ଟେଷ୍ଟ ଏବଂ ଟି-୨୦ ଫର୍ମାଟରୁ ଅବସର ନେବା ପରେ, ରୋହିତ ଶର୍ମା ଏବେ ନିଜକୁ ଦିନିକିଆ ମ୍ୟାଚ୍ ଖେଳିବା ପାଇଁ ପ୍ରସ୍ତୁତ ହେଉଛନ୍ତି । ନିକଟରେ ରୋହିତ ବିସିସିଆଇର ୟୋ-ୟୋ ଟେଷ୍ଟ ମଧ୍ୟ ପାସ୍ କରିଛନ୍ତି । ଯାହା ପରେ ଏବେ ଅଧିନାୟକ ରୋହିତ ଶର୍ମାଙ୍କୁ ଅକ୍ଟୋବରରେ ଅଷ୍ଟ୍ରେଲିଆ ସହିତ ଦିନିକିଆ ସିରିଜରେ ଖେଳୁଥିବାର ନଜର ଆସିପାରନ୍ତି । ତେବେ ଏହାରି ମଧ୍ୟରେ ରୋହିତ ଶର୍ମାଙ୍କ ଏକ ଭିଡିଓ ତାଙ୍କ ଫ୍ୟାନ୍ସମାନଙ୍କୁ ଚିନ୍ତାରେ ପକାଇଛି । ଯେଉଁଥିରେ ଦେଖିବାକୁ ମିଳୁଛି କି ରୋହିତ ହଠାତ୍ ବିଳମ୍ବିତ ରାତିରେ ହସ୍ପିଟାଲରେ ପହଞ୍ଚିଛନ୍ତି ।

ଟିମ୍ ଇଣ୍ଡିଆର ଦିନିକିଆ ଅଧିନାୟକ ରୋହିତ ଶର୍ମା ହଠାତ୍ ବିଳମ୍ବିତ ରାତିରେ ମୁମ୍ବାଇର କୋକିଲାବେନ୍ ହସ୍ପିଟାଲରେ ପହଞ୍ଚିଛନ୍ତି । ଯାହାର ଭିଡିଓ ସୋସିଆଲ ମିଡିଆରେ ବେଶ୍ ଭାଇରାଲ ହେଉଛି। ରୋହିତଙ୍କୁ ହସ୍ପିଟାଲରେ ପହଞ୍ଚିବା ଦେଖି ତାଙ୍କ ପ୍ରଶଂସକମାନେ ମଧ୍ୟ ଚିନ୍ତିତ ଅଛନ୍ତି । ତେବେ ରୋହିତ କାହିଁକି ହସ୍ପିଟାଲ ଯାଇଛନ୍ତି ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ ।

ରୋହିତ ଶର୍ମା ବହୁତ ଦିନ ଧରି କ୍ରିକେଟରୁ ଦୂରରେ ଅଛନ୍ତି । ସେ IPL ୨୦୨୫ ସମୟରେ ଟେଷ୍ଟ କ୍ରିକେଟରୁ ଅବସର ନେଇଥିଲେ। ତଥାପି, ରୋହିତ ଏବେ ବି ଏକଦିବସୀୟ ଫର୍ମାଟରେ ଟିମ୍ ଇଣ୍ଡିଆର ଅଧିନାୟକ ଅଛନ୍ତି। ରୋହିତ ୨୦୨୫ ଚାମ୍ପିଅନ୍ସ ଟ୍ରଫିରେ ଟିମ୍ ଇଣ୍ଡିଆ ପାଇଁ ତାଙ୍କର ଶେଷ ମ୍ୟାଚ୍ ଖେଳିଥିଲେ। ରୋହିତ ଶର୍ମାଙ୍କ ଅଧିନାୟକତ୍ୱରେ, ଟିମ୍ ଇଣ୍ଡିଆ ଚାମ୍ପିଅନ୍ସ ଟ୍ରଫିର ଫାଇନାଲରେ ନ୍ୟୁଜିଲ୍ୟାଣ୍ଡକୁ ପରାସ୍ତ କରି ଟାଇଟଲ ଜିତିଥିଲା । ଏବେ ପ୍ରଶଂସକମାନେ ପୁଣିଥରେ ରୋହିତଙ୍କ ପ୍ରତ୍ୟାବର୍ତ୍ତନ ପାଇଁ ଉତ୍ସାହର ସହିତ ଅପେକ୍ଷା କରିଛନ୍ତି।

ଏସିଆ କପ୍ ୨୦୨୫ ପରେ ଟିମ୍ ଇଣ୍ଡିଆକୁ ଅଷ୍ଟ୍ରେଲିଆ ଗସ୍ତ କରିବାକୁ ପଡିବ। ଏହି ଗସ୍ତରେ ଦୁଇ ଦଳ ମଧ୍ୟରେ ୩ ମ୍ୟାଚ୍ ବିଶିଷ୍ଟ ଏକଦିବସୀୟ ସିରିଜ୍ ମଧ୍ୟ ଖେଳାଯିବ । ଯେଉଁଥିରେ ରୋହିତ ଶର୍ମା ପୁଣି ଥରେ ଭାରତୀୟ ଦଳର ଅଧିନାୟକତ୍ୱ କରୁଥିବାର ଦେଖାଯିବେ । ଯାହା ପାଇଁ ରୋହିତ ବିସିସିଆଇ ସେଣ୍ଟର ଅଫ୍ ଏକ୍ସିଲେନ୍ସରେ ତାଙ୍କର ଫିଟନେସ୍ ପରୀକ୍ଷା ମଧ୍ୟ ପାସ୍ କରିଛନ୍ତି।

Argus News | argus news | -Argusnews Home: Odisha Latest News, Breaking News, Trending News, Live TV and more