ଫେବ୍ରୁଆରୀ ୭ରୁ ଆରମ୍ଭ ହେବାକୁ ଯାଉଛି ଟି-୨୦ ବିଶ୍ବକପ୍‌ । ଏଥିପାଇଁ ସମସ୍ତ ଦଳ ଜୋରଦାର ପ୍ରସ୍ତୁତି ଜାରି ରଖିଛନ୍ତି । କିନ୍ତୁ ବିଶ୍ବକପ୍‌ ଯେତିକି ପାଖେଉଛି ଟିମ୍‌ ଇଣ୍ଡିଆରେ ସଞ୍ଜୁ ସାମସନଙ୍କୁ ନେଇ ସମସ୍ୟା ସେତିକି ବଢ଼ିବାରେ ଲାଗୁଛି । କାହିଁକି ନା ଆଇସିସି ବିଶ୍ବକପ୍‌ ପୂର୍ବରୁ ଲଗାତର ଫ୍ଲପ୍‌ ହେଉଛନ୍ତି ଟିମ୍‌ ଇଣ୍ଡିଆର ଓପନର ସଞ୍ଜୁ ସାମସନ୍‌ ।

ଦକ୍ଷିଣ ଆଫ୍ରିକା ସିରିଜ୍‌ରେ ଶୁବମନ ଗିଲ୍‌ ବାରମ୍ବାର ଫେଲ୍‌ ହେବା ପରେ ତାଙ୍କୁ ନ୍ୟୁଜିଲାଣ୍ଡ ଓ ଟି-୨୦ ବିଶ୍ବକପ୍ ପାଇଁ ଘୋଷଣା ହୋଇଥିବା ଦଳରୁ ଗିଲ୍‌ଙ୍କୁ ବାଦ୍ ଦିଆଯାଇଥିଲା । ଶୁବମନଙ୍କୁ ବାଦ୍‌ ଦେବା ପରେ ନ୍ୟୁଜିଲାଣ୍ଡ ବିପକ୍ଷରେ ଖେଳାଯାଇଥିବା ୫ ମ୍ୟାଚ୍‌ ବିଶିଷ୍ଟ ଟି-୨୦ ସିରିଜ୍‌ରେ ସଞ୍ଜୁଙ୍କୁ ସୁଯୋଗ ମିଳିଥିଲା । କିନ୍ତୁ ୫ଟି ମ୍ୟାଚ୍‌ରେ କିଛି ବଡ଼ ସ୍କୋର କରିପାରିନଥିଲେ ସଞ୍ଜୁ । ସେ ଏହି ସିରିଜ୍‌ରେ ମାତ୍ର ୪୬ ରନ୍‌ କରିବାରେ ସଫଳ ହୋଇଥିଲେ । ସେହିପରି ଯଦି ୨୦୨୫ରୁ ଏପର୍ଯ୍ୟନ୍ତ କଥା କହିବା ତାହାଲେ ସଞ୍ଜୁ ୧୪ଟି ଇନିଂସରୁ ୧୦ଟି ଇନିଂସରେ ପାଓ୍ବାର ପ୍ଲେ ମଧ୍ୟରେ ଆଉଟ ହୋଇଛନ୍ତି । ଯାହା ସଞ୍ଜୁଙ୍କ ଖରାପ ଫର୍ମ ଦର୍ଶାଉଛି ।

ସେପଟେ ଟି-୨୦ ବିଶ୍ବକପ୍‌ ପୂର୍ବରୁ ଦଳକୁ ଆସିଥିବା ଇଶାନ କିଶାନ ଏବେ ଦମଦାର ଫର୍ମରେ ଅଛନ୍ତି । ନ୍ୟୁଜିଲାଣ୍ଡ ବିପକ୍ଷରେ ବିସ୍ଫୋରକ ବ୍ୟାଟିଂ କରି ନିଜ ସ୍ଥାନ ଦଳରେ ମଜବୁତ କରିଛନ୍ତି । ସେହିପରି ଆହାତ ସମସ୍ୟା ପାଇଁ ଦଳରୁ ବାଦ୍‌ ପଡ଼ିଥିବା ତିଲକ ବର୍ମା ଏବେ ସୁସ୍ଥ ହୋଇଛନ୍ତି । ସେ ବାଙ୍ଗାଲୋରସ୍ଥିତ ବିସିସିଆଇର ସେଣ୍ଟର ଅଫ୍‌ ଏକ୍ସିଲେନ୍ସୀରେ ଅଭ୍ୟାସ ମଧ୍ୟ ଆରମ୍ଭ କରିଛନ୍ତି ।

ଏପରି ସ୍ଥିତିରେ ବିଶ୍ବକପ୍‌ରେ ଆଉ ସଞ୍ଜୁ ସାମସନ ଓପନିଂ କରୁଥିବା ଦେଖିବାକୁ ମିଳିନପାରେ । ସଞ୍ଜୁଙ୍କ ସ୍ଥାନରେ ଇଶାନ କିଶାନ ଅଭିଷେକ ଶର୍ମାଙ୍କ ସହ ଓପନିଂ କରିପାରନ୍ତି ଏବଂ ୩ ନମ୍ବରରେ ତିଲକ ବର୍ମାଙ୍କୁ ସୁଯୋଗ ମିଳିପାରେ । ତେବେ ଟିମ୍‌ ମ୍ୟାନେଜମେଣ୍ଟ ଓ ଅଧିନାୟକ ସୂର୍ଯ୍ୟକୁମାର ଯାଦବ ସଞ୍ଜୁଙ୍କୁ ନେଇ ବିଶ୍ବକପ୍‌ରେ କି ନିଷ୍ପତ୍ତି ନେଉଛନ୍ତି ତାହା ଦେଖିବା ବେଶ୍‌ ରୋଚକ ହେବ ।