Argus News - IPL ଇତିହାସର ସବୁଠାରୁ ବଡ଼ ଡିଲ୍‌, ୧୫,୨୮୬ କୋଟିରେ ବିକ୍ରି ହେଲା ରାଜସ୍ଥାନ ରୟାଲ୍ସ

ମାର୍ଚ୍ଚ ୨୮ରୁ ଆରମ୍ଭ ହେବାକୁ ଯାଉଛି ଫଟାଫଟ୍‌ କ୍ରିକେଟ୍‌ର ମହାକୁମ୍ଭ ଆଇପିଏଲର ସିଜିନ୍‌-୧୯ । ଏଥିପାଇଁ ସମସ୍ତ ଫ୍ରାଞ୍ଚାଇଜ୍‌ ଜୋରଦାର ଅଭ୍ୟାସ ଜାରି ରଖିଛନ୍ତି । କିନ୍ତୁ ଏସବୁ ମଧ୍ୟରେ ଆଇପିଏଲର ଏକ ଫ୍ରାଞ୍ଚାଇଜ୍‌କୁ ନେଇ ବଡ଼ ଖବର ସାମ୍ନାକୁ ଆସିଛି ।

ଆଇପିଏଲ ଫ୍ରାଞ୍ଚାଇଜ୍ ରାଜସ୍ଥାନ ରୟାଲ୍ସର ମାଲିକାନା ବିକ୍ରି ଏବେ ଶେଷ ହୋଇଛି । ଆମେରିକୀୟ ବ୍ୟବସାୟୀ କାଲ୍ ସୋମାନି ଏବେ ଫ୍ରାଞ୍ଚାଇଜ୍ ଅଧିଗ୍ରହଣ କରିଛନ୍ତି । ରାଜସ୍ଥାନ ରୟାଲ୍ସ ଦଳକୁ ୧.୬୩ ବିଲିୟନ ଆମେରିକୀୟ ଡଲାରରେ ବିକ୍ରି କରାଯାଇଛି । ଆମେରିକୀୟ ବ୍ୟବସାୟୀ କାଲ୍ ସୋମାନୀଙ୍କ ନେତୃତ୍ୱରେ ୧୫,୨୮୬ କୋଟିରେ RR ଫ୍ରାଞ୍ଚାଇଜ୍ କିଣିଛି । କାଲ୍ ସୋମାନୀଙ୍କ ପାଖରେ IntraEdge, Academian ଏବଂ Truyo.AI ଭଳି କମ୍ପାନୀ ମଧ୍ୟ ଅଛି । ରିପୋର୍ଟ ଅନୁଯାୟୀ ସେ ରାଜସ୍ଥାନ ରୟାଲ୍ସରେ ସମ୍ପୂର୍ଣ୍ଣ ୧୦୦ ପ୍ରତିଶତ ଅଂଶଧନ ହାସଲ କରିଛନ୍ତି ।

ଏହା IPL ଇତିହାସର ସବୁଠାରୁ ବଡ଼ ଚୁକ୍ତି । ଯାହା ରାଜସ୍ଥାନ ରୟାଲ୍ସକୁ ଇଣ୍ଡିଆନ୍ ପ୍ରିମିୟର ଲିଗର ସବୁଠାରୁ ମହଙ୍ଗା ଦଳ କରିଛି । IPL ୨୦୨୬ ପରେ ରାଜସ୍ଥାନ ଦଳକୁ ନୂତନ ମାଲିକମାନେ ପରିଚାଳିତ କରିବେ । କାଲ୍ ସୋମାନୀ ୨୦୨୧ ମସିହାରୁ ରାଜସ୍ଥାନ ରୟାଲ୍ସର ଅଂଶୀଦାର ଅଛନ୍ତି ଏବଂ ଏହି ଚୁକ୍ତି ସମ୍ପର୍କରେ ଗତ ଛଅ ମାସ ଧରି ଆଲୋଚନା ଚାଲିଛି ।

ରାଜସ୍ଥାନ ରୟାଲ୍ସ ଦଳ ସମ୍ପର୍କରେ ଯଦି କହିବା ତେବେ ଆଇପିଏଲ ୨୦୨୬ରେ ରିୟାନ୍ ପରାଗ ଅଧିନାୟକ ହେବେ । ଗତ ସିଜିନର ଅଧିନାୟକ ସଞ୍ଜୁ ସାମସନ୍ ଏବେ ଚେନ୍ନାଇ ସୁପର କିଙ୍ଗସକୁ ଚାଲିଯାଇଛନ୍ତି । ସେହିପରି ରବୀନ୍ଦ୍ର ଜାଡେଜା ଟ୍ରେଡ୍‌ ଡିଲ୍‌ ମାଧ୍ୟମରେ ରାଜସ୍ଥାନରେ ସାମିଲ ହୋଇଛନ୍ତି ।

ଅନ୍ୟପକ୍ଷରେ ରାଜସ୍ଥାନ ପରେ ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋରର ବିକ୍ରି ବିଷୟରେ ମଧ୍ୟ ଆଲୋଚନା ଜୋର ଧରିଛି । ଯେହେତୁ ରାଜସ୍ଥାନ ରୟାଲ୍ସର ବିକ୍ରି ୧୫ ହଜାର କୋଟିରୁ ଅଧିକ ମୂଲ୍ୟରେ ହୋଇଛି ତେଣୁ ଆଶା କରାଯାଉଛି RCB ସହଜରେ ୨ ବିଲିୟନ୍‌ ଡଲାର ଅତିକ୍ରମ କରିବ ।

ଏଥିସହ ପଢ଼ନ୍ତୁ: IPL 2026 ପୂର୍ବରୁ ରିଙ୍କୁ ସିଂହଙ୍କୁ ମିଳିବ ବଡ଼ ଉପହାର...ୟୁପିରେ ହେବେ ବଡ଼ ଅଧିକାରୀ