Aryavir Sehwag Debut / ଡେବ୍ୟୁ ମ୍ୟାଚ୍‌ରେ ଚାଲିଲାନି ସେହୱାଗଙ୍କ ପୁଅଙ୍କ ବ୍ୟାଟ୍, ବାପାଙ୍କ ସାମ୍ନାରେ ଫ୍ଲପ୍

ବାପାଙ୍କ ପରେ ଟିମ୍ ଇଣ୍ଡିଆରେ ଡେବ୍ୟୁ କଲେ ପୁଅ । ଆମେ କହୁଛୁ ଟିମ୍ ଇଣ୍ଡିଆର ପୂର୍ବତନ ବିସ୍ଫୋରକ ବ୍ୟାଟ୍ସମ୍ୟାନ୍‌ ବୀରେନ୍ଦ୍ର ସେହଓ୍ବାଗଙ୍କ ପୁଅଙ୍କ କଥା । ବାପାଙ୍କ ଭଳି କ୍ରିକେଟ୍ ମଇଦାନରେ ପାଦ ରଖିବାର ଆର୍ଯ୍ୟବୀର ସେହୱାଗଙ୍କ ଅପେକ୍ଷା ଶେଷ ହୋଇଛି । କିନ୍ତୁ ଭାରତୀୟ ଅଣ୍ଡର-୧୯ ଦଳ ପାଇଁ ତାଙ୍କ ଡେବ୍ୟୁ ତାଙ୍କ ଆଶା ଅନୁଯାୟୀ ସ୍ମରଣୀୟ ହୋଇପାରିନାହିଁ ।

ରାଜକୋଟରେ ଅଷ୍ଟ୍ରେଲିଆ ଅଣ୍ଡର-୧୯ ବିପକ୍ଷରେ ଖେଳାଯାଇଥିବା ମ୍ୟାଚ୍‌ରେ ଆର୍ଯ୍ୟବୀର ପ୍ରଥମଥର ପାଇଁ ଭାରତର ଅଣ୍ଡର-19 ଜର୍ସି ପିନ୍ଧି ବ୍ୟାଟିଂ କରିଥିଲେ । ପୁଅର ଡେବ୍ୟୁ ଦେଖିବା ପାଇଁ ତାଙ୍କ ବାପା ଏବଂ ଭାରତର ପୂର୍ବତନ ବିସ୍ଫୋରକ ଓପନର୍ ବୀରେନ୍ଦ୍ର ସେହୱାଗ ମଧ୍ୟ ଷ୍ଟାଡିୟମରେ ଉପସ୍ଥିତ ଥିଲେ ।
ମ୍ୟାଚ୍‌ରେ ବର୍ଷା ହେବାରୁ ୫୦ ଓଭରର ମୁକାବିଲାକୁ କମାଇ ୨୦ ଓଭର କରାଯାଇଥିଲା । ତେଣୁ ଭାରତୀୟ ଓପନରମାନଙ୍କ ଉପରେ ଆରମ୍ଭରୁ ଦ୍ରୁତ ରନ୍ କରିବାର ଚାପ ଥିଲା ।

ଆର୍ଯ୍ୟବୀର ଆରମ୍ଭରେ କିଛି ଭଲ ଶଟ୍ ଖେଳିଥିଲେ ଏବଂ ତାଙ୍କ ବ୍ୟାଟ୍‌ରୁ ୫ଟି ଚୌକା ମଧ୍ୟ ଆସିଥିଲା । କିନ୍ତୁ ବଡ଼ ଇନିଂସ ଖେଳିବା ପୂର୍ବରୁ ସେ ଆଉଟ୍ ହୋଇଯାଇଥିଲେ । ଆର୍ଯ୍ୟବୀର ୨୬ ବଲ୍‌ରେ ୨୮ ରନ୍ କରି ପ୍ୟାଭିଲିୟନ୍ ଫେରିଥିଲେ ।

