତାଙ୍କ ଉତ୍ତରାଧିକାରୀ ଭାବେ ଚର୍ଚ୍ଚାରେ ଥିବା ପାର୍ଥିବ ପଟେଲ ମଧ୍ୟ ଏହି ଦୌଡ଼ରୁ ଓହରିଯାଇଛନ୍ତି । ସେ ପଶ୍ଚିମ ଜୋନ୍‌ର ଚୟନକର୍ତ୍ତା ପଦ ପାଇଁ ଆବେଦନ କରିନାହାନ୍ତି । ଫଳରେ ନୂଆ ମୁଖ୍ୟ ଚୟନକର୍ତ୍ତା ନିଯୁକ୍ତ କରାଯିବ ନା ଏବେର ବ୍ୟବସ୍ଥା ଜାରି ରହିବ, ସେନେଇ BCCI ସାମ୍ନାରେ ଏକ ବଡ଼ ପ୍ରଶ୍ନ ଉଠିଛି ।

ଆସନ୍ତା ୨୦୨୭ ଦିନିକିଆ କ୍ରିକେଟ୍‌ ବିଶ୍ୱକପ୍‌କୁ ଦୃଷ୍ଟିରେ ରଖି ଦଳ ଚୟନରେ ସ୍ଥିରତା ବଜାୟ ରଖିବା ବିସିସିଆଇ ପାଇଁ ଗୁରୁତ୍ୱପୂର୍ଣ୍ଣ ହୋଇପଡ଼ିଛି । ଦଳର ଆବଶ୍ୟକତା ଅନୁଯାୟୀ ସ୍ପଷ୍ଟ ଯୋଜନା ପ୍ରସ୍ତୁତ କରିପାରୁଥିବା ଏବଂ ବଡ଼ ଟୁର୍ଣ୍ଣାମେଣ୍ଟ ପର୍ଯ୍ୟନ୍ତ ଚୟନ ପ୍ରକ୍ରିୟାରେ ନିରନ୍ତରତା ରଖିପାରୁଥିବା ବ୍ୟକ୍ତିଙ୍କୁ ଦାୟିତ୍ୱ ଦେବାକୁ ବୋର୍ଡ ଚାହୁଁଛି ।

ଭିଭିଏସ୍‌ ଲକ୍ଷ୍ମଣଙ୍କ ଭୂମିକାକୁ ନେଇ ଚର୍ଚ୍ଚା

ପାର୍ଥିବ ପଟେଲ ଏହି ଦୌଡ଼ରୁ ଓହରିଯିବା ପରେ ଭିଭିଏସ୍‌ ଲକ୍ଷ୍ମଣଙ୍କ ଭୂମିକାକୁ ନେଇ ଆଲୋଚନା ଜୋର୍‌ ଧରିଛି । ବର୍ତ୍ତମାନ ଲକ୍ଷ୍ମଣ ବିସିସିଆଇର ସେଣ୍ଟର ଅଫ୍‌ ଏକ୍ସଲେନ୍ସ (CoE)ର ମୁଖ୍ୟ ଭାବେ କାର୍ଯ୍ୟ କରୁଛନ୍ତି । ଅନ୍ୟପଟେ, ଏବେ ଓଡ଼ିଆ ପୁଅ ପ୍ରଜ୍ଞାନ ଓଝା ଅନ୍ତରୀଣ ଭାବେ ଚୟନ କମିଟିର ନେତୃତ୍ୱ ନେଉଛନ୍ତି । ତେଣୁ ଏହି ବ୍ୟବସ୍ଥାକୁ ଆଗକୁ ମଧ୍ୟ ଜାରି ରଖିବାକୁ ବୋର୍ଡ ବିଚାର କରୁଥିବା ଚର୍ଚ୍ଚା ହେଉଛି ।

ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ବିସିସିଆଇ ଚାହୁଁଥିଲା ଯେ ଅଜିତ ଅଗରକର ୨୦୨୭ ବିଶ୍ୱକପ୍‌ ପର୍ଯ୍ୟନ୍ତ ମୁଖ୍ୟ ଚୟନକର୍ତ୍ତା ଭାବେ ରହନ୍ତୁ । ଏହାଦ୍ୱାରା ଦଳ ଚୟନରେ ନିରନ୍ତରତା ରହିପାରିଥାନ୍ତା। କିନ୍ତୁ ତାହା ସମ୍ଭବ ହୋଇନାହିଁ । ବୋର୍ଡ ସହ ଜଡ଼ିତ ଜଣେ ସୂତ୍ରଙ୍କ କହିବା ଅନୁସାରେ, ନୂଆ ମୁଖ୍ୟ ଚୟନକର୍ତ୍ତାଙ୍କ ଚିନ୍ତାଧାରା ଓ ଯୋଜନା ବର୍ତ୍ତମାନର ବ୍ୟବସ୍ଥାଠାରୁ ଭିନ୍ନ ହୋଇପାରେ । ତେଣୁ ନିଯୁକ୍ତି ପୂର୍ବରୁ ତାଙ୍କ ଦୃଷ୍ଟିକୋଣ ବୁଝିବା ଜରୁରୀ । ଭିଭିଏସ୍‌ ଲକ୍ଷ୍ମଣଙ୍କ ବଢ଼ୁଥିବା ଭୂମିକାକୁ ଦେଖି ବୋର୍ଡ ଏବେର ବ୍ୟବସ୍ଥା ଜାରି ରଖିବା ନେଇ ମଧ୍ୟ ବିଚାର କରୁଛି । ତେବେ ଏପର୍ଯ୍ୟନ୍ତ କୌଣସି ଚୂଡ଼ାନ୍ତ ନିଷ୍ପତ୍ତି ହୋଇନାହିଁ ।

