ଫେବୃଆରୀ ୭ରୁ ଆରମ୍ଭ ହେବାକୁ ଯାଉଛି ଟି-୨୦ ବିଶ୍ବକପ୍‌ । ଆଇସିସିର ଏହି ମେଗା ଟୁର୍ଣ୍ଣାମେଣ୍ଟ ଆରମ୍ଭ ହେବାକୁ ଆଉ ଏକ ମାସରୁ କମ୍‌ ସମୟ ବାକି ଅଛି । ଟି-୨୦ ବିଶ୍ବକପ୍ ପାଇଁ ଭାରତୀୟ ଦଳ ପୂର୍ବରୁ ୧୫ ଜଣିଆ ଦଳ ଘୋଷଣା କରିସାରିଛି । ବିଶ୍ୱକପ୍ ପୂର୍ବରୁ ଭାରତ ନ୍ୟୁଜିଲାଣ୍ଡ ବିପକ୍ଷରେ ପାଞ୍ଚ ମ୍ୟାଚ୍ ବିଶିଷ୍ଟ ସିରିଜ୍ ଖେଳିବ । ଯାହା ଏକ ଅଭ୍ୟାସ ଭାବରେ କାମ କରିବ ।

ବିଶ୍ୱକପ୍ ପାଇଁ ଘୋଷିତ ଭାରତୀୟ ଦଳ କଥା ଯଦି କହିବା ତାହାଲେ ଏହା ଏକ ବହୁତ ସନ୍ତୁଳିତ ଦଳ । ଯେଉଁଥିରେ ବ୍ୟାଟିଂ ଏବଂ ବୋଲିଂ ଉଭୟରେ ଡେପ୍ଥ ରହିଛି । କିନ୍ତୁ ଏହି ବଡ଼ ଟୁର୍ଣ୍ଣାମେଣ୍ଟ ପୂର୍ବରୁ ଭାରତର ଚିନ୍ତା ବଢ଼ାଇଛନ୍ତି ବିଶ୍ୱର ନମ୍ବର-୧ ଟି-୨୦ ବ୍ୟାଟ୍ସମ୍ୟାନ୍ ଅଭିଷେକ ଶର୍ମା । ଅଭିଷେକ ଏବେ ଖରାପ ଫର୍ମ ସହିତ ସଂଘର୍ଷ କରୁଛନ୍ତି ।

ଅଭିଷେକ ତାଙ୍କର ଆକ୍ରମଣାତ୍ମକ ବ୍ୟାଟିଂ ପାଇଁ ଜଣାଶୁଣା । କିନ୍ତୁ ଗତ ମାସ ଧରି ଅଭିଷେକ ଶର୍ମାଙ୍କ ବ୍ୟାଟ୍‌ ନୀରବ ରହିଛି । ତାଙ୍କର ଭଲ ଆରମ୍ଭ ହୋଇଛି କିନ୍ତୁ ସେ ଏକ ବଡ଼ ଇନିଂସ ସ୍କୋର କରିପାରି ନାହାଁନ୍ତି । ସେ ତାଙ୍କର ଶେଷ ୧୦ ଇନିଂସ (ଘରୋଇ ଏବଂ ଅନ୍ତର୍ଜାତୀୟ)ରେ କେବଳ ଗୋଟିଏ ଅର୍ଦ୍ଧଶତକ ହାସଲ କରିଛନ୍ତି । ତାଙ୍କର ଶେଷ ଅର୍ଦ୍ଧଶତକ ଡିସେମ୍ବର ୨ ତାରିଖରେ ଆସିଥିଲା । ତାହା ମଧ୍ୟ ଏକ ଘରୋଇ ମ୍ୟାଚରେ । ସେ ସୟଦ ମୁସ୍ତାକ ଅଲୀ ଟ୍ରଫିରେ ଅର୍ଦ୍ଧଶତକ ସ୍କୋର କରିଥିଲେ ।
ଏହା ପରେ ଅଭିଷେକ ଦକ୍ଷିଣ ଆଫ୍ରିକା ବିପକ୍ଷରେ ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ମଧ୍ୟ ଖେଳିଥିଲେ । ତଥାପି ତାଙ୍କ ବ୍ୟାଟ୍ ସମଗ୍ର ସିରିଜରେ ନୀରବ ରହିଲା । ସିରିଜରେ ତାଙ୍କର ସର୍ବାଧିକ ସ୍କୋର ