Pragyan Ojha Chief Selector / ଚିଫ୍ ସିଲେକ୍ଟର ରେସ୍‌ରେ ପ୍ରଜ୍ଞାନ ଓଝା ଆଗରେ ! ଅଗରକରଙ୍କ ସ୍ଥାନ ନେବେ ଏହି ଷ୍ଟାର୍...

ଭାରତୀୟ କ୍ରିକେଟ୍‌ରେ ଚୟନ ସମିତିକୁ ନେଇ ଏବେ ଚର୍ଚ୍ଚା ଜୋର୍ ଧରିଛି । ପୂର୍ବତନ ଭାରତୀୟ ସ୍ପିନର ତଥା ବର୍ତ୍ତମାନର ଚୟନ କମିଟି ସଦସ୍ୟ ପ୍ରଜ୍ଞାନ ଓଝା ଭାରତୀୟ ପୁରୁଷ କ୍ରିକେଟ୍ ଦଳର ମୁଖ୍ୟ ଚୟନକର୍ତ୍ତା ହେବା ଦୌଡ଼ରେ ଆଗରେ ଅଛନ୍ତି । ଅଜିତ ଅଗରକର ଏହି ପଦରୁ ହଟିବା ପରେ ଅନ୍ତରୀଣ ଭାବେ ଚୟନ ସମିତିର ଦାୟିତ୍ୱ ସମ୍ଭାଳୁଥିବା ଓଝାଙ୍କୁ ଏବେ ସ୍ଥାୟୀ ଅଧ୍ୟକ୍ଷ ଭାବେ ନିଯୁକ୍ତ କରାଯିବା ପ୍ରାୟ ନିଶ୍ଚିତ ବୋଲି ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି । ତେବେ ଏନେଇ ବିସିସିଆଇ ପକ୍ଷରୁ ଆନୁଷ୍ଠାନିକ ଘୋଷଣାକୁ ଅପେକ୍ଷା କରାଯାଇଛି ।

ଚୟନ ସମିତିରେ ସାମିଲ ହେବେ ରମେଶ ପୱାର

ପ୍ରଜ୍ଞାନ ଓଝାଙ୍କ ସହ ପୂର୍ବତନ ଭାରତୀୟ ସ୍ପିନର ରମେଶ ପୱାର ମଧ୍ୟ ପୁରୁଷ ଚୟନ ସମିତିରେ ସାମିଲ ହୋଇପାରନ୍ତି । ସେ ପଶ୍ଚିମାଞ୍ଚଳର ପ୍ରତିନିଧି ଭାବେ ଅଜିତ ଅଗରକରଙ୍କ ସ୍ଥାନ ନେବେ ବୋଲି ସୂତ୍ରରୁ ଜଣାପଡ଼ିଛି । ଅନ୍ୟ ସଦସ୍ୟଙ୍କ ମଧ୍ୟରେ ଶିବସୁନ୍ଦର ଦାସ, ଅଜୟ ରାତ୍ରା ଓ ଆର୍‌ପି ସିଂହ ରହିବେ ବୋଲି ରିପୋର୍ଟରେ କୁହାଯାଇଛି ।

ପ୍ରଜ୍ଞାନ ଓଝା ଓ ପୂର୍ବତନ ଭାରତୀୟ ୱିକେଟ୍‌କିପର ପାର୍ଥିବ ପଟେଲ ଅଗରକରଙ୍କ ସ୍ଥାନ ନେବା ପାଇଁ ପ୍ରମୁଖ ଦାବିଦାର ଥିଲେ । ହେଲେ ପାର୍ଥିବ ପଟେଲ ଏହି ପଦ ପାଇଁ ଆବେଦନ କରିନଥିବାରୁ ଓଝାଙ୍କ ପାଇଁ ରାସ୍ତା ସହଜ ହୋଇଥିବା କୁହାଯାଉଛି ।

ଭାରତ ପାଇଁ ୨୪ଟି ଟେଷ୍ଟ ମ୍ୟାଚ୍ ଖେଳିଥିବା ପ୍ରଜ୍ଞାନ ଓଝା ଦକ୍ଷିଣାଞ୍ଚଳର ପ୍ରତିନିଧି ଭାବେ ଚୟନ ସମିତିରେ ରହିଛନ୍ତି । ବର୍ତ୍ତମାନର ଅନ୍ୟ ଚୟନକର୍ତ୍ତାଙ୍କ ତୁଳନାରେ ତାଙ୍କର ଅଧିକ ଟେଷ୍ଟ ଅଭିଜ୍ଞତା ମଧ୍ୟ ତାଙ୍କ ଦାବିଦାରୀକୁ ମଜବୁତ କରୁଥିବା କୁହାଯାଉଛି। ଅନ୍ୟ ଦାବିଦାରଙ୍କ ମଧ୍ୟରେ କେବଳ ୱାସିମ ଜାଫର ୩୧ଟି ଟେଷ୍ଟ ମ୍ୟାଚ୍ ଖେଳି ଓଝାଙ୍କଠାରୁ ଆଗରେ ଅଛନ୍ତି।

