କ୍ରିକେଟ୍ ଜଗତର କିମ୍ବଦନ୍ତୀ ଖେଳାଳି ସଚିନ ତେନ୍ଦୁଲକର ନିଜ ଝିଅ ସାରା ତେନ୍ଦୁଲକରଙ୍କ ୨୯ତମ ଜନ୍ମଦିନ ଅବସରରେ ଏକ ଭାବପ୍ରବଣ ପୋଷ୍ଟ କରିଛନ୍ତି । ତାଙ୍କର ଏହି ସୋସିଆଲ ମିଡିଆ ପୋଷ୍ଟରେ ଜଣେ ବାପାଙ୍କ ସ୍ନେହ, ଝିଅ ବଡ଼ ହେବାର ଖୁସି ଏବଂ ନିଜ ଜୀବନର ନିଷ୍ପତ୍ତି ନିଜେ ନେଉଥିବା ଦେଖି ଗର୍ବ ଅନୁଭବ କରିବାର ଭାବନା ସ୍ପଷ୍ଟ ହୋଇଛି ।

There was a time when I was the one showing you the way. Now, more often than not, I’m simply happy to see where you choose to go. Happy birthday, Sara. Love you. ❤️ https://t.co/7nBiKgClCk

— Sachin Tendulkar (@sachin_rt) October 12, 2026

ସଚିନ ସୋସିଆଲ ମିଡିଆ ପ୍ଲାଟଫର୍ମ Xରେ ଲେଖିଛନ୍ତି, “ଗୋଟିଏ ସମୟ ଥିଲା, ଯେତେବେଳେ ମୁଁ ତୁମକୁ ରାସ୍ତା ଦେଖାଉଥିଲି । ଏବେ ଅଧିକାଂଶ ସମୟରେ ତୁମେ ନିଜ ରାସ୍ତା ନିଜେ ବାଛୁଥିବା ଦେଖି ମୋତେ ଖୁସି ଲାଗେ । ଜନ୍ମଦିନର ଅନେକ ଶୁଭେଚ୍ଛା, ସାରା । ତୁମକୁ ବହୁତ ଭଲ ପାଏ ।” ଏହି ବାର୍ତ୍ତା ସହ ସେ ହାର୍ଟର ଏକ ଇମୋଜି ମଧ୍ୟ ସେୟାର କରିଛନ୍ତି ।

ଏଥି ସହ ପଢନ୍ତୁ:  ବିମାନରେ ଧୋନିଙ୍କୁ ଭେଟିଲେ ଏୟାର ହୋଷ୍ଟେସ୍, କ୍ୟାପେଟନ କୁଲ କହିଲେ ଏହି କଥା...

ଲଣ୍ଡନରେ ପାଠପଢ଼ିଛନ୍ତି ସାରା
ସାରା ତେନ୍ଦୁଲକରଙ୍କ ଜନ୍ମ ୧୨ ଅକ୍ଟୋବର ୧୯୯୭ରେ ମୁମ୍ବାଇରେ ହୋଇଥିଲା । ସେ ସଚିନ ତେନ୍ଦୁଲକର ଏବଂ ଅଞ୍ଜଳି ତେନ୍ଦୁଲକରଙ୍କ ଝିଅ । ସାରା ମୁମ୍ବାଇର ଧୀରୁଭାଇ ଅମ୍ବାନୀ ଇଣ୍ଟରନ୍ୟାସନାଲ ସ୍କୁଲରୁ ପ୍ରାରମ୍ଭିକ ଶିକ୍ଷା ଗ୍ରହଣ କରିବା ପରେ ଉଚ୍ଚଶିକ୍ଷା ପାଇଁ ଲଣ୍ଡନ ଯାଇଥିଲେ । ସୋସିଆଲ ମିଡିଆରେ ସାରାଙ୍କର ଭଲ ଲୋକପ୍ରିୟତା ରହିଛି । ତାଙ୍କର ଫଟୋ ଏବଂ ପୋଷ୍ଟକୁ ଅନେକ ଲୋକ ପସନ୍ଦ କରନ୍ତି ।

ସଚିନ ଏବଂ ଅଞ୍ଜଳିଙ୍କର ଦୁଇଟି ସନ୍ତାନ ସାରା ଓ ଅର୍ଜୁନ । ଅର୍ଜୁନ ନିଜ ବାପାଙ୍କ ପରି କ୍ରିକେଟକୁ କ୍ୟାରିୟର ଭାବେ ବାଛିଥିବା ବେଳେ ସାରା ନିଜର ଏକ ଭିନ୍ନ ପରିଚୟ ଗଢ଼ିଛନ୍ତି । କ୍ରିକେଟ୍ ମଇଦାନରେ ଅନେକ ରେକର୍ଡ ସୃଷ୍ଟି କରିଥିବା ସଚିନଙ୍କ ପାଇଁ ପରିବାରର ଗୁରୁତ୍ୱ କେତେ ଅଧିକ, ତାହା ତାଙ୍କର ଏହି ହୃଦୟସ୍ପର୍ଶୀ ବାର୍ତ୍ତାରୁ ପୁଣିଥରେ ସ୍ପଷ୍ଟ ହୋଇଛି ।