Pragyan Ojha Chief Selector / ଓଡ଼ିଆ ପୁଅଙ୍କ ହାତରେ ଟିମ୍ ଇଣ୍ଡିଆର ଚୟନ ଦାୟିତ୍ୱ, ପ୍ରଜ୍ଞାନ ଓଝାଙ୍କୁ ମିଳିଲା ବଡ଼ ଦାୟିତ୍ୱ

ପୁଣି ଜଣେ ଓଡ଼ିଆଙ୍କୁ ବଡ଼ ଦାୟିତ୍ବ । ଓଡ଼ିଆ ପୁଅ ବାଛିବେ ଭାରତୀୟ ଦଳ । ଭାରତୀୟ କ୍ରିକେଟ ଦଳର ମୁଖ୍ୟ ଚୟନ କର୍ତ୍ତାଅଜିତ ଅଗରକରଙ୍କ କାର୍ଯ୍ୟକାଳ ଆଉ କିଛି ଦିନ ପରେ ଶେଷ ହେବ । ଆଉ ଏହାରି ମଧ୍ୟରେ ବିସିସିଆଇ ଏକ ବଡ଼ ପଦକ୍ଷେପ ନେଇଛି । ଭାରତୀୟ ଟିମ୍‌ର ନୂଆ ଚିଫ୍ ସିଲେକ୍ଟରଙ୍କୁ ନେଇ ଚର୍ଚ୍ଚା ଜୋର ଧରିଥିବା ବେଳେ ପୂର୍ବତନ ଭାରତୀୟ ସ୍ପିନର ତଥା ଓଡ଼ିଆ ପୁଅ ପ୍ରଜ୍ଞାନ ଓଝାଙ୍କୁ ମିଳିଛି ବଡ଼ ଦାୟିତ୍ୱ । ନୂଆ ଚିଫ୍ ସିଲେକ୍ଟର ନିଯୁକ୍ତ ହେବା ପର୍ଯ୍ୟନ୍ତ ୪ ଜଣିଆ ଚୟନ କମିଟିର ମୁଖ୍ୟ ଭାବେ ପ୍ରଜ୍ଞାନଙ୍କୁ ଦାୟିତ୍ୱ ମିଳିଛି । ତେବେ ଏହା କେବଳ ଅନ୍ତରୀଣ ଦାୟିତ୍ୱ ନା ଆଗକୁ ପ୍ରଜ୍ଞାନ ଓଝାଙ୍କୁ ମିଳିପାରେ ସ୍ଥାୟୀ ଚିଫ୍ ସିଲେକ୍ଟର ପଦ ?

ଭାରତୀୟ କ୍ରିକେଟ୍‌ର ଚୟନକର୍ତ୍ତା ଦଳରେ ଆସିପାରେ ବଡ଼ ପରିବର୍ତ୍ତନ । ମୁଖ୍ୟ ଚୟନକର୍ତ୍ତା ଅଜିତ ଅଗରକରଙ୍କ କାର୍ଯ୍ୟକାଳ ଅକ୍ଟୋବର ୪ ତାରିଖରେ ଶେଷ ହେବାକୁ ଥିବା ବେଳେ ନୂଆ ଚିଫ୍ ସିଲେକ୍ଟର ନିଯୁକ୍ତି ପାଇଁ BCCI ପକ୍ଷରୁ ପ୍ରକ୍ରିୟା ଆରମ୍ଭ ହୋଇଥିବା ଜଣାପଡ଼ିଛି । ଏହା ପୂର୍ବରୁ ଓଡ଼ିଆ ପୁଅ ପ୍ରଜ୍ଞାନ ଓଝାଙ୍କୁ ମିଳିଛି ବଡ଼ ଦାୟିତ୍ୱ ।

ରିପୋର୍ଟ ଅନୁଯାୟୀ, ନୂଆ ମୁଖ୍ୟ ଚୟନକର୍ତ୍ତା ନିଯୁକ୍ତ ହେବା ପର୍ଯ୍ୟନ୍ତ ପ୍ରଜ୍ଞାନ ଓଝା ୪ ଜଣିଆ ଚୟନ କମିଟିର ମୁଖ୍ୟ ଭାବେ ଦାୟିତ୍ୱ ତୁଲାଇବେ । ତାଙ୍କୁ ଅନ୍ତରୀଣ ଚିଫ୍ ସିଲେକ୍ଟର ଭାବେ ଦାୟିତ୍ୱ ଦିଆଯାଇଥିବା କୁହାଯାଉଛି । ଆଗାମୀ ଦିନରେ ତାଙ୍କୁ ସ୍ଥାୟୀ ଭାବେ ମୁଖ୍ୟ ଚୟନକର୍ତ୍ତା ମଧ୍ୟ କରାଯାଇପାରେ ବୋଲି ଚର୍ଚ୍ଚା ହେଉଛି ।

କାହିଁକି ପ୍ରଜ୍ଞାନ ଓଝାଙ୍କୁ ଦାୟିତ୍ୱ ?

