ଚେତେଶ୍ବର ପୂଜାରା । ରାହୁଲ ଦ୍ରାବିଡ୍‌ଙ୍କ ପରେ ଟେଷ୍ଟ କ୍ରିକେଟରେ ଥିଲେ ଭାରତୀୟ ଟିମ୍‌ର ଦି ଓ୍ବାଲ । ଏହି ଅଭିଜ୍ଞ ବ୍ୟାଟ୍ସମ୍ୟାନ୍ ଏବେ କ୍ରିକେଟର ତିନୋଟି ଫର୍ମାଟରୁ ଅବସର ଘୋଷଣା କରିଛନ୍ତି। ୩୭ ବର୍ଷୀୟ ଏହି ଖେଳାଳି ଭାରତୀୟ ଦଳର ସବୁଠାରୁ ନିର୍ଭରଯୋଗ୍ୟ ବ୍ୟାଟ୍ସମ୍ୟାନଙ୍କ ମଧ୍ୟରୁ ଅନ୍ୟତମ ଥିଲେ । ସେ ଭାରତୀୟ ଦଳ ପାଇଁ କିଛି ଟେଷ୍ଟ ଇନିଂସ ଏମିତି ଖେଳିଛନ୍ତି ଯାହା ସବୁଦିନ ପାଇଁ କ୍ରିକେଟ୍‌ ପ୍ରେମୀଙ୍କ ମନରେ ରହିବ ।

ଚେତେଶ୍ବର ପୂଜାରା ଏହି ସ୍ଥାନକୁ ପହଞ୍ଚିବାକୁ ବହୁତ ସଂଘର୍ଷ କରିଛନ୍ତି । ଗୋଟିଏ ସମୟରେ ଆଘାତ କାରଣରୁ ପୂଜାରାଙ୍କ କ୍ୟାରିୟର ପଥଭ୍ରଷ୍ଟ ହୋଇପାରିଥାନ୍ତି । କିନ୍ତୁ ସେ ସେହି ପରିସ୍ଥିତିକୁ ସଫଳତାର ଅତିକ୍ରମ କରି ବିଶ୍ବର ଜଣେ ସଫଳ ବ୍ୟାଟ୍ସମ୍ୟାନ୍‌ ହୋଇପାରିଥିଲେ । ପୂଜାରାଙ୍କ ପତ୍ନୀ ପୂଜା ତାଙ୍କ ପୁସ୍ତକ "ଦି ଡାଏରୀ ଅଫ୍ ଏ କ୍ରିକେଟରସ୍ ୱାଇଫ୍" ରେ ଏହି ଘଟଣା ବିଷୟରେ ବର୍ଣ୍ଣନା କରିଛନ୍ତି । ଏହି ଘଟଣା ୨୦୦୯ ମସିହାରେ ଘଟିଥିଲା । ସେ ସମୟରେ ପୂଜାରାଙ୍କ ବୟସ ମାତ୍ର ୨୧ ବର୍ଷ ହୋଇଥିଲା । ସେତେବେଳେ ପୂଜାରା କୋଲକାତା ନାଇଟ୍ ରାଇଡର୍ସ (କେକେଆର) ଦଳ ପାଇଁ ମନୋନୀତ ହୋଇଥିଲେ।

ଅଧିକ ପଢ଼ନ୍ତୁ: ମହମ୍ମଦ କୈଫ କହିଲେ ବଡ଼ କଥା, ଅନୁଷ୍କାଙ୍କୁ ବିବାହ ପରେ ବଦଳିଗଲେ କୋହଲି

ସେତେବେଳେ ସମସ୍ତେ ଆଶା କରିଥିଲେ ଯେ ଚେତେଶ୍ୱର ପୂଜାରା ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ରେ ଏକ ମହାନ ଡେବ୍ୟୁ କରିବେ । କିନ୍ତୁ, ଏକ ଅଭ୍ୟାସ ମ୍ୟାଚ୍‌ରେ କ୍ୟାଚ୍ ନେବା ସମୟରେ ସେ ତାଙ୍କ ଆଣ୍ଠୁରେ ଗୁରୁତର ଆଘାତ ପାଇଥିଲେ । ଯାହା ତାଙ୍କ ACL (ଏଣ୍ଟେରିୟର କ୍ରୁସିଏଟ୍ ଲିଗାମେଣ୍ଟ୍) ଭାଙ୍ଗି ଯାଇଥିଲା । ପୂଜାରା ସେତେବେଳେ କେକେଆର ପାଇଁ ଗୋଟିଏ ବି ମ୍ୟାଚ୍ ଖେଳି ନଥିଲେ ଏବଂ ଏହି ଆଘାତ ତାଙ୍କ କ୍ୟାରିଅରକୁ ନଷ୍ଟ କରିଦେଇପାରିଥାନ୍ତା । ତାଙ୍କର ଆଘାତ ଏତେ ଗୁରୁତର ଥିଲା ଯେ ଅସ୍ତ୍ରୋପଚାର ଜରୁରୀ ଥିଲା।

