ଆଫଗାନିସ୍ତାନ ବିପକ୍ଷରେ ହେବାକୁ ଥିବା ଏକ ମ୍ୟାଚ୍‌ ବିଶିଷ୍ଟ ଟେଷ୍ଟ ସିରିଜ୍‌ ପାଇଁ ୧୫ ଜଣିଆ ଦଳ ଘୋଷଣା କରିଛି ବିସିସିଆଇ । ତେବେ ଘୋଷଣା ହୋଇଥିବା ଟିମ୍‌ରେ ସବୁଠୁ ଗୁରୁତ୍ବପୂର୍ଣ୍ଣ କଥା ହେଉଛି ଋଷଭ ପନ୍ତଙ୍କୁ ଉପ-ଅଧିନାୟକ ପଦରୁ ହଟାଇ ଦିଆଯାଇଛି । ପନ୍ତଙ୍କ ସ୍ଥାନରେ କେଏଲ ରାହୁଲଙ୍କୁ ନୂତନ ଉପ-ଅଧିନାୟକ ନିଯୁକ୍ତ କରାଯାଇଛି । ଆଉ ଏକ ଆଶ୍ଚର୍ଯ୍ୟଜନକ ନିଷ୍ପତ୍ତି ହେଉଛି ରବୀନ୍ଦ୍ର ଜାଡେଜାଙ୍କୁ ବିଶ୍ରାମ ଦିଆଯାଇଛି । ସେହିପରି ଘୋଷଣା ହୋଇଥିବା ଦଳରେ ୩ ଜଣ ନୂଆ ଖେଳାଳିଙ୍କୁ ସାମିଲ କରାଯାଇଛି । ଏହି ତିନି ଜଣ ନୂଆ ଖେଳାଳି ହେଉଛନ୍ତି ଗୁରନୁର ବ୍ରାର, ହର୍ଷ ଦୁବେ ଏବଂ ମାନବ ସୁଥାର ।

ଆଶା ଅନୁଯାୟୀ, ଜସପ୍ରିତ ବୁମରାହଙ୍କୁ ମଧ୍ୟ ଆଫଗାନିସ୍ତାନ ବିପକ୍ଷରେ ଟେଷ୍ଟ ସିରିଜ୍ ଏବଂ ଦିନିକିଆ ସିରିଜ୍‌ରୁ ବିଶ୍ରାମ ଦିଆଯାଇଛି । ଭାରତ-ଆଫଗାନିସ୍ତାନ ଟେଷ୍ଟ ମ୍ୟାଚ୍ ଜୁନ୍ ୬ ତାରିଖରୁ ନ୍ୟୁ ଚଣ୍ଡିଗଡ଼ରେ ଖେଳାଯିବ ।

ଋଷଭ ପନ୍ତଙ୍କଠାରୁ ଉପ-ଅଧିନାୟକ ପଦ କାଢ଼ି ନିଆଯାଇଛି

ଟିମ୍‌ ଘୋଷଣା ହେବାର କିଛି ଦିନ ପୂର୍ବରୁ ଚର୍ଚ୍ଚା ହେଉଥିଲା କି ଋଷଭ ପନ୍ତଙ୍କୁ ଟେଷ୍ଟ ଦଳର ଉପ-ଅଧିନାୟକ ପଦରୁ ହଟାଇ ଦିଆଯାଇପାରେ । ଏବେ ବିସିସିଆଇ ବାସ୍ତବରେ ଋଷଭ ପନ୍ତଙ୍କୁ ଉପ-ଅଧିନାୟକ ପଦରୁ ହଟାଇ କେଏଲ ରାହୁଲଙ୍କୁ ଉପ-ଅଧିନାୟକ ନିଯୁକ୍ତ କରିଛି । ଦକ୍ଷିଣ ଆଫ୍ରିକା ବିପକ୍ଷରେ ଖେଳାଯାଇଥିବା ଟେଷ୍ଟ ସିରିଜ୍‌ରେ ଋଷଭ ପନ୍ତ ଅତ୍ୟନ୍ତ ଖରାପ ପ୍ରଦର୍ଶନ କରିଥିଲେ । ସେ ଚାରୋଟି ଇନିଂସରେ ମାତ୍ର ୪୯ ରନ୍‌ କରିଥିଲେ । ସେହିପରି ଚଳିତ ଆଇପିଏଲରେ ମଧ୍ୟ ପନ୍ତଙ୍କ ଖରାପ ଫର୍ମ ଜାରି ରହିଛି ।

ଆଫଗାନିସ୍ତାନ ଟେଷ୍ଟ ସିରିଜ ପାଇଁ ଭାରତୀୟ ଦଳ: ଶୁବମନ ଗିଲ (ଅଧିନାୟକ), ଯଶସ୍ୱୀ ଜୟସ୍ବାଲ, କେଏଲ ରାହୁଲ (ଉପ-ଅଧିନାୟକ), ସାଇ ସୁଦର୍ଶନ, ଋଷଭ ପନ୍ତ (ଓ୍ବିକେଟ୍‌ କିପର), ଦେବଦତ୍ତ ପାଡିକ୍କଲ, ନୀତିଶ କୁମାର ରେଡ୍ଡୀ, ୱାଶିଂଟନ ସୁନ୍ଦର, କୁଲଦୀପ ଯାଦବ, ମହମ୍ମଦ ସିରାଜ, ପ୍ରସିଦ୍ଧ କ୍ରିଷ୍ଣା, ମାନବ ସୁଥାର, ଗୁରନୁର ବ୍ରାର, ଧ୍ରୁବ ଜୁରେଲ(ଓ୍ବିକେଟ କିପର), ହର୍ଷ ଦୁବେ

ଭାରତ ବନାମ ଆଫଗାନିସ୍ତାନ -ପୂରା କାର୍ଯ୍ୟସୂଚୀ

ଭାରତ ଏବଂ ଆଫଗାନିସ୍ତାନ ମଧ୍ୟରେ ଗୋଟିଏ ଟେଷ୍ଟ ମ୍ୟାଚ୍ ଏବଂ ତିନୋଟି ଦିନିକିଆ ମ୍ୟାଚ୍‌ ଖେଳାଯିବ । ଟେଷ୍ଟ ମ୍ୟାଚ୍ ଜୁନ୍ ୬-୧୦ ପର୍ଯ୍ୟନ୍ତ ନ୍ୟୁ ଚଣ୍ଡିଗଡ଼ରେ ଖେଳାଯିବ । ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ଜୁନ୍ ୧୪ ରେ ଆରମ୍ଭ ହେବ। ପ୍ରଥମ ଦିନିକିଆ ଜୁନ୍ ୧୪ ରେ ଧର୍ମଶାଳାରେ, ଦ୍ୱିତୀୟ ଦିନିକିଆ ଜୁନ୍ ୧୭ ରେ ଲକ୍ଷ୍ନୌରେ ଏବଂ ଶେଷ ଦିନିକିଆ ଜୁନ୍ ୨୦ ରେ ଚେନ୍ନାଇରେ ଖେଳାଯିବ ।