IPL ୨୦୨୬ ପରେ ଭାରତୀୟ T20 ଦଳରେ ଏକ ବଡ଼ ପରିବର୍ତ୍ତନ ହୋଇଛି । ବିସିସିଆଇ ଆଗାମୀ ଆର୍ୟାଲାଣ୍ଡ, ଇଂଲଣ୍ଡ ଓ ଏସିଆନ୍‌ ଗେମ୍ସ ପାଇଁ ଦଳ ଘୋଷଣା କରିଛି । ଭାରତୀୟ ଟି-୨୦ ଦଳର ଅଧିନାୟକ ପଦରୁ ସୂର୍ଯ୍ୟକୁମାର ଯାଦବଙ୍କୁ ହଟାଇ ବିସିସିଆଇ ଶ୍ରେୟସ ଆୟରଙ୍କୁ ନୂଆ କ୍ୟାପଟେନ୍‌ ଭାବେ ନିଯୁକ୍ତି କରିଛି । ଏମତିକି ସୂର୍ଯ୍ୟଙ୍କୁ ଖେଳାଳି ଭାବରେ ଭାରତୀୟ T20 ଦଳରେ ସ୍ଥାନ ମଧ୍ୟ ମିଳିନାହିଁ ।

ଶ୍ରେୟସ ଆୟର ଅଧିନାୟକ ହେବା ପରେ ପୂର୍ବତନ ଭାରତୀୟ ଅଧିନାୟକ ରୋହିତ ଶର୍ମାଙ୍କ ପ୍ରଥମ ଥର ପାଇଁ ପ୍ରତିକ୍ରିୟା ରଖିଛନ୍ତି । ସେ ମୁମ୍ବାଇ T20 ଲିଗ୍ ସମୟରେ ଶ୍ରେୟସଙ୍କ ଅଧିନାୟକତ୍ୱକୁ ପ୍ରଶଂସା କରିଛନ୍ତି ।

ରୋହିତ ଶର୍ମା କହିଛନ୍ତି, " "ଆଇପିଏଲରେ ସେ ଯେଉଁଭଳି ଭାବରେ ତାଙ୍କ ଦଳର ଅଧିନାୟକତ୍ୱ କରିଛନ୍ତି, ତାହାକୁ ଦେଖି ମୁଁ କହିପାରିବି ଯେ ସେ ଟିମ୍ ଇଣ୍ଡିଆର ଦାୟିତ୍ୱ ବହୁତ ଭଲ ଭାବରେ ସମ୍ଭାଳିବେ ।" ରୋହିତ ଏବଂ ଶ୍ରେୟସ ଉଭୟ ମୁମ୍ବାଇର । ଯେତେବେଳେ ରୋହିତ ଶର୍ମା ଭାରତୀୟ ଦଳର ଅଧିନାୟକ ଥିଲେ, ସେ ଶ୍ରେୟସ ଆୟରଙ୍କୁ ଟିମ୍ ଇଣ୍ଡିଆରେ ଅନେକ ସୁଯୋଗ ଦେଇଥିଲେ ।

ଶ୍ରେୟସ ଆୟର ଆଇପିଏଲରେ ମଧ୍ୟ କ୍ୟାପଟେନ୍‌ ଭାବେ ଦମଦାର ପ୍ରଦର୍ଶନ କରିଛନ୍ତି । ଆୟରଙ୍କ ଅଧିନାୟକତ୍ବରେ IPL 2024 ରେ KKR ଟ୍ରଫି ଜିତିଥିଲା । ଏହାପରେ ପଞ୍ଜାବ କିଙ୍ଗ୍ସକୁ IPL ୨୦୨୫ରେ ଫାଇନାଲ ପର୍ଯ୍ୟନ୍ତ ନେଇଥିଲେ । ଏହି ସିଜିନ୍‌ରେ ମଧ୍ୟ ଭଲ କ୍ୟାପଟେନ୍ସୀ କରିଥିଲେ ଆୟର । ଏସବୁ ବିଚାର କରି ଆୟରଙ୍କୁ ଏବେ ଭାରତୀୟ ଟି-୨୦ ଦଳର ଅଧିନାୟକ ଦାୟିତ୍ବ ମିଳିଛି ।

କିନ୍ତୁ ସୂର୍ଯ୍ୟକୁମାର ଯାଦବଙ୍କୁ ଟି-୨୦ ଦଳର ଅଧିନାୟକ ପଦରୁ ହଟାଇବା ନେଇ ପ୍ରଶ୍ନ ଉଠୁଛି । କାହିଁକି ନା ସୂର୍ଯ୍ୟକୁମାର ତାଙ୍କ ଅଧିନାୟକତ୍ବରେ ଭାରତକୁ ଏସିଆ କପ୍ ୨୦୨୫ ଏବଂ T20 ବିଶ୍ୱକପ୍ ୨୦୨୬ ରେ ବିଜୟୀ କରାଇଥିଲେ। ତାଙ୍କ ନେତୃତ୍ୱରେ ଭାରତ ୫୨ଟି ଟି-୨୦ ମ୍ୟାଚ୍ ଖେଳିଛି, ସେଥିମଧ୍ୟରୁ ୪୨ଟିରେ ବିଜୟଲାଭ କରିଥିବା ବେଳେ ୮ଟି ମ୍ୟାଚ୍‌ରେ ପରାସ୍ତ ହୋଇଥିଲା ।