ଭାରତ-ନ୍ୟୁଜିଲାଣ୍ଡ ଦିନିକିଆ ସିରିଜ ପୂର୍ବରୁ ଟିମ୍ ଇଣ୍ଡିଆ ପାଇଁ ଆସିଛି ଭଲ ଖବର । ଏହି ବଡ଼ ସିରିଜ୍‌ ପୂର୍ବରୁ ଷ୍ଟାର ବ୍ୟାଟ୍ସମ୍ୟାନ୍ ଶ୍ରେୟସ୍ ଆୟରଙ୍କୁ ଫିଟ୍ ଘୋଷଣା କରାଯାଇଛି । ଯାହା ଫଳରେ ନ୍ୟୁଜିଲାଣ୍ଡ ବିପକ୍ଷରେ ଭାରତୀୟ ଦଳରେ ଆୟର ଖେଳିବା ଏକ ପ୍ରକାର ସୁନିଶ୍ଚିତ ହୋଇଛି । କିୱି ବିପକ୍ଷରେ ଘୋଷିତ ଭାରତୀୟ ଦଳରେ ଆୟରଙ୍କୁ ସାମିଲ କରାଯାଇଥିଲା । କିନ୍ତୁ ତାଙ୍କର ଉପଲବ୍ଧତା ଏକ ସର୍ତ୍ତ ଅଧୀନରେ ଥିଲା: ଯଦି ସେ ଫିଟନେସ୍ କ୍ଲିୟରାନ୍ସ ପାଆନ୍ତି ତେବେ ତାଙ୍କୁ କେବଳ ଫିଲ୍ଡକୁ ଯିବାକୁ ଅନୁମତି ମିଳିବ ।

କିନ୍ତୁ ବର୍ତ୍ତମାନ ଶ୍ରେୟସ୍ ଆୟରଙ୍କୁ ବିସିସିଆଇର ସେଣ୍ଟର ଅଫ୍ ଏକ୍ସିଲେନ୍ସ (COE) ରୁ ଫିଟନେସ୍ କ୍ଲିୟରାନ୍ସ ମିଳିଛି। ଅଷ୍ଟ୍ରେଲିଆ ଗସ୍ତରେ ସିଡନୀ ଦିନିକିଆ ସମୟରେ ଶ୍ରେୟସ୍ ଆଘାତ ପାଇଥିଲେ । ବାଉଣ୍ଡ୍ରି ନିକଟରେ ଏକ କ୍ୟାଚ୍ ନେବା ସମୟରେ ସେ ତାଙ୍କ ପଞ୍ଜରାରେ ଜୋରଦାର ଆଘାତ ଲାଗିଥିଲା । ଯାହା ଫଳରେ ଆଭ୍ୟନ୍ତରୀଣ ରକ୍ତସ୍ରାବ ଏବଂ ପ୍ଳୀହା କ୍ଷତି ହୋଇଥିଲା । ଏହି ଆଘାତ କାରଣରୁ ସେ କିଛି ଦିନ କ୍ରିକେଟରୁ ବ୍ରେକ୍‌ ନେଇଥିଲେ । ସେ ଦକ୍ଷିଣ ଆଫ୍ରିକା ବିପକ୍ଷ ଘରୋଇ ସିରିଜ୍ ଏବଂ ସୟଦ ମୁସ୍ତାକ ଅଲି ଟ୍ରଫି ମଧ୍ୟ ଖେଳିପାରିନଥିଲେ ।

ଭାରତର ଦିନିକିଆ ଉପ-ଅଧିନାୟକ ଶ୍ରେୟସ୍ ଆୟର ଆଘାତରୁ ସୁସ୍ଥ ହେବା ପରେ ଏକ ଦୃଢ଼ ପ୍ରତ୍ୟାବର୍ତ୍ତନ କରିଛନ୍ତି। ମଙ୍ଗଳବାର ଜୟପୁରର ଜୟପୁରିଆ ବିଦ୍ୟାଳୟ ଗ୍ରାଉଣ୍ଡରେ ହିମାଚଳ ପ୍ରଦେଶ ବିପକ୍ଷରେ ବିଜୟ ହଜାରେ ଟ୍ରଫି ମ୍ୟାଚରେ ଶ୍ରେୟସ ଅଧିନାୟକ ଇନିଂସ ଖେଳିଥିଲେ । ସେ ୫୩ ବଲରୁ ୮୨ ରନ୍ କରିଥିଲେ ।
ନ୍ୟୁଜିଲାଣ୍ଡ ବିପକ୍ଷ ଏକଦିବସୀୟ ସିରିଜ ପାଇଁ ଭାରତୀୟ ଦଳ: ଶୁବମନ ଗିଲ୍‌ (ଅଧିନାୟକ), ରୋହିତ ଶର୍ମା, ବିରାଟ କୋହଲି, କେ.ଏଲ୍ ରାହୁଲ (ୱିକେଟ୍ କିପର), ଶ୍ରେୟସ୍ ଆୟର (ଉପ-ଅଧିନାୟକ *), ୱାଶିଂଟନ୍ ସୁନ୍ଦର, ରବିନ୍ଦ୍ର ଜାଡେଜା, ମହମ୍ମଦ ସିରାଜ, ହର୍ଷିତ ରାଣା, ପ୍ରସିଦ୍ଧ କ୍ରିଷ୍ଣା, କୁଲଦୀପ ଯାଦବ, ଅର୍ଶଦୀପ ସିଂ, ଯଶସ୍ୱୀ ଜୟସ୍ବାଲ

ଭାରତ ବନାମ ନ୍ୟୁଜିଲାଣ୍ଡ କାର୍ଯ୍ୟସୂଚୀ

ଜାନୁଆରୀ ୧୧: ପ୍ରଥମ ODI, ଭଦୋଦରା
ଜାନୁଆରୀ ୧୪: ଦ୍ୱିତୀୟ ODI, ରାଜକୋଟ
ଜାନୁଆରୀ ୧୮: ତୃତୀୟ ODI, ଇନ୍ଦୋର
ଜାନୁଆରୀ ୨୧: ପ୍ରଥମ T-୨୦, ନାଗପୁର
ଜାନୁଆରୀ ୨୩: ଦ୍ୱିତୀୟ T-୨୦, ରାୟପୁର
ଜାନୁଆରୀ ୨୫: ତୃତୀୟ T-୨୦, ଗୁଆହାଟୀ
ଜାନୁଆରୀ ୨୮: ଚତୁର୍ଥ T-୨୦, ବିଶାଖାପାଟନମ୍
ଜାନୁଆରୀ ୩୧: ପଞ୍ଚମ T-୨୦, ଥିରୁବନନ୍ତପୁରମ୍