ଟିମ୍ ଇଣ୍ଡିଆର ଷ୍ଟାର କ୍ରିକେଟର ରିଙ୍କୁ ସିଂଙ୍କୁ ମିଳିଛି ଅଣ୍ଡର ଓ୍ବାର୍ଲ୍ଡର ଧମକ । ୫ କୋଟି ଟଙ୍କା ଦେବାକୁ ରିଙ୍କୁଙ୍କୁ ଅଣ୍ଡର ଓ୍ବାର୍ଲ୍ଡ ପକ୍ଷରୁ ଧମକ ମିଳିଛି । ଏନେଇ ମୁମ୍ବାଇ କ୍ରାଇମବ୍ରାଞ୍ଚ ପକ୍ଷରୁ ସୂଚନା ମିଳିଛି । କ୍ରାଇମବ୍ରାଞ୍ଚ ପକ୍ଷରୁ କୁହାଯାଇଛି ଯେ, ଏହି ଧମକ ଅନ୍ୟ କେହି ନୁହେଁ ବରଂ 'ଡି କମ୍ପାନୀ' ନାମରେ ପରିଚିତ ପଳାତକ ଗ୍ୟାଙ୍ଗଷ୍ଟର ଦାଉଦ ଇବ୍ରାହିମର ଗ୍ୟାଙ୍ଗ ଦ୍ୱାରା ଦିଆଯାଇଥିଲା। ସୂଚନା ଅନୁଯାୟୀ, ଫେବୃଆରୀ ଏବଂ ଏପ୍ରିଲ ୨୦୨୫ ମଧ୍ୟରେ ରିଙ୍କୁ ସିଂହଙ୍କ ପ୍ରମୋସନାଲ୍ ଟିମ୍‌କୁ ତିନୋଟି ପୃଥକ ଧମକପୂର୍ଣ୍ଣ ବାର୍ତ୍ତା ପଠାଯାଇଥିଲା ।

ଦିବଂଗତ ଏନସିପି ନେତା ଏବଂ ପୂର୍ବତନ ମନ୍ତ୍ରୀ ବାବା ସିଦ୍ଦିକୀଙ୍କ ପୁଅ ଜିଶାନ ସିଦ୍ଦିକୀଙ୍କୁ ଧମକ ଦେବା ଅଭିଯୋଗରେ ଗିରଫ ହୋଇଥିବା ଅଭିଯୁକ୍ତ ମହମ୍ମଦ ଦିଲଶାଦ ନୌଶାଦ ଭାରତୀୟ କ୍ରିକେଟର ରିଙ୍କୁ ସିଂହଙ୍କଠାରୁ ମଧ୍ୟ ୧୦ କୋଟି ଟଙ୍କା ଦାବି କରିଥିଲେ ।

ଅଧିକ ପଢ଼ନ୍ତୁ: 'ଅଦୃଶ୍ୟ ଟ୍ରଫି' ସହ ସେଲିବ୍ରେସନ୍ କରିବାକୁ କହିଥିଲେ କେଉଁ ଖେଳାଳି, ଖୁଲାସା କଲେ ବରୁଣ