ପୁଅର ଡେବ୍ୟୁ ଦେଖିବାକୁ ଷ୍ଟାଡିୟମରେ ସେହୱାଗ

ଆର୍ଯ୍ୟବୀରଙ୍କ ଡେବ୍ୟୁକୁ ସ୍ୱତନ୍ତ୍ର କରିବା ପାଇଁ ବୀରେନ୍ଦ୍ର ସେହୱାଗ ରାଜକୋଟର ନିରଞ୍ଜନ ଶାହ ଷ୍ଟାଡିୟମରେ ପହଞ୍ଚିଥିଲେ । ଷ୍ଟାଣ୍ଡରେ ବସି ପୁଅକୁ ଭାରତୀୟ ଅଣ୍ଡର-୧୯ ଜର୍ସିରେ ଖେଳୁଥିବାର ଦେଖିଥିଲେ ସେହଓ୍ବାଗ । ଯାହାର ଫଟୋ ସୋସିଆଲ ମିଡିଆରେ ଭାଇରାଲ ହୋଇଥିଲା । ଆର୍ଯ୍ୟବୀର ଏହା ପୂର୍ବରୁ ଘରୋଇ କ୍ରିକେଟ୍‌ରେ ମଧ୍ୟ ନିଜ ବ୍ୟାଟିଂ ଦ୍ୱାରା ଧ୍ୟାନ ଆକର୍ଷଣ କରିସାରିଛନ୍ତି ।

ଅନଭ୍ୟ ଦ୍ରାବିଡଙ୍କ ଧମାକାଦାର ଇନିଂସ

ଆର୍ଯ୍ୟବୀର ବଡ଼ ଇନିଂସ ଖେଳିପାରିନଥିବା ବେଳେ, ରାହୁଲ ଦ୍ରାବିଡଙ୍କ ସାନ ପୁଅ ଅନଭ୍ୟ ଦ୍ରାବିଡ ନିଜ ବ୍ୟାଟିଂରେ ଚମକ ଦେଖାଇଥିଲେ । ୱିକେଟକିପର-ବ୍ୟାଟ୍ସମ୍ୟାନ୍‌ ଅନଭ୍ୟ ୬ ନମ୍ବରରେ ବ୍ୟାଟିଂ କରିବାକୁ ଆସିଥିଲେ । ସେତେବେଳେ ଭାରତ ଅଣ୍ଡର-୧୯ ଦଳ ୮୮ ରନ୍‌ରେ ୪ଟି ୱିକେଟ୍ ହରାଇସାରିଥିଲା । ଏହାପରେ ଅନଭ୍ୟ ଦ୍ରୁତ ରନ୍ ସଂଗ୍ରହ କରି ମାତ୍ର ୧୮ଟି ବଲ୍‌ରେ ୩୮ ରନ୍ କରିଥିଲେ । ତାଙ୍କ ଦ୍ରୁତ ଇନିଂସ ଭାରତର ସ୍କୋରକୁ ୧୫୦ ରନ୍‌ରୁ ଅଧିକ କରିବାରେ ଗୁରୁତ୍ୱପୂର୍ଣ୍ଣ ହୋଇଥିଲା ।

୭ ରନ୍‌ରେ ଜିତିଲା ଭାରତ

ଭାରତ ଅଣ୍ଡର-୧୯ ଦଳ ୨୦ ଓଭରରେ ୬ ୱିକେଟ୍ ହରାଇ ୧୮୨ ରନ୍ କରିଥିଲା । ଜବାବରେ ଅଷ୍ଟ୍ରେଲିଆ ଅଣ୍ଡର-୧୯ ଦଳ ୨୦ ଓଭରରେ ୭ ୱିକେଟ୍ ହରାଇ ୧୭୫ ରନ୍ କରିପାରିଥିଲା । ଫଳରେ ଭାରତ ଏହି ରୋମାଞ୍ଚକର ମୁକାବିଲାକୁ ୭ ରନ୍‌ରେ ଜିତିଥିଲା ।