ଆଘାତ ପରେ KKR ମ୍ୟାନେଜମେଣ୍ଟ ଏବଂ ଦଳର ମାଲିକ ଶାହରୁଖ ଖାନ ଚେତେଶ୍ୱର ପୂଜାରାଙ୍କ ସମ୍ପୂର୍ଣ୍ଣ ଦାୟିତ୍ୱ ନେଇଥିଲେ । KKR କେବଳ ତାଙ୍କ ଅସ୍ତ୍ରୋପଚାରର ସମ୍ପୂର୍ଣ୍ଣ ଖର୍ଚ୍ଚ ବହନ କରିନଥିଲେ ବରଂ ତାଙ୍କୁ ସର୍ବୋତ୍ତମ ଚିକିତ୍ସା ଯୋଗାଇବା ମଧ୍ୟ ନିଶ୍ଚିତ କରିଥିଲେ। KKR ପୂଜାରାଙ୍କୁ ଦକ୍ଷିଣ ଆଫ୍ରିକାର କେପଟାଉନରେ ଚିକିତ୍ସା କରାଇବାର ବ୍ୟବସ୍ଥା କରିଥିଲା, ଯେଉଁଠାରେ କ୍ରୀଡା ଆଘାତରେ ବିଶେଷଜ୍ଞ ଡାକ୍ତର ଉପଲବ୍ଧ ଥିଲେ।

ଚେତେଶ୍ୱର ପୂଜାରାଙ୍କ ପିତା ପ୍ରଥମେ ତାଙ୍କ ପୁଅକୁ ବିଦେଶ ପଠାଇବାକୁ ଦ୍ୱିଧା କରୁଥିଲେ କାରଣ ତାଙ୍କ ପାଖରେ ପାସପୋର୍ଟ ନଥିଲା ଏବଂ ସେ ରାଜକୋଟରେ ଚିକିତ୍ସା କରିବାକୁ ଚାହୁଁଥିଲେ । କିନ୍ତୁ ଶାହରୁଖ ଖାନ ବ୍ୟକ୍ତିଗତ ଭାବରେ ପୂଜାରାଙ୍କୁ ଆଶ୍ୱାସନା ଦେଇଥିଲେ ଯେ ତାଙ୍କ ପୁଅ ଭାରତୀୟ ଦଳର ଭବିଷ୍ୟତ ପାଇଁ ଗୁରୁତ୍ୱପୂର୍ଣ୍ଣ ଏବଂ ସର୍ବୋତ୍ତମ ଚିକିତ୍ସା ପାଇବାକୁ ଯୋଗ୍ୟ। ଶାହରୁଖ ଏହା ମଧ୍ୟ କହିଥିଲେ ଯେ ସେ ରାଜକୋଟରୁ ଜଣେ ପରିବାର ସଦସ୍ୟ କିମ୍ବା ଡାକ୍ତରଙ୍କୁ ଦକ୍ଷିଣ ଆଫ୍ରିକା ପଠାଇବେ ଯାହା ଦ୍ଵାରା ପୂଜାରା ଏକାକୀ ଅନୁଭବ କରିବେ ନାହିଁ।

ତେବେ ଏହାର କିଛି ଦିନ ମଧ୍ୟରେ ପାସପୋର୍ଟ ଏବଂ ଭିସା ଔପଚାରିକତା ସମାପ୍ତ ହୋଇଥିଲା ଏବଂ ବିଦେଶରେ ଚେତେଶ୍ୱର ପୂଜାରାଙ୍କ ସଫଳ ଅସ୍ତ୍ରୋପଚାର ହୋଇଥିଲା । ଏହା ପରେ ସେ ପୁଣି ଥରେ କ୍ରିକେଟ ମଇଦାନକୁ ଓହ୍ଲାଇଥିଲେ ଏବଂ ଭାରତୀୟ ଦଳରେ ସ୍ଥାନ ପାଇଥିଲେ। ଯଦିଓ ପୂଜାରା ଆଇପିଏଲ କିଛି ଭଲ କରିପାରିନଥିଲେ କିନ୍ତୁ ଭାରତୀୟ ଦଳ ପାଇଁ ଅନେକ ଐତିହାସିକ ଇନିଂସ ଖେଳି ଭାରତକୁ ବିଜୟୀ କରାଇଥିଲେ ।