ରିଙ୍କୁ ନୁହେଁ, ବରଂ ତାଙ୍କ ଟିମ୍‌କୁ ଟାର୍ଗେଟ କରାଯାଇଥିଲା

ଏହି ଧମକପୂର୍ଣ୍ଣ ବାର୍ତ୍ତାଗୁଡ଼ିକ ସିଧାସଳଖ ରିଙ୍କୁ ସିଂହଙ୍କୁ ନୁହେଁ, ବରଂ ତାଙ୍କ ପ୍ରମୋସନାଲ୍ ଟିମ୍‌କୁ ପଠାଯାଇଥିଲା। କ୍ରାଇମବ୍ରାଞ୍ଚ କହିଛି ଯେ ଏହି ମାମଲା ଏକ ବଡ଼ ରାକେଟ ସହିତ ଜଡିତ । କାରଣ ପୂର୍ବରୁ ଜିଶାନ୍ ସିଦ୍ଦିକି ମଧ୍ୟ ସମାନ ଧମକପୂର୍ଣ୍ଣ ଇମେଲ୍ ପାଇଥିଲେ । ତାଙ୍କ ପିତା ଏବଂ ଏନସିପି ନେତା ବାବା ସିଦ୍ଦିକିଙ୍କ ହତ୍ୟା ପରେ ଜିଶାନ୍ ସିଦ୍ଦିକିଙ୍କୁ ୧୦ କୋଟି ଟଙ୍କା ଦେବା ପାଇଁ ଧମକ ମିଳିଥିଲା । ଏହି ମାମଲାରେ, ଅଭିଯୁକ୍ତ ମହମ୍ମଦ ଦିଲଶାଦ ଏବଂ ମହମ୍ମଦ ନାଭିଦଙ୍କୁ ଇଣ୍ଟରପୋଲ୍ ସହାୟତାରେ ତ୍ରିନିଦାଦ ଏବଂ ଟୋବାଗୋରୁ ଗିରଫ କରାଯାଇସାରିଛି । ଜିଶାନ୍ ଏପ୍ରିଲ ୧୯ ରୁ ୨୧ ମଧ୍ୟରେ ଏହି ଧମକପୂର୍ଣ୍ଣ ଇମେଲ୍ ପାଇଥିଲା । ଯଦି ୧୦ କୋଟି ନଦେବେ ତେବେ ପରିଣାମ ଭୟଙ୍କର ହେବ ବୋଲି ଚେତାବନୀ ଦିଆଯାଇଥିଲା ।

ରିଙ୍କୁ ସିଂହ ଏକ ଅତି ସାଧାରଣ ପରିବାରରୁ ଆସିଛନ୍ତି

ଉତ୍ତର ପ୍ରଦେଶର ଆଲିଗଡ଼ର ରିଙ୍କୁ ସିଂହଙ୍କର ଭାରତୀୟ ଦଳରେ ଖେଳିବା ପାଇଁ ବହୁତ ସଂଘର୍ଷ କରିଛନ୍ତି । ତାଙ୍କ ପିତା ଖାନଚାନ୍ଦ ସିଂହ ସିଲିଣ୍ଡର ଡେଲିଭରି କାର୍ଯ୍ୟ କରୁଥିଲେ । କ୍ରିକେଟ ପ୍ରତି ତାଙ୍କର ଆଗ୍ରହ ଯୋଗୁଁ ରିଙ୍କୁ ପିଲାବେଳେ ତାଙ୍କ ପିତାଙ୍କଠାରୁ ଗାଳି ଏବଂ ମାଡ଼ ମଧ୍ୟ ଖାଇଥିଲେ । ଏତେସବୁ ପରେ ମଧ୍ୟ ସେ ହାର୍ ମାନିନଥିଲେ । ତାଙ୍କ କଠିନ ପରିଶ୍ରମ ଫଳରେ ସେ ପ୍ରଥମେ IPL ଏବଂ ତା'ପରେ ଭାରତୀୟ ଦଳରେ ସ୍ଥାନ ପାଇଥିଲେ ।

ଏସପି ସାଂସଦଙ୍କୁ ବିବାହ କରିବାକୁ ଯାଉଛନ୍ତି

ରିଙ୍କୁ ସିଂହ IPLରେ କୋଲକାତା ନାଇଟ୍ ରାଇଡର୍ସ (KKR) ପାଇଁ ଚମତ୍କାର ପ୍ରଦର୍ଶନ କରିଛନ୍ତି। ସେ ଏସିଆ କପ୍ ଫାଇନାଲରେ ଚୌକା ମାରି ପାକିସ୍ତାନ ବିପକ୍ଷରେ ଭାରତର ବିଜୟର ହିରୋ ହୋଇଥିଲେ । ଏହା ଉଲ୍ଲେଖନୀୟ ଯେ ରିଙ୍କୁ ସିଂହ ସମାଜବାଦୀ ପାର୍ଟିର ଲୋକସଭା ସାଂସଦ ପ୍ରିୟା ସରୋଜଙ୍କ ସହିତ ନିର୍ବନ୍ଧ କରିଛନ୍ତି ।