Sakshi Chaudhary Gold Medal / ଗୋଲ୍ଡ ମେଡାଲ୍ ପଛରେ ବିରାଟ କୋହଲିଙ୍କ ବଡ଼ ଭୂମିକା, ସାକ୍ଷୀ ଚୌଧୁରୀ କହିଲେ ସତ

କ୍ରିକେଟ୍ ପିଚ୍‌ରେ ବିରାଟ କୋହଲି ନିଜର ବ୍ୟାଟିଂ ମାଧ୍ୟମରେ ଅନେକ ମ୍ୟାଚ୍ ଜିତାଇଛନ୍ତି । ବିରାଟ କୋହଲି କେବଳ କ୍ରିକେଟର ନୁହେଁ, ଅନେକ ଖେଳାଳିଙ୍କ ସ୍ୱପ୍ନର ସାଥୀ ମଧ୍ୟ । କମନୱେଲ୍ଥ ଗେମ୍ସ ୨୦୨୬ରେ ଭାରତ ପାଇଁ ସ୍ୱର୍ଣ୍ଣ ପଦକ ଜିତିଥିବା ବକ୍ସର ସାକ୍ଷୀ ଚୌଧୁରୀ ଏବେ ଏମିତି ଏକ ସତ୍ୟ ସାମ୍ନାକୁ ଆଣିଛନ୍ତି, ଯାହା ଶୁଣିଲେ ପ୍ରତ୍ୟେକ କ୍ରୀଡ଼ାପ୍ରେମୀ ଗର୍ବ ଅନୁଭବ କରିବେ । କହିଛନ୍ତି, କ୍ୟାରିୟରର ସବୁଠାରୁ କଠିନ ସମୟରେ ବିରାଟ କୋହଲି ହିଁ ଥିଲେ ତାଙ୍କର ସବୁଠାରୁ ବଡ଼ ଭରସା ।

ଭାରତ ପାଇଁ କମନୱେଲ୍ଥ ଗେମ୍ସ ୨୦୨୬ରେ ବକ୍ସିଂରେ ସ୍ୱର୍ଣ୍ଣ ପଦକ ଜିତି ଚର୍ଚ୍ଚାରେ ଥିବା ସାକ୍ଷୀ ଚୌଧୁରୀ ଏବେ ନିଜ ସଫଳତା ପଛର ଏକ ବଡ଼ ରହସ୍ୟ ଖୋଲିଛନ୍ତି । ସାକ୍ଷୀ କହିଛନ୍ତି, ତାଙ୍କ କ୍ୟାରିୟରର ସବୁଠାରୁ କଠିନ ସମୟରେ ଭାରତୀୟ କ୍ରିକେଟ୍ ତାରକା ବିରାଟ କୋହଲି ଏବଂ ତାଙ୍କ ଫାଉଣ୍ଡେସନ୍ ତାଙ୍କୁ ସହଯୋଗର ହାତ ବଢ଼ାଇଥିଲେ । ସେହି ସହଯୋଗ ହିଁ ତାଙ୍କୁ ଆଗକୁ ବଢ଼ିବାର ସାହସ ଦେଇଥିଲା ।

ନ୍ୟୁଜ ଏଜେନ୍ସୀ ଆଇଏନଏସ୍‌କୁ ଦେଇଥିବା ସାକ୍ଷାତକାରରେ ସାକ୍ଷୀ ବିରାଟ କୋହଲିଙ୍କୁ ଧନ୍ୟବାଦ ଜଣାଇ କହିଥିଲେ, "ବିରାଟ କୋହଲି ମୋର ଆଦର୍ଶ । ଯେତେବେଳେ ମୋ ପାଇଁ ପରିସ୍ଥିତି କଠିନ ଥିଲା, ସେତେବେଳେ ସେ ମୋ ସହ ଠିଆ ହୋଇଥିଲେ । ପ୍ରାୟ ତିନି ବର୍ଷ ଧରି ସେ ମୋର ସ୍ପନ୍ସର ଥିଲେ । ତାଙ୍କ ସହଯୋଗ ଯୋଗୁଁ ମୁଁ କୌଣସି ଚିନ୍ତା ଛଡ଼ା ନିଜ ଖେଳ ଉପରେ ସମ୍ପୂର୍ଣ୍ଣ ଧ୍ୟାନ ଦେଇପାରିଥିଲି । ଏଥିପାଇଁ ମୁଁ ସବୁବେଳେ ତାଙ୍କ ପ୍ରତି କୃତଜ୍ଞ ରହିବି।"

ସାକ୍ଷୀ ଆହୁରି କହିଛନ୍ତି ଯେ, ବିରାଟ କୋହଲିଙ୍କ ଶୃଙ୍ଖଳା, ନିରନ୍ତର ପରିଶ୍ରମ ଏବଂ ଚାପ ମଧ୍ୟରେ ଶାନ୍ତ ରହିବାର କ୍ଷମତା ତାଙ୍କୁ ସବୁବେଳେ ପ୍ରେରଣା ଦେଇଆସିଛି । ତାଙ୍କ ମତରେ, ବିରାଟଙ୍କ ସମର୍ଥନ ତାଙ୍କ କ୍ୟାରିୟରର ସବୁଠାରୁ ଗୁରୁତ୍ୱପୂର୍ଣ୍ଣ ମୋଡ଼ ଥିଲା, ଯାହା ତାଙ୍କୁ ବଡ଼ ମଞ୍ଚରେ ସଫଳତା ହାସଲ କରିବାର ଆତ୍ମବିଶ୍ୱାସ ଦେଇଥିଲା ।
ନିକଟରେ ଗ୍ଲାସଗୋରେ ଆୟୋଜିତ କମନୱେଲ୍ଥ ଗେମ୍ସ ୨୦୨୬ରେ ସାକ୍ଷୀ ଚୌଧୁରୀ ମହିଳା ୫୧ କିଲୋଗ୍ରାମ ବର୍ଗର ଫାଇନାଲରେ ଇଂଲଣ୍ଡର ରୁବି ହ୍ୱାଇଟ୍‌ଙ୍କୁ ପରାସ୍ତ କରି ଭାରତ ପାଇଁ ସ୍ୱର୍ଣ୍ଣ ପଦକ ଜିତିଥିଲେ । ଏହି ବିଜୟ ଭାରତୀୟ ବକ୍ସିଂ ପାଇଁ ଏକ ବଡ଼ ସଫଳତା ଭାବେ ଗଣାଯାଉଛି ।

ସାକ୍ଷୀଙ୍କ ଏହି କାହାଣୀ ଦେଖାଇଦେଉଛି ଯେ, ବିରାଟ କୋହଲିଙ୍କ ଅବଦାନ କେବଳ କ୍ରିକେଟ୍ ମଇଦାନରେ ସୀମିତ ନୁହେଁ । ସେ ଅନ୍ୟ ଖେଳର ପ୍ରତିଭାଶାଳୀ ଖେଳାଳିମାନଙ୍କୁ ମଧ୍ୟ ସମୟ ସମୟରେ ସହଯୋଗ କରି ସେମାନଙ୍କ ସ୍ୱପ୍ନ ପୂରଣରେ ସହଯୋଗ କରୁଛନ୍ତି । ସାକ୍ଷୀ ଚୌଧୁରୀଙ୍କ ସଫଳତା ତାହାର ଏକ ଜୀବନ୍ତ ଉଦାହରଣ ।