ଅଭିଜ୍ଞ ଖେଳାଳିଙ୍କୁ ନେବା ପାଇଁ ବଜେଟ୍‌ ବୃଦ୍ଧି

ଚୟନ କମିଟିରେ ଅଭିଜ୍ଞ ପୂର୍ବତନ କ୍ରିକେଟର୍‌ଙ୍କୁ ସାମିଲ କରିବା ପାଇଁ ବିସିସିଆଇ ନିଜର ବେତନ ନୀତିରେ ମଧ୍ୟ ନମନୀୟତା ଆଣୁଛି । ଆନ୍ତର୍ଜାତୀୟ କ୍ରିକେଟ୍‌ରେ ଦୀର୍ଘ ଅଭିଜ୍ଞତା ଥିବା ବ୍ୟକ୍ତିଙ୍କୁ ଚୟନ କମିଟିରେ ପ୍ରାଥମିକତା ଦେବାକୁ ବୋର୍ଡ ଚାହୁଁଛି ।

ରିପୋର୍ଟ ଅନୁଯାୟୀ, ଗତବର୍ଷ ସେପ୍ଟେମ୍ବରରେ ଆର୍‌ପି ସିଂହ ଓ ପ୍ରଜ୍ଞାନ ଓଝା ଚୟନ କମିଟିରେ ସାମିଲ ହେବା ପରେ ଚୟନ କମିଟିଗୁଡ଼ିକ ପାଇଁ ବୋର୍ଡର ଖର୍ଚ୍ଚ ଧାର୍ଯ୍ୟ ବଜେଟ୍‌ଠାରୁ ୩ କୋଟି ଟଙ୍କା ବୃଦ୍ଧି ପାଇ ୧୭.୪୫ କୋଟି ଟଙ୍କାରେ ପହଞ୍ଚିଥିଲା ।

ଏହାସତ୍ତ୍ୱେ, ୨୦୨୬-୨୭ ଆର୍ଥିକ ବର୍ଷ ପାଇଁ ଏଥିରେ ୧୯.୩୫ କୋଟି ଟଙ୍କାର ବଜେଟ୍‌ ରଖାଯାଇଛି। ରିପୋର୍ଟରେ ଚୟନ କମିଟିଗୁଡ଼ିକର ବଜେଟ୍‌ରେ ପ୍ରାୟ ୫ କୋଟି ଟଙ୍କା ବୃଦ୍ଧି ହୋଇଥିବା ମଧ୍ୟ ଉଲ୍ଲେଖ ରହିଛି ।

ପ୍ରାୟ ୧୦୦ଟି ଟେଷ୍ଟ୍‌ ମ୍ୟାଚ୍‌ ଖେଳିଥିବା କିଛି ପୂର୍ବତନ କ୍ରିକେଟର୍‌ଙ୍କ ସହ ବିସିସିଆଇ ଯୋଗାଯୋଗ କରିଥିଲା । କିନ୍ତୁ ସେମାନେ ଏହି ପ୍ରସ୍ତାବ ଗ୍ରହଣ କରିନଥିବା ରିପୋର୍ଟରେ କୁହାଯାଇଛି । ନିକଟରେ ଚୟନ କମିଟି ପାଇଁ ନିଯୁକ୍ତି ପ୍ରକ୍ରିୟା ସମୟରେ ପ୍ରାର୍ଥୀମାନେ ବେତନକୁ ନେଇ ଆଲୋଚନା ମଧ୍ୟ କରିଥିଲେ ।

ଶିବସୁନ୍ଦର ଦାସଙ୍କ କାର୍ଯ୍ୟକାଳ ଉପରେ ନିଷ୍ପତ୍ତି ବାକି

ଅନ୍ୟପଟେ, ଚୟନକର୍ତ୍ତା ତଥା ଆଉ ଜଣେ ଓଡ଼ିଆ ଶିବସୁନ୍ଦର ଦାସଙ୍କ ଭବିଷ୍ୟତକୁ ନେଇ ମଧ୍ୟ ବିସିସିଆଇକୁ ନିଷ୍ପତ୍ତି ନେବାକୁ ପଡ଼ିବ । ଆସନ୍ତା ଡିସେମ୍ବରରେ ସେ ଏହି ପଦରେ ଚାରି ବର୍ଷ ପୂରଣ କରିବେ । ତେଣୁ ତାଙ୍କ କାର୍ଯ୍ୟକାଳ ବଢ଼ାଯିବ ନା ନୂଆ ବ୍ୟକ୍ତିଙ୍କୁ ସୁଯୋଗ ଦିଆଯିବ, ସେନେଇ ବୋର୍ଡ ବିଚାର କରିବ ।
ସୂତ୍ର ଅନୁଯାୟୀ, ଦିନିକିଆ ବିଶ୍ୱକପ୍‌ ପର୍ଯ୍ୟନ୍ତ ଶିବସୁନ୍ଦର ଦାସଙ୍କୁ ଦାୟିତ୍ୱରେ ରଖାଯିବାର ସମ୍ଭାବନା ରହିଛି । ତେବେ ଏ ସମ୍ପର୍କରେ ମଧ୍ୟ ଚୂଡ଼ାନ୍ତ ନିଷ୍ପତ୍ତି ହୋଇନାହିଁ ।