Argus News - ଭାଙ୍ଗିଲା ଯୁବରାଜ ସିଂଙ୍କ ମହାରେକର୍ଡ, ୧୧ ବଲରେ ଅର୍ଦ୍ଧଶତକ କରି ଇତିହାସ ରଚିଲେ ଆକାଶ

ଇତିହାସ ରଚିଛନ୍ତି ମେଘାଳୟ କ୍ରିକେଟର ଆକାଶ କୁମାର ଚୌଧୁରୀ । ଅରୁଣାଚଳ ପ୍ରଦେଶ ବିପକ୍ଷରେ ରଣଜୀ ଟ୍ରଫି ପ୍ଲେଟ୍ ଗ୍ରୁପ୍ ମ୍ୟାଚ୍ ସମୟରେ ସେ ପ୍ରଥମ ଶ୍ରେଣୀ କ୍ରିକେଟ୍ ଏବଂ ରଣଜୀ ଟ୍ରଫି ଇତିହାସରେ ଦ୍ରୁତତମ ଅର୍ଦ୍ଧଶତକ ହାସଲ କରିଛନ୍ତି । ସୁରଟର ପିଠାୱାଲା ଷ୍ଟାଡିୟମରେ ଖେଳାଯାଇଥିବା ମ୍ୟାଚ୍‌ରେ ଆକାଶ ମାତ୍ର ୧୧ ବଲରେ ଅର୍ଦ୍ଧଶତକ ପୂରଣ କରିଛନ୍ତି । ଆକାଶଙ୍କ ଏହି ଧୁଆଁଧାର ଇନିଂସ ପାଇଁ ମେଘାଳୟ ୬୨୮/୬ରେ ସେମାନଙ୍କର ପ୍ରଥମ ପାଳି ଘୋଷଣା କରିଛି ।

ଆକାଶ କୁମାର ଚୌଧୁରୀ ୱେନ୍ ହ୍ୱାଇଟଙ୍କ ପୂର୍ବ ରେକର୍ଡ ମଧ୍ୟ ଭାଙ୍ଗିଛନ୍ତି । ୨୦୧୨ରେ ଏସେକ୍ସ ବିପକ୍ଷରେ ଲିସେଷ୍ଟରଶାୟାର ପାଇଁ ଖେଳୁଥିବା ସମୟରେ ହ୍ୱାଇଟ୍ ୧୨ ବଲରେ ତାଙ୍କର ଅର୍ଦ୍ଧଶତକ ହାସଲ କରିଥିଲେ । ଆକାଶ ୧୪ ବଲରେ ଅପରାଜିତ ୫୦ ରନ୍ କରିଥିଲେ । ଯେଉଁଥିରେ ଆଠଟି ଛକା ସାମିଲ ଥିଲା ।

🚨 Record Alert 🚨

First player to hit eight consecutive sixes in first-class cricket ✅

Fastest fifty, off just 11 balls, in first-class cricket ✅

Meghalaya's Akash Kumar etched his name in the record books with a blistering knock of 50*(14) in the Plate Group match against… pic.twitter.com/dJbu8BVhb1

— BCCI Domestic (@BCCIdomestic) November 9, 2025

ତେବେ ଆକାଶଙ୍କ ଏହି ଇନିଂସରେ ୧୨୬ତମ ଓଭରରେ ବୋଲିଂ କରୁଥିବା ଅରୁଣାଚଳ ପ୍ରଦେଶର ଲିମାର ଡାବିଙ୍କୁ ୬ଟି ଛକା ମାରିଥିଲେ । ତା’ପର ଓଭରରେ ସେ ପରବର୍ତ୍ତୀ ଦୁଇଟି ବଲରେ ଛକା ମାରିଥିଲେ । ଆକାଶ ହେଉଛନ୍ତି ପ୍ରଥମ କ୍ରିକେଟର, ଯିଏ ପ୍ରଥମ ଶ୍ରେଣୀ ମ୍ୟାଚ୍‌ରେ ଲଗାତାର ଆଠ ବଲରେ ଛକା ମାରିଛନ୍ତି । ତେବେ ଏହା ପୂର୍ବରୁ ଇଣ୍ଟରନ୍ୟାସନାଲ କ୍ରିକେଟରେ ଭାରତୀୟ ଦଳର ପୂର୍ବତନ ଷ୍ଟାର କ୍ରିକେଟର ଯୁବରଜ ସିଂ ଇଂଲଣ୍ଡ ବିପକ୍ଷରେ ୧୨ ବଲ୍‌ରେ ଅର୍ଦ୍ଧଶତକ ହାସଲ କରିଥିଲେ । ସେ ମଧ୍ୟ ଇଂଲଣ୍ଡର ଦ୍ରୁତ ବୋଲର ଷ୍ଟୁଆର୍ଟ ବ୍ରଡ୍‌ଙ୍କୁ ୬ ବଲ୍‌ରେ ୬ ଛକା ମାରିଥିଲେ ।

ରଣଜୀ ଟ୍ରଫି ଇତିହାସରେ ଏହା ଦ୍ୱିତୀୟ ଥର ଯେ କୌଣସି ଖେଳାଳି ଗୋଟିଏ ଓଭରରେ ଲଗାତାର ଛଅଟି ଛକା ମାରିଛନ୍ତି। ପୂର୍ବରୁ ଏହି ରେକର୍ଡ ରବି ଶାସ୍ତ୍ରୀଙ୍କ ନାଁରେ ଥିଲା । ସେ ୧୯୮୪-୮୫ରେ ତିଲକ ରାଜଙ୍କ ବିପକ୍ଷରେ ଏହି ରେକର୍ଡ ନିଜ ନାଁରେ କରିଥିଲେ ।

ଆକାଶ କୁମାର ଚୌଧୁରୀ ଏପର୍ଯ୍ୟନ୍ତ ୩୧ ପ୍ରଥମ ଶ୍ରେଣୀ, ୨୮ ଲିଷ୍ଟ ଏ ଏବଂ ୩୦ ଟି-୨୦ ମ୍ୟାଚ୍ ଖେଳିଛନ୍ତି। ଆକାଶ ପ୍ରଥମ ଶ୍ରେଣୀ କ୍ରିକେଟରେ ୫୫୩ ରନ କରିଛନ୍ତି, ଯେଉଁଥିରେ ତିନୋଟି ଅର୍ଦ୍ଧଶତକ ମଧ୍ୟ ରହିଛି । ସେ ପ୍ରଥମ ଶ୍ରେଣୀ କ୍ରିକେଟରେ ବୋଲିଂରେ ମଧ୍ୟ ଚମତ୍କାର ପ୍ରଦର୍ଶନ କରି ୮୭ ଓ୍ବିକେଟ୍‌ ହାସଲ କରିଛନ୍ତି । ସେହିପରି ଆକାଶ କୁମାର ଚୌଧୁରୀ ଲିଷ୍ଟ ଏ କ୍ରିକେଟରେ ୨୦୩ ରନ୍ ଏବଂ ୩୭ ୱିକେଟ୍ ହାସଲ କରିଛନ୍ତି । ଟି-୨୦ ମ୍ୟାଚରେ ଆକାଶ ୧୦୭ ରନ୍‌ ଓ ୨୮ ଓ୍ବିକେଟ୍‌ ନିଜ ନାଁରେ କରିଛନ୍ତି ।