ସୁସ୍ଥ ହେଉଛନ୍ତି ଟିମ୍ ଇଣ୍ଡିଆର ଷ୍ଟାର ବ୍ୟାଟ୍ସମ୍ୟାନ୍‌ ଶ୍ରେୟସ ଆୟର । ସିଡନୀରେ ଅଷ୍ଟ୍ରେଲିଆ ବିପକ୍ଷ ତୃତୀୟ ଦିନିକିଆ ମ୍ୟାଚ୍ ଖେଳିବା ସମୟରେ ଟିମ୍ ଇଣ୍ଡିଆର ଷ୍ଟାର ବ୍ୟାଟ୍ସମ୍ୟାନ୍ ଶ୍ରେୟାସ ଆୟର ଗୁରୁତର ଭାବେ ଆହତ ହୋଇଥିଲେ । ଫିଲ୍ଡିଂ ସମୟରେ ଏକ କ୍ୟାଚ୍ ଧରିବା ବେଳେ ଆୟରଙ୍କ ପଞ୍ଜରାରେ ଆଘାତ ଲାଗିଥିଲା । ଯାହାଫଳରେ ସେ ଆଉ ଫିଲ୍ଡିଂ ମଧ୍ୟ କରିପାରିନଥିଲେ । ପରେ ତାଙ୍କୁ ସିଡନୀର ଏକ ହସ୍ପିଟାଲରେ ଭର୍ତ୍ତି କରାଯାଇଥିଲା । ଯେଉଁଠାରେ ପରୀକ୍ଷା ପରେ ତାଙ୍କ ସ୍ପିଲ୍ନରେ ଆଭ୍ୟନ୍ତରୀଣ ରକ୍ତସ୍ରାବ ହୋଇଥିବା ଜଣାପଡ଼ିଥିଲା । ଏହି କାରଣରୁ ତାଙ୍କୁ ତୁରନ୍ତ ICUକୁ ସ୍ଥାନାନ୍ତର କରାଯାଇଥିଲା । କିନ୍ତୁ ଏବେ ସେ ଧୀରେ ଧୀରେ ସୁସ୍ଥ ହେଉଛନ୍ତି । ଆଉ ଏସବୁ ମଧ୍ୟରେ ବିସିସିଆଇ ସମସ୍ତ କ୍ରିକେଟ ପ୍ରେମୀଙ୍କୁ ଖୁସି ଖବର ଦେଇଛି । ଆୟରଙ୍କ ଆଘାତକୁ ନେଇ ଏକ ବଡ଼ ଅପଡେଟ୍‌ ଦେଇଛି ବିସିସିଆଇ ।

ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ (BCCI) ଶନିବାର, ନଭେମ୍ବର ୧ରେ ଏକ ପ୍ରେସ୍ ବିଜ୍ଞପ୍ତି ଜାରି କରି ଶ୍ରେୟାସ ଆୟରଙ୍କ ଆଘାତ ବିଷୟରେ ଏକ ପ୍ରମୁଖ ଅପଡେଟ୍ ପ୍ରଦାନ କରିଛି । ବୋର୍ଡ ଘୋଷଣା କରିଛି ଯେ ଆୟରଙ୍କ ଅବସ୍ଥା ସ୍ଥିର ଅଛି ଏବଂ ତାଙ୍କୁ ହସ୍ପିଟାଲରୁ ଡିସଚାର୍ଜ କରାଯାଇଛି । BCCI କହିଛି, 'ଶ୍ରେୟାସ ଆୟରଙ୍କ ଆଘାତ ତୁରନ୍ତ ଚିହ୍ନଟ କରାଯାଇଥିଲା ଏବଂ ଏକ ଛୋଟ ଅସ୍ତ୍ରୋପଚାର କରାଯାଇଥିଲା । ଯାହାଫଳରେ ତାଙ୍କର ଆଭ୍ୟନ୍ତରୀଣ ରକ୍ତସ୍ରାବ ବନ୍ଦ ହୋଇଥିଲା । ତାଙ୍କୁ ଉପଯୁକ୍ତ ଚିକିତ୍ସା ଦିଆଯାଇଥିଲା । ଆୟରଙ୍କ ସ୍ବାସ୍ଥ୍ୟବସ୍ଥା ଏବେ ସ୍ଥିର ରହିଛି ଏବଂ ହସ୍ପିଟାଲରୁ ଡିସଚାର୍ଜ ହୋଇଛନ୍ତି ବୋଲି ବିସିସିଆଇ ପକ୍ଷରୁ ପ୍ରେସ୍‌ ରିଲିଜ୍‌ କରି ସୂଚନା ଦେଇଛି ।"

ଆୟରଙ୍କ ଉତ୍କୃଷ୍ଟ ଚିକିତ୍ସା ପାଇଁ ବିସିସିଆଇ ସିଡନୀର ଡାକ୍ତର କୌରୁଶ ହାଘୀଗୀ ଓ ତାଙ୍କ ଦଳ ଏବଂ ଭାରତୀୟ ଡାକ୍ତର ଦିନଶା ପାରଦିୱାଲାଙ୍କୁ ଧନ୍ୟବାଦ ଜଣାଇଛି । ଆୟର ଅଧିକ ଚିକିତ୍ସା ପାଇଁ ସିଡନୀରେ ରହିବେ । ସେ ସମ୍ପୂର୍ଣ୍ଣ ସୁସ୍ଥ ହେବା ପରେ ଭାରତ ଫେରିବେ ବୋଲି ବିସିସିଆଇ ପକ୍ଷରୁ କୁହାଯାଇଛି ।

ସେପଟେ ସିଡନୀରେ ଅଷ୍ଟ୍ରେଲିଆ ବିପକ୍ଷ ତୃତୀୟ ଦିନିକିଆରେ ଆହତ ହୋଇଥିବା ଆୟର ଏବେ ଅତିକମରେ ଦୁଇ ମାସ ପାଇଁ ଖେଳରୁ ଦୂରରେ ରହିବେ । ଜାତୀୟ ଗଣମାଧ୍ୟମର ଏକ ରିପୋର୍ଟ ଅନୁଯାୟୀ, ଆୟରଙ୍କୁ ସମ୍ପୂର୍ଣ୍ଣ ସୁସ୍ଥ ହେବାକୁ ପ୍ରାୟ ଆଠ ସପ୍ତାହ ଲାଗିପାରେ । ଏହାର ଅର୍ଥ ସେ କେବଳ ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜ୍ ନୁହେଁ ବରଂ ଜାନୁଆରୀରେ ହେବାକୁ ଥିବା ନ୍ୟୁଜିଲ୍ୟାଣ୍ଡ ବିପକ୍ଷ ଦିନିକିଆ ସିରିଜ୍ ମଧ୍ୟ ନ ଖେଳିପାରନ୍ତି ।