Delhi Capitals Head Coach / ଦିଲ୍ଲୀକୁ ଫେରିଲା ଦାଦାଙ୍କ ଦବଦବା, ହେଡ୍ କୋଚ୍ ହେଲେ ଗାଙ୍ଗୁଲି...ଯୁବରାଜଙ୍କୁ ନେଇ ବଢ଼ିଲା ଚର୍ଚ୍ଚା

ଦିଲ୍ଲୀକୁ ଫେରିଲା ଦାଦାଙ୍କ ଦବଦବା । IPL ୨୦୨୭ ପୂର୍ବରୁ ବଡ଼ ନିଷ୍ପତ୍ତି ନେଇ ସୌରଭ ଗାଙ୍ଗୁଲିଙ୍କୁ ହେଡ୍ କୋଚ୍ ଦାୟିତ୍ୱ ଦେଇଛି ଦିଲ୍ଲୀ କ୍ୟାପିଟାଲ୍ସ । ଦୁଇ ସିଜିନ୍‌ର ବିଫଳତା ପରେ ଦଳ ଏବେ ଚାହୁଁଛି ଏକ ନୂଆ ଆକ୍ରମଣାତ୍ମକ ରଣନୀତି । ଆଉ ଗାଙ୍ଗୁଲିଙ୍କ ସହ ଯୁବରାଜ ସିଂହଙ୍କ ନାଁକୁ ନେଇ ଚର୍ଚ୍ଚା ଏହି ନୂଆ ଟିମ୍ କମ୍ବିନେସନ୍‌କୁ ଆହୁରି ରୋଚକ କରିଦେଇଛି ।

ଦିଲ୍ଲୀ କ୍ୟାପିଟାଲ୍ସ ଆଇପିଏଲ୍ ୨୦୨୭ ପୂର୍ବରୁ ନିଜ ହେଡ୍ କୋଚ୍ ପଦରେ ବଡ଼ ପରିବର୍ତ୍ତନ କରିଛି । ପୂର୍ବତନ ଭାରତୀୟ କ୍ୟାପଟେନ୍‌ ତଥା ଦିଲ୍ଲୀ କ୍ୟାପିଟାଲ୍ସ ସହ ଦୀର୍ଘ ସମୟ ଧରି ଜଡ଼ିତ ଥିବା ସୌରଭ ଗାଙ୍ଗୁଲିଙ୍କୁ ଦଳର ନୂଆ ହେଡ୍ କୋଚ୍ ଭାବେ ନିଯୁକ୍ତ କରାଯାଇଛି । ଏହା ଆଇପିଏଲ୍‌ରେ ଗାଙ୍ଗୁଲିଙ୍କ ପାଇଁ ଏକ ନୂଆ ଦାୟିତ୍ୱ ହେବ ।
ଗାଙ୍ଗୁଲି ଏହା ପୂର୍ବରୁ ଦିଲ୍ଲୀ ଫ୍ରାଞ୍ଚାଇଜି ସହ ଡାଇରେକ୍ଟର୍ ଭାବେ କାମ କରିଛନ୍ତି । ୨୦୧୯ରୁ ସେ ଦିଲ୍ଲୀ କ୍ୟାପିଟାଲ୍ସ ଫ୍ରାଞ୍ଚାଇଜି ସହ ଜଡ଼ିତ ରହିଛନ୍ତି । ଏବେ ପ୍ରଥମଥର ପାଇଁ ସେ ଆଇପିଏଲ୍‌ରେ ଦିଲ୍ଲୀ ଦଳର ହେଡ୍ କୋଚ୍ ଦାୟିତ୍ୱ ନେବେ ।

ହେମଙ୍ଗ ବଦାନୀଙ୍କ ସ୍ଥାନ ନେବେ ଗାଙ୍ଗୁଲି

ସୌରଭ ଗାଙ୍ଗୁଲି ହେମଙ୍ଗ ବଦାନୀଙ୍କ ସ୍ଥାନ ନେବେ । ବଦାନୀ ଗତ ଦୁଇଟି ସିଜିନ୍‌ରେ ଦିଲ୍ଲୀ କ୍ୟାପିଟାଲ୍ସର ହେଡ୍ କୋଚ୍ ଥିଲେ । ତେବେ ତାଙ୍କ ନେତୃତ୍ୱରେ ଦଳ ଗତ ଦୁଇ ସିଜିନ୍‌ରେ ପ୍ଲେଅଫ୍‌ରେ ପହଞ୍ଚିବାରେ ବିଫଳ ହୋଇଥିଲା । ଆଇପିଏଲ୍ ୨୦୨୫ରେ ଦିଲ୍ଲୀ ପଞ୍ଚମ ସ୍ଥାନରେ ରହିଥିବାବେଳେ ୨୦୨୬ ସିଜିନ୍‌ରେ ଦଳ ଷଷ୍ଠ ସ୍ଥାନରେ ରହିଥିଲା ।

Dilli, it's time for Dadagiri 🐅 Sourav Ganguly, Head Coach of the Tigers 🔥 https://t.co/EMTPQ9TB64

