ଆର୍ୟାଲାଣ୍ଡ ବିପକ୍ଷ ପ୍ରଥମ ମ୍ୟାଚ୍‌ରେ ଶୋଚନୀୟ ପରାଜୟ ପରେ ଆଜି ଖେଳାଯିବ ଦ୍ବିତୀୟ ତଥା ଶେଷ ମ୍ୟାଚ୍‌ । ଏହି ମ୍ୟାଚ୍‌ ବେଲଫାଷ୍ଟର ସିଭିଲ୍‌ ସର୍ଭିସ୍‌ କ୍ରିକେଟ୍‌ କ୍ଲବରେ ଖେଳାଯିବ । ଭାରତୀୟ ସମୟ ସନ୍ଧ୍ୟା ୬ଟାରେ ଏହି ମ୍ୟାଚ୍ ଖେଳାଯିବ ।

ଏହା ପ୍ରଥମ ଥର ପାଇଁ ଆର୍ୟାଲାଣ୍ଡ ଏକ ଅନ୍ତର୍ଜାତୀୟ ମ୍ୟାଚ୍‌ରେ ଭାରତକୁ ପରାସ୍ତ କରିଥିଲା । ପ୍ରଥମ ମ୍ୟାଚ୍‌ରେ ଶୋଚନୀୟ ପରାଜୟ ପରେ ଏବେ ଅଧିନାୟକ ଶ୍ରେୟସ ଆୟରଙ୍କ ନେତୃତ୍ୱରେ ଯୁବ ଭାରତୀୟ ଦଳ ଆଜିର ମ୍ୟାଚ୍‌ରେ ବିଜୟଲାଭ କରି ସମ୍ମାନ ରକ୍ଷା କରିବାକୁ ଚେଷ୍ଟା କରିବ ।

ଭାରତ-ଆର୍ୟାଲାଣ୍ଡ ମଧ୍ୟରେ ଖେଳାଯାଇଥିବା ପ୍ରଥମ ମ୍ୟାଚ୍‌ରେ ଭାରତୀୟ ବ୍ୟାଟିଂ ପୂରା ଫ୍ଲପ୍‌ ଥିଲା । ଟପ୍‌ ଅର୍ଡର ବଡ଼ ପାର୍ଟନରସିପ୍‌ କରିବାରେ ବିଫଳ ହୋଇଥିଲା । ୧୮୩ ରନ୍‌ର ଲକ୍ଷ୍ୟ ପିଛା କରିବା ସମୟରେ ଦଳ ୧୪୮ ରନ୍‌ରେ ଅଲ୍‌ଆଉଟ୍ ହୋଇଯାଇଥିଲା ।

ଏପରି ପରିସ୍ଥିତିରେ, ଦ୍ୱିତୀୟ ମ୍ୟାଚ୍‌ରେ ଭାରତୀୟ ବ୍ୟାଟ୍ସମ୍ୟାନ୍‌ଙ୍କଠାରୁ ଭଲ ପ୍ରଦର୍ଶନ ଆଶା କରାଯିବ। ଏହି ମ୍ୟାଚ୍‌ ପୂର୍ବରୁ ସବୁଠାରୁ ବଡ଼ ଚର୍ଚ୍ଚା ହେଉଛି ୧୫ ବର୍ଷୀୟ ବୈଭବ ସୂର୍ଯ୍ୟବଂଶୀଙ୍କୁ ନେଇ । ତାଙ୍କୁ ପ୍ରଥମ ଟି-୨୦ରେ ଡେବ୍ୟୁ କରିବାର ସୁଯୋଗ ମିଳିନଥିଲା, କିନ୍ତୁ ପରାଜୟ ପରେ ଦଳ ପରିଚାଳନା ପ୍ଲେଇଂ ଇଲେଭେନରେ ପରିବର୍ତ୍ତନ କରିପାରନ୍ତି । ସଞ୍ଜୁ ସାମସନ୍‌ଙ୍କ ସ୍ଥାନରେ ବୈଭବଙ୍କୁ ସୁଯୋଗ ମିଳିପାରେ ବୋଲି ଚର୍ଚ୍ଚା ହେଉଛି ।

ଅନ୍ୟପକ୍ଷରେ, ଟିମ୍ ମ୍ୟାନେଜମେଣ୍ଟ ଦ୍ୱିତୀୟ ଟି-୨୦ରୁ ୱାଶିଂଟନ ସୁନ୍ଦରଙ୍କୁ ବାଦ୍ ଦେଇପାରନ୍ତି । ଯଦି ଏହା ହୁଏ, ତେବେ ଭାରତ ସ୍ପିନର ରବି ବିଷ୍ଣୋଇ କିମ୍ବା ଅଲରାଉଣ୍ଡର ସୂର୍ଯ୍ୟାଂଶ ସେଡଗେଙ୍କୁ ସୁଯୋଗ ଦେଇପାରେ । ପ୍ରଥମ ଟି-୨୦ ମ୍ୟାଚ୍‌ରେ ସୁନ୍ଦର ବୋଲିଂ ଏବଂ ବ୍ୟାଟିଂ ଉଭୟରେ ବିଫଳ ହୋଇଥିଲେ ।

ସେହିପରି ଦ୍ରୁତ ବୋଲର ପ୍ରସିଦ୍ଧ କ୍ରିଷ୍ଣାଙ୍କୁ ମଧ୍ୟ ଚୁଡ଼ାନ୍ତ ଏକାଦଶରୁ ବାଦ ଦିଆଯାଇପାରେ । ପ୍ରସିଦ୍ଧ ପ୍ରଥମ ମ୍ୟାଚରେ ୫୭ ରନ ଦେଇଥିଲେ। ପ୍ରିନ୍ସ ଯାଦବ କ୍ରିଷ୍ଣାଙ୍କ ସ୍ଥାନ ନେଇପାରନ୍ତି । ପ୍ରିନ୍ସ ଏପର୍ଯ୍ୟନ୍ତ ତାଙ୍କର ଟି-୨୦ ଡେବ୍ୟୁ କରିନାହାଁନ୍ତି। ସାମଗ୍ରିକ ଭାବରେ, କ୍ରିକେଟ୍ ପ୍ରଶଂସକମାନେ ଉତ୍ସାହର ସହିତ ଅପେକ୍ଷା କରିଛନ୍ତି ଯେ ବୈଭବ ଏହି ମ୍ୟାଚରେ ଭାରତ ପାଇଁ ତାଙ୍କର ଅନ୍ତର୍ଜାତୀୟ ଡେବ୍ୟୁ କରିବେ କି ନାହିଁ ।