RCB Home Matches / RCB ପାଇଁ ଖୁସି ଖବର, ଏମ୍‌ ଚିନ୍ନାସ୍ୱାମୀରେ ପୁଣି ମ୍ୟାଚ୍ ଆୟୋଜନକୁ ମିଳିଲା ଅନୁମତି

IPL ୨୦୨୬ ପୂର୍ବରୁ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଦଳ ପାଇଁ ଖୁସି ଖବର । କର୍ଣ୍ଣାଟକ ସରକାର ଏମ୍‌ ଚିନ୍ନାସ୍ୱାମୀ ଷ୍ଟାଡିୟମରେ ମ୍ୟାଚ୍ ଆୟୋଜନ କରିବାକୁ ଅନୁମତି ପ୍ରଦାନ କରିଛନ୍ତି । ୧୮ ବର୍ଷ ପରେ ଗତ ବର୍ଷ ଆଇପିଏଲରେ ଚମ୍ପିଆନ୍‌ ହୋଇଥିଲା RCB । ଆଉ ଏହା ପରେ ଏମ୍‌ ଚିନ୍ନାସ୍ୱାମୀ ଷ୍ଟାଡିୟମରେ ସେମାନେ ତାଙ୍କର ବିଜୟ ଉତ୍ସବ ପାଳନ କରିଥିଲା । କିନ୍ତୁ ଭିତରେ ବିଜୟ ଉତ୍ସବ ପାଳନ ହେଉଥିବା ବେଳେ ଷ୍ଟାଡିୟମ ବାହାରେ ଦଳଚକାଟା ହୋଇ ଅନେକ ଲୋକଙ୍କ ମୃତ୍ୟୁ ହୋଇଥିଲା । ଯାହାଫଳରେ ଏମ୍‌ ଚିନ୍ନାସ୍ବାମୀ ଷ୍ଟାଡିୟମରେ ମ୍ୟାଚ୍‌ ଆୟୋଜନ ଉପରେ ପ୍ରତିବନ୍ଧକ ଲଗାଯାଇଥିଲା ।

ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ, ନବନିର୍ବାଚିତ KSCA ମୁଖ୍ୟ ଭେଙ୍କଟେଶ ପ୍ରସାଦ ନିର୍ବାଚନ ଜିତିବାର ଗୋଟିଏ ସପ୍ତାହ ପରେ କର୍ଣ୍ଣାଟକ ସରକାରଙ୍କଠାରୁ ମ୍ୟାଚ୍ ଆୟୋଜନ ପାଇଁ ଅନୁମୋଦନ ପାଇଥିଲେ । ଏହା ଏମ୍‌ ଚିନ୍ନାସ୍ୱାମୀ ଷ୍ଟାଡିୟମକୁ BCCIର ରାଡାରକୁ ଫେରିବା ପାଇଁ ପଥ ପରିଷ୍କାର କରିଛି । ଏହା ମଧ୍ୟ କୁହାଯାଉଛି ଯେ BCCIକୁ ମଧ୍ୟ ସାମ୍ପ୍ରତିକ ଘଟଣାବଳୀ ବିଷୟରେ ଅବଗତ କରାଯାଇଛି ।

କ’ଣ ବିରାଟ କୋହଲି IPL ୨୦୨୬ ପୂର୍ବରୁ ଚିନ୍ନାସ୍ୱାମୀ ଷ୍ଟାଡିୟମରେ ଖେଳିବେ ?

ରିପୋର୍ଟ ଅନୁଯାୟୀ, ଏହା ସ୍ପଷ୍ଟ ଯେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ୨୦୨୬ରେ ଏମ୍‌ ଚିନ୍ନାସ୍ୱାମୀ ଷ୍ଟାଡିୟମରେ ସେମାନଙ୍କର ଘରୋଇ ମ୍ୟାଚ୍ ଖେଳିବ । କିନ୍ତୁ ଲିଗ୍ ଆରମ୍ଭ ହେବା ପୂର୍ବରୁ ବିରାଟ କୋହଲି ଚିନ୍ନାସ୍ବାମୀରେ ଖେଳୁଥିବାର ନଜର ଆସିପାରନ୍ତି । ଦିଲ୍ଲୀ ଏଠାରେ ବିଜୟ ହଜାରେ ଟ୍ରଫିରେ ଖେଳିପାରେ । ଆଉ ବିରାଟ କୋହଲି ଚଳିତ ବର୍ଷ ଦିଲ୍ଲୀ ପାଇଁ ବିଜୟ ହଜାରେ ଟ୍ରଫି ଖେଳିବେ ବୋଲି ଘୋଷଣା କରିଛନ୍ତି । ତେଣୁ ଆଇପିଏଲ ପୂର୍ବରୁ ଚିନ୍ନାସ୍ବାମୀରେ ବିରାଟ ଖେଳିପାରନ୍ତି ।

ରିପୋର୍ଟ ଅନୁଯାୟୀ, ସୁରକ୍ଷା ଏବଂ ଲଜିଷ୍ଟିକ୍ ସମସ୍ୟା ଯୋଗୁଁ କର୍ଣ୍ଣାଟକ ରାଜ୍ୟ କ୍ରିକେଟ୍ ସଂଘ ଦିଲ୍ଲୀର ବିଜୟ ହଜାରେ ଟ୍ରଫି ମ୍ୟାଚ୍‌ଗୁଡ଼ିକୁ ଅଲୁରରୁ ସ୍ଥାନାନ୍ତର କରିବାକୁ ବିଚାର କରୁଛି । ବର୍ତ୍ତମାନର ସୂଚନା ଅନୁଯାୟୀ ବିରାଟ କୋହଲି ଏବଂ ଋଷଭ ପନ୍ତଙ୍କୁ ଦିଲ୍ଲୀ ଦଳରେ ସାମିଲ କରାଯାଇଛି । ଉଭୟ ପ୍ରଥମ ତିନୋଟି ମ୍ୟାଚ୍‌ ପାଇଁ ଉପଲବ୍ଧ ହେବେ ବୋଲି ଆଶା କରାଯାଉଛି ।

ବିଜୟ ହଜାରେ ଟ୍ରଫିରେ ପ୍ରଶଂସକମାନଙ୍କୁ ପ୍ରବେଶ ଅନୁମତି ଦିଆଯିବ

ରିପୋର୍ଟ ଅନୁଯାୟୀ, KSCA ବିରାଟ କୋହଲି ଏବଂ ଋଷଭ ପନ୍ତ ଯେଉଁ ମ୍ୟାଚ୍‌ଗୁଡ଼ିକରେ ଖେଳିବେ ସେଗୁଡ଼ିକ ପାଇଁ କିଛି ଷ୍ଟାଣ୍ଡ୍ ଖୋଲାଯିବା ବିଷୟରେ ବିଚାର କରୁଛି । KSCA ୨ ହଜାରରୁ ୩ ହଜାର ଦର୍ଶକଙ୍କ ପାଇଁ ବ୍ୟବସ୍ଥା କରୁଛି । ଏହି ବର୍ଷ ଆରମ୍ଭରେ ବିରାଟ କୋହଲି ରଣଜୀ ଟ୍ରଫି ମ୍ୟାଚ୍ ଖେଳିବା ସମୟରେ ଦିଲ୍ଲୀର ଅରୁଣ ଜେଟଲି ଷ୍ଟାଡିୟମ୍ ବାହାରେ ବହୁ ସଂଖ୍ୟକ ପ୍ରଶଂସକଙ୍କ ଭିଡ଼ ଜମିଥିଲା ।