— Delhi Capitals (@DelhiCapitals) October 6, 2026

ସପୋର୍ଟ ଷ୍ଟାଫ୍‌ରେ ମଧ୍ୟ ବଡ଼ ପରିବର୍ତ୍ତନ

ଗାଙ୍ଗୁଲିଙ୍କ ସହ ଦିଲ୍ଲୀ କ୍ୟାପିଟାଲ୍ସର କୋଚିଂ ଷ୍ଟାଫ୍‌ରେ ମଧ୍ୟ ବଡ଼ ପରିବର୍ତ୍ତନ ହେବାକୁ ଯାଉଛି । ଦଳ ବୋଲିଂ କୋଚ୍‌ ମୁନାଫ୍ ପଟେଲ, ସହାୟକ କୋଚ୍ ଇଆନ୍ ବେଲ୍ ଏବଂ ଟିମ୍ ଡାଇରେକ୍ଟର୍ ବେଣୁଗୋପାଳ ରାଓଙ୍କୁ ରିଟେନ୍ କରିନାହିଁ । ଗାଙ୍ଗୁଲି ନିଜ ପସନ୍ଦର ସପୋର୍ଟ ଷ୍ଟାଫ୍ ସହ ଦଳ ଗଠନ କରିବାକୁ ଚାହୁଁଥିବା କୁହାଯାଉଛି ।

ଗାଙ୍ଗୁଲିଙ୍କ ସହ ଯୋଗ ଦେଇପାରନ୍ତି ଯୁବରାଜ ସିଂହ

ଏସବୁ ମଧ୍ୟରେ ଦିଲ୍ଲୀ କ୍ୟାପିଟାଲ୍ସର ନୂଆ କୋଚିଂ ଷ୍ଟାଫ୍‌କୁ ନେଇ ଆଉ ଏକ ବଡ଼ ଚର୍ଚ୍ଚା ଆରମ୍ଭ ହୋଇଛି । ପୂର୍ବତନ ଭାରତୀୟ ଷ୍ଟାର୍ ଅଲରାଉଣ୍ଡର୍ ଯୁବରାଜ ସିଂହ ଗାଙ୍ଗୁଲିଙ୍କ ସହ ଦିଲ୍ଲୀ କ୍ୟାପିଟାଲ୍ସରେ ଯୋଗ ଦେଇପାରନ୍ତି ବୋଲି ଚର୍ଚ୍ଚା ହେଉଛି । ତେବେ ଏନେଇ ଏପର୍ଯ୍ୟନ୍ତ କୌଣସି ଅଧିକାରିକ ଘୋଷଣା ହୋଇନାହିଁ ।
ଗତ ବର୍ଷ SA20ରେ ଗାଙ୍ଗୁଲି ପ୍ରିଟୋରିଆ କ୍ୟାପିଟାଲ୍ସର ହେଡ୍ କୋଚ୍ ଭାବେ ଦାୟିତ୍ୱ ନେଇଥିଲେ ଏବଂ ତାଙ୍କ ଦଳ ଫାଇନାଲ୍ ପର୍ଯ୍ୟନ୍ତ ପହଞ୍ଚିଥିଲା ।

ହେଡ୍ କୋଚ୍ ହେବା ପରେ କ'ଣ କହିଲେ ଗାଙ୍ଗୁଲି ?

ଦିଲ୍ଲୀ କ୍ୟାପିଟାଲ୍ସର ହେଡ୍ କୋଚ୍ ଦାୟିତ୍ୱ ମିଳିବା ପରେ ଗାଙ୍ଗୁଲି ନିଜର ଖୁସି ପ୍ରକାଶ କରିଛନ୍ତି । ସେ କହିଛନ୍ତି ଯେ ଆଇପିଏଲ୍‌ରେ ଦିଲ୍ଲୀ କ୍ୟାପିଟାଲ୍ସର ହେଡ୍ କୋଚ୍ ହେବାକୁ ସେ ଉତ୍ସାହିତ । ଦିଲ୍ଲୀ ଫ୍ରାଞ୍ଚାଇଜି ତାଙ୍କ ହୃଦୟର ଅତି ନିକଟ ଏବଂ ବର୍ଷ ବର୍ଷ ଧରି ଏହି ଫ୍ରାଞ୍ଚାଇଜି ସହ ତାଙ୍କ ସମ୍ପର୍କ ଆହୁରି ମଜବୁତ ହୋଇଛି ବୋଲି ସେ କହିଛନ୍ତି । ଗାଙ୍ଗୁଲିଙ୍କ ଲକ୍ଷ୍ୟ ଏକ ଶକ୍ତିଶାଳୀ ଏବଂ ନିର୍ଭୀକ ଦଳ ଗଠନ କରିବା ।

ସେହିପର ଆଇପିଏଲ୍ ୨୦୨୭ ପୂର୍ବରୁ ଦଳକୁ ଫେରିଛନ୍ତି ଓ୍ବିକେଟ୍‌ କିପର ବ୍ୟାଟ୍ସମ୍ୟାନ୍‌ ଋଷଭ ପନ୍ତ । ଋଷଭ ଗତ ଦୁଇ ସିଜିନ୍‌ରେ ଲକ୍ଷ୍ନୌ ସୁପର୍ ଜାଏଣ୍ଟସ୍‌ର ଅଧିନାୟକ ଥିଲେ । କିନ୍ତୁ ଆଇପିଏଲ୍ ୨୦୨୬ ଶେଷ ହେବା ପରେ ଦିଲ୍ଲୀ କ୍ୟାପିଟାଲ୍ସ ଏବଂ ଲକ୍ଷ୍ନୌ ସୁପର୍ ଜାଏଣ୍ଟସ୍ ମଧ୍ୟରେ ଟ୍ରେଡ୍ ହୋଇଥିଲା । ଏହି ଡିଲ୍‌ରେ ପନ୍ତ ୧୨ କୋଟି ଟଙ୍କା ଦରମା କମାଇ ୧୫ କୋଟି ଟଙ୍କାରେ ଦିଲ୍ଲୀକୁ ଫେରିଥିଲେ । ଅନ୍ୟପକ୍ଷରେ ସ୍ପିନ୍ ବୋଲର୍ କୁଲଦୀପ ଯାଦବ ୧୩.୫ କୋଟି ଟଙ୍କାରେ LSGକୁ ଯାଇଥିଲେ ।