ଭାରତୀୟ ସିନିୟର ଚୟନ କମିଟିରେ ପ୍ରଜ୍ଞାନ ଓଝା ସବୁଠାରୁ ଅଭିଜ୍ଞ ଟେଷ୍ଟ କ୍ରିକେଟର୍‌ ଭାବେ ରହିଛନ୍ତି । ସେ ଭାରତ ପାଇଁ ୨୪ଟି ଟେଷ୍ଟ ମ୍ୟାଚ୍ ଖେଳିଛନ୍ତି । ଅନ୍ୟପଟେ ଚୟନ କମିଟିରେ ଥିବା ଆଉ ଜଣେ ଓଡ଼ିଆ ପୁଅ ଶିବସୁନ୍ଦର ଦାସ ୨୩ଟି, ଆରପି ସିଂହ ୧୪ଟି ଏବଂ ଅଜୟ ରାତ୍ରା ୬ଟି ଟେଷ୍ଟ ମ୍ୟାଚ୍ ଖେଳିଛନ୍ତି । ଅଭିଜ୍ଞତା ଦୃଷ୍ଟିରୁ ପ୍ରଜ୍ଞାନ ଓଝାଙ୍କୁ ଚୟନ କମିଟିର ଅନ୍ତରୀଣ ମୁଖ୍ୟ ଭାବେ ଦାୟିତ୍ୱ ଦିଆଯାଇଥିବା ଜଣାପଡ଼ିଛି ।

ଗୁଆହାଟୀରେ ହେଲା ଚୟନ କମିଟି ବୈଠକ

ଗୁଆହାଟୀରେ ଭାରତର ପରବର୍ତ୍ତୀ ଦିନିକିଆ ମ୍ୟାଚ୍ ପୂର୍ବରୁ ଚୟନ କମିଟିର ବୈଠକ ହୋଇଥିଲା । ଏହି ବୈଠକରେ ଅଜିତ ଅଗରକର ଉପସ୍ଥିତ ନଥିଲେ । ଏହି ସମୟରେ BCCI ନୂଆ ଚୟନ କମିଟି ଅଧ୍ୟକ୍ଷ ଚୟନ ପୂର୍ବରୁ ଅନ୍ତରୀଣ ବ୍ୟବସ୍ଥା କରିଥିବା ରିପୋର୍ଟ ପ୍ରକାଶ ପାଇଛି । ବୈଠକରେ BCCI ସଚିବ ଦେବଜିତ ସାଇକିଆ ଏବଂ ଭାରତୀୟ ଦଳର ମୁଖ୍ୟ କୋଚ୍ ଗୌତମ ଗମ୍ଭୀର ମଧ୍ୟ ଉପସ୍ଥିତ ଥିଲେ । ନ୍ୟୁଜିଲାଣ୍ଡ ଗସ୍ତ ପାଇଁ ଭାରତୀୟ ଦଳ ଚୟନ ସମ୍ପର୍କରେ କିଛି ବିଷୟ ନେଇ ଆଲୋଚନା ହୋଇଥିବା ରିପୋର୍ଟରେ କୁହାଯାଇଛି ।

ନ୍ୟୁଜିଲାଣ୍ଡ ଗସ୍ତ ପାଇଁ ହେବ ବଡ଼ ଚୟନ

ଭାରତୀୟ ଦଳ ୨୨ ଅକ୍ଟୋବରରୁ ୧ ଡିସେମ୍ବର ୨୦୨୬ ମଧ୍ୟରେ ନ୍ୟୁଜିଲାଣ୍ଡ ବିପକ୍ଷରେ ୫ଟି T20I, ୫ଟି ODI ଏବଂ ୨ଟି ଟେଷ୍ଟ ମ୍ୟାଚ୍ ଖେଳିବାକୁ ଥିବା ସୂଚନା ରହିଛି । ତେବେ ଏହି ଗସ୍ତ ପାଇଁ ଏପର୍ଯ୍ୟନ୍ତ ପୂର୍ଣ୍ଣାଙ୍ଗ ଦଳ ଚୟନ ହୋଇନାହିଁ । ପରବର୍ତ୍ତୀ ସମୟରେ ଏନେଇ ସ୍ୱତନ୍ତ୍ର ବୈଠକ ହେବ । ଏହା ମଧ୍ୟରେ ଚୟନକର୍ତ୍ତାମାନେ କିଛି ଖେଳାଳିଙ୍କ ନାମ ନେଇ ପ୍ରାଥମିକ ଆଲୋଚନା କରିଥିବା ଜଣାପଡ଼ିଛି । ଏଥିସହ ହାର୍ଦ୍ଦିକ ପାଣ୍ଡ୍ୟାଙ୍କ ବିକଳ୍ପ ଖେଳାଳିଙ୍କୁ ନେଇ ମଧ୍ୟ ଚୟନକର୍ତ୍ତାମାନେ ବିଚାର କରିଥିବା ରିପୋର୍ଟରେ ଦାବି କରାଯାଇଛି ।

ଏବେ ସମସ୍ତଙ୍କ ନଜର ରହିଛି BCCI କାହାକୁ ସ୍ଥାୟୀ ଭାବେ ଭାରତୀୟ ସିନିୟର ଦଳର ନୂଆ ମୁଖ୍ୟ ଚୟନକର୍ତ୍ତା ଭାବେ ନିଯୁକ୍ତ କରୁଛି ଏବଂ ପ୍ରଜ୍ଞାନ ଓଝାଙ୍କ ଭୂମିକା ଆଗକୁ କିଭଳି ରହୁଛି ।