ଜୁନିୟର ଚୟନ ସମିତିର ମୁଖ୍ୟ ହୋଇପାରନ୍ତି ଡୋଡା ଗଣେଶ

ଅନ୍ୟପକ୍ଷରେ ପୂର୍ବତନ ଭାରତୀୟ କ୍ରିକେଟର ଡୋଡା ଗଣେଶ ଜୁନିୟର ପୁରୁଷ ଚୟନ ସମିତିର ଅଧ୍ୟକ୍ଷ ହୋଇପାରନ୍ତି । ସେ ଭାରତ ପାଇଁ ଗୋଟିଏ ଟେଷ୍ଟ ଓ ଚାରିଟି ଦିନିକିଆ ମ୍ୟାଚ୍ ଖେଳିଛନ୍ତି । ଏହି ପଦ ପାଇଁ ପୂର୍ବତନ ଘରୋଇ କ୍ରିକେଟର ଅର୍ଜୁନ ଯାଦବ ମଧ୍ୟ ଦାବିଦାର ଥିବା ଜଣାପଡ଼ିଛି ।
ଜୁନିୟର ଚୟନ ସମିତିର ଅନ୍ୟ ସମ୍ଭାବ୍ୟ ସଦସ୍ୟଙ୍କ ମଧ୍ୟରେ ଜମ୍ମୁ-କାଶ୍ମୀରର ଅରୁଣ ଶର୍ମା, ଗୁଜରାଟର ଏଲ୍‌. ପୱାର, ଆସାମର ଦୀପ ବୋରା ଓ ରାଜସ୍ଥାନର ପଙ୍କଜ ସିଂହଙ୍କ ନାମ ରହିଛି ।

ନ୍ୟୁଜିଲାଣ୍ଡ ଗସ୍ତ ପାଇଁ ଭାରତୀୟ ଦଳ ଘୋଷଣା

ଏସବୁ ମଧ୍ୟରେ ବିସିସିଆଇ ଶୁକ୍ରବାର ନ୍ୟୁଜିଲାଣ୍ଡ ବିପକ୍ଷ ଦିନିକିଆ ଓ ଟେଷ୍ଟ ସିରିଜ୍ ପାଇଁ ଭାରତୀୟ ଦଳ ଘୋଷଣା କରିଛି । ଭାରତୀୟ ଦଳ ନ୍ୟୁଜିଲାଣ୍ଡ ଗସ୍ତରେ ପାଞ୍ଚଟି ଟି-୨୦, ପାଞ୍ଚଟି ଦିନିକିଆ ଓ ଦୁଇଟି ଟେଷ୍ଟ ମ୍ୟାଚ୍ ଖେଳିବ । ତେବେ ଟି-୨୦ ସିରିଜ୍ ପାଇଁ ଦଳ ପୂର୍ବରୁ ଘୋଷଣା ହୋଇସାରିଛି । ଦିନିକିଆ ସିରିଜ୍‌ର ପ୍ରଥମ ତିନୋଟି ମ୍ୟାଚ୍‌ରେ ଶୁବମନ ଗିଲ୍ ଭାରତୀୟ ଦଳର ନେତୃତ୍ୱ ନେବେ । ଶେଷ ଦୁଇଟି ମ୍ୟାଚ୍‌ରେ ଶ୍ରେୟସ ଆୟର ଅଧିନାୟକ ଦାୟିତ୍ୱ ସମ୍ଭାଳିବେ । ଟେଷ୍ଟ ସିରିଜ୍ ପାଇଁ ପ୍ରସ୍ତୁତି ଓ ବିଶ୍ରାମକୁ ଦୃଷ୍ଟିରେ ରଖି ଗିଲ୍ ଶେଷ ଦୁଇଟି ଦିନିକିଆରୁ ବାଦ୍ ପଡ଼ିବେ ବୋଲି ରିପୋର୍ଟରେ ଉଲ୍ଲେଖ ରହିଛି ।