ଲସ୍ ଆଞ୍ଜେଲସ୍: ୨୦୨୬ ଫିଫା ବିଶ୍ୱକପ୍ ସେମିଫାଇନାଲ ପାଇଁ ଟିକେଟ୍ ପକ୍କା କଲା ସ୍ପେନ୍ । କ୍ୱାର୍ଟର ଫାଇନାଲ୍ ମ୍ୟାଚ୍‌ରେ ସ୍ପେନ୍ ଏକ ଚମତ୍କାର ପ୍ରଦର୍ଶନ କରି ବେଲଜିୟମ୍‌କୁ ୨-୧ ଗୋଲରେ ପରାସ୍ତ କରିଛି । ଦୀର୍ଘ ୧୬ବର୍ଷ ଅର୍ଥାତ୍ ୨୦୧୦ ପରେ ପ୍ରଥମ ଥର ପାଇଁ ସ୍ପେନ୍ ବିଶ୍ୱକପ୍‌ର ସେମିଫାଇନାଲରେ ସ୍ଥାନ ପାଇଛି । ସେମିଫାଇନାଲ ମ୍ୟାଚରେ ସ୍ପେନ୍ ଗତ ବିଶ୍ୱକପ୍‌ରେ ଫାଇନାଲ୍ ପହଞ୍ଚିଥିବା ଦଳ ଫ୍ରାନ୍ସକୁ ଭେଟିବ, ଯାହାକି ବେଶ ରୋମାଞ୍ଚକର ହେବାକୁ ଯାଉଛି ।

• ଫାବିଆନ ରୁଇଜ୍ ଦଳକୁ ଦେଇଥିଲେ ଭଲ ଆରମ୍ଭ

ସ୍ପେନର ସଫଳତା ମ୍ୟାଚର ୩୦ ମିନିଟରେ ମିଳିଯାଇଥିଲା । ଲାମିନ୍ ୟାମାଲଙ୍କ ଚମତ୍କାର ରନ ପରେ, ପେଡ୍ରୋ ପୋରୋ ବକ୍ସ ଭିତରକୁ ଏକ ଲୋୟର କ୍ରସ୍ ଦେଇଥିଲେ । ବେଲଜିୟମ ଗୋଲକିପର ଥିବଟ୍ କୋର୍ଟୁଆ ପ୍ରାରମ୍ଭରେ ଡାନି ଓଲମୋଙ୍କ ସଟକୁ ଅଟକାଇଥିଲେ, କିନ୍ତୁ ଫାବିଆନ୍ ରୁଇଜ୍ ରିବାଉଣ୍ଡରେ ବଲ୍ ନେଟରେ ହେଡ୍ କରି ନିଜ ଦଳ ସ୍ପେନକୁ ୧-୦ରେ ଆଗୁଆ କରିଥିଲେ ।

ଏହାପରେ ବେଲଜିୟମ ସ୍ପେନକୁ ମ୍ୟାଚରେ ଆଗୁଆ ହେବାକୁ ଅଧିକ ସମୟ ପର୍ଯ୍ୟନ୍ତ ସୁଯୋଗ ଦେଇ ନଥିଲା ଏବଂ ମ୍ୟାଚର ୪୧ ମିନିଟରେ ପ୍ରଥମ ଗୋଲ କରିଥିଲା । ଏହାପରେ ଚାର୍ଲ୍ସ ଡି କେଟେଲିୟର, ଟିମୋଥିଙ୍କ ଏକ ଚମତ୍କାର କ୍ରସର ଜବାବ ଦେଇ ଦମଦାର ହେଡର ସାହାଯ୍ୟରେ ସ୍କୋରକୁ ୧-୧ରେ ସମାନ କରିଥିଲେ। ଏହି ଗୋଲ ସ୍ପେନ ଗୋଲକିପର ଉନାଇ ସାଇମନଙ୍କ ଲଗାତାର ୬ଟି କ୍ଲିନ୍ ସିଟକୁ ଶେଷ କରିଦେଇଥିଲା । ଏହାପରେ ସାଇମନଙ୍କ ବିଶ୍ୱକପରେ ଲଗାତାର ୬୫୦ ମିନିଟ୍ ପର୍ଯ୍ୟନ୍ତ ଗୋଲ୍ ନ ଖାଇ ରହିବାର ରେକର୍ଡ ମଧ୍ୟ ଶେଷ ହୋଇଥିଲା ।

• ୭୧ ମିନିଟରେ ବେଲଜିୟମକୁ ଝଟକା

ମ୍ୟାଚ୍‌ର ୭୧ ମିନିଟରେ ବେଲଜିୟମକୁ ଏକ ବଡ଼ ବିପର୍ଯ୍ୟୟର ସମ୍ମୁଖୀନ ହେବାକୁ ପଡ଼ିଲା, ଯେତେବେଳେ ସେମାନଙ୍କର ଷ୍ଟାର ଗୋଲକିପର ଥିବଟ୍ କୋର୍ଟୁଆ ଆହତ ହୋଇ ପଡ଼ିଆ ଛାଡ଼ିଲେ। ଏହା ଫିଫା ବିଶ୍ୱକପ୍‌ରେ ତାଙ୍କର ୨୧ତମ ମ୍ୟାଚ୍ ଥିଲା । ଏହା ସହିତ ସେ ବିଶ୍ଵକପରେ ସବୁଠୁ ଅଧିକ ମ୍ୟାଚ୍ ଖେଳିଥିବା ଗୋଲକିପର ତାଲିକାରେ ଜର୍ମାନୀର ମାନୁଏଲ୍ ନ୍ୟୁୟର (୨୩ ମ୍ୟାଚ୍)ଙ୍କ ଦ୍ଵିତୀୟ ସ୍ଥାନକୁ ଆସିଛନ୍ତି । ଏହାପରେ ତାଙ୍କ ସ୍ଥାନରେ ଅନ୍ୟ ଜଣେ ଗୋଲକିପର ସେନେ ଲାମେନ୍ସଙ୍କୁ ଅଣାଯାଇଥିଲା । ମ୍ୟାଚ୍ ଅତିରିକ୍ତ ସମୟ ଆଡ଼କୁ ଗତି କରୁଥିବା ପରି ମନେ ହେଉଥିଲା, କିନ୍ତୁ ମ୍ୟାଚର ୮୬ ମିନିଟରେ ସ୍ପେନର ମିକେଲ୍ ମେରିନୋ ଦଳ ପାଇଁ ବିଜୟୀ ଗୋଲ୍ ସ୍କୋର କରି ସ୍ପେନକୁ ୨-୧ରେ ଆଗୁଆ କରିଥିଲେ ।

ପଢନ୍ତୁ ଏହି ଖବର: ବିଶ୍ୱକପ୍‌ରୁ ବିଦାୟ ନେଲେ ରୋନାଲ୍ଡୋ…ଆଖିରେ ଲୁହ, ସ୍ପେନ୍ ହାତରେ ଭାଙ୍ଗିଗଲା ପର୍ତ୍ତୁଗାଲର ସ୍ବପ୍ନ

• ଶେଷ ମୁହୂର୍ତ୍ତରେ ପଲଟିଗଲା ବାଜି

ଶେଷ ମିନିଟ୍‌ରେ ମ୍ୟାଚ୍‌ ନିର୍ଣ୍ଣୟାକ ମୁହୂର୍ତ୍ତକୁ ଗତି କରିଥିଲା । ବେଲଜିୟମ୍‌ର ନୂତନ ଗୋଲକିପର୍ ପାଉ କୁବାର୍ସିଙ୍କ ଦୂରଗାମୀ ସଟ୍‌କୁ ସଠିକ୍‌ ଭାବରେ ରୋକିବାରେ ଅସମର୍ଥ ହୋଇଥିଲେ । ତାଙ୍କ ହାତରୁ ବଲ୍ ଖସିଯାଇଥିଲା । ଆଉ ଠିକ୍ ଏତିକି ବେଳେ ମେରିନୋ ବିନା କୌଣସି ଭୁଲ୍ କରି ଏହି ସଟକୁ ଗୋଲରେ ପରିଣତ କରିଥିଲେ । ଏହା କ୍ରମାଗତ ଦ୍ୱିତୀୟ ମ୍ୟାଚ୍‌ ଥିଲା ଯେଉଁଥିରେ ବଦଳ ଖେଳାଳି ଭାବରେ ଆସିଥିବା ମେରିନୋ ଶେଷ ମିନିଟ୍‌ରେ ସ୍ପେନ୍‌ ପାଇଁ ନିର୍ଣ୍ଣାୟକ ଗୋଲ୍‌ କରିଥିଲେ । ପୂର୍ବରୁ ସେ ପ୍ରି-କ୍ୱାର୍ଟରଫାଇନାଲ୍‌ରେ ପର୍ତ୍ତୁଗାଲ୍‌ ବିପକ୍ଷରେ ମଧ୍ୟ ବିଜୟୀ ଗୋଲ୍‌ କରିଥିଲେ ।