୨୦୨୪ ଟି-୨୦ ବିଶ୍ୱକପ୍ ଜିତିବା ପରେ, ରୋହିତ ଶର୍ମା ଏବଂ ବିରାଟ କୋହଲି ହଠାତ୍ ଏମିତି ଏକ ନିଷ୍ପତ୍ତି ନେଇଥିଲେ ଯାହା କୌଣସି କ୍ରିକେଟ୍ ଫ୍ୟାନ୍ସ ଆଶା କରିନଥିଲେ । ବିଶ୍ୱକପ୍ ଟ୍ରଫି ଉଠାଇବା ସହ ରୋହିତ ଏବଂ ବିରାଟ ଟି-୨୦ ଫର୍ମାଟରୁ ଅବସର ଘୋଷଣା କରିଥିଲେ । ପରେ ଟିମ୍ ଇଣ୍ଡିଆ ବର୍ଡର-ଗାଭାସ୍କର ଟ୍ରଫି ହାରିବା ପରେ, ରୋହିତ ଶର୍ମା ମେ' ୭ରେ ଟେଷ୍ଟ କ୍ରିକେଟରୁ ଅବସର ନେଇଥିଲେ । ଏହାର ୫ ଦିନ ପରେ ଅର୍ଥାତ ମେ' ୧୨ରେ ବିରାଟ କୋହଲି ମଧ୍ୟ ଟେଷ୍ଟ ଫର୍ମାଟରୁ ଅବସର ଘୋଷଣା କରିଥିଲେ ।

ଆଉ ଏବେ ଏହି ଦୁଇ ଷ୍ଟାର ଖେଳାଳି ଦିନିକିଆରୁ ଅବସର ନେବେ ବୋଲି କଳ୍ପନାଜଳ୍ପନା ଚାଲିଛି । ଏ ସମ୍ପର୍କରେ, ବିସିସିଆଇ ଉପାଧ୍ୟକ୍ଷ ରାଜୀବ ଶୁକ୍ଲା ପ୍ରଥମ ଥର ପାଇଁ ନିଜ ବୟାନ ରଖିଛନ୍ତି । ଏହା ସହ ବିରାଟ ଏବଂ ରୋହିତ ଦିନିକିଆ କ୍ରିକେଟରୁ ବିଦାୟ ନେବା ବିଷୟରେ ମଧ୍ୟ ମୁହଁ ଖୋଲିଛନ୍ତି ।

ୟୁପି ଟି୨୦ ଲିଗର ୟୁଟ୍ୟୁବ୍ ଚ୍ୟାନେଲରେ ରାଜୀବ ଶୁକ୍ଲାଙ୍କ ସହିତ ଏକ ପଡକାଷ୍ଟ ସେୟାର କରାଯାଇଛି । ଏଥିରେ ବିସିସିଆଇ ଉପାଧ୍ୟକ୍ଷ ରାଜୀବ ଶୁକ୍ଲାଙ୍କୁ ପଚରାଯାଇଥିଲା ଯେ ରୋହିତ ଶର୍ମା ଏବଂ ବିରାଟ କୋହଲିଙ୍କୁ ସଚିନ ତେନ୍ଦୁଲକରଙ୍କ ପରି ବିଦାୟ ମିଳିବ କି? ଏହି ପ୍ରଶ୍ନର ଉତ୍ତରରେ ରାଜୀବ ଶୁକ୍ଲା କହିଥିଲେ ଯେ ସେମାନେ କେବେ ଅବସର ନେଲେ । ରୋହିତ ଶର୍ମା ଏବଂ ବିରାଟ କୋହଲି ଉଭୟ ଏବେ ଦିନିକିଆ ଖେଳୁଛନ୍ତି।
ରାଜୀବ ଶୁକ୍ଲା ଆହୁରି କହିଛନ୍ତି ଯେ 'ବିସିସିଆଇର ଏକ ସ୍ପଷ୍ଟ ନୀତି ଅଛି, ଆମେ କୌଣସି ଖେଳାଳିଙ୍କୁ ଅବସର ନେବାକୁ କହୁନାହୁଁ, ଖେଳାଳିଙ୍କୁ ନିଜର ନିଷ୍ପତ୍ତି ନେବାକୁ ପଡିବ ଏବଂ ସେ ଯାହା ନିଷ୍ପତ୍ତି ନେବେ, ଆମେ ତାହାକୁ ସମ୍ମାନ କରୁଛୁ'।

ଏହାପରେ ରାଜୀବ ଶୁକ୍ଲାଙ୍କୁ କୁହାଯାଇଥିଲା ଯେ ଯେତେବେଳେ ରୋହିତ ଏବଂ ବିରାଟ ଅବସର ନେବେ, ବିସିସିଆଇ ସେମାନଙ୍କୁ ଏକ ଭଲ ବିଦାୟ ଦେବା ଉଚିତ । ରାଜୀବ ଶୁକ୍ଲା କହିଥିଲେ ଯେ ବିରାଟ ବହୁତ ଫିଟ୍ ଅଛନ୍ତି, ରୋହିତ ବହୁତ ଭଲ ଖେଳୁଛନ୍ତି, ଆପଣମାନେ ଏବେଠାରୁ ବିଦାୟ ବିଷୟରେ କାହିଁକି ଚିନ୍ତିତ ହେଉଛନ୍ତି । ରାଜୀବ ଶୁକ୍ଲାଙ୍କ ଏହି ବୟାନ ଏହା ସ୍ପଷ୍ଟ କରୁଛି ଯେ ବର୍ତ୍ତମାନ ସମୟରେ ରୋହିତ ଶର୍ମା ଓ ବିରାଟ କୋହଲି ଦିନିକିଆ କ୍ରିକେଟରୁ ଅବସର ନେଉନାହାନ୍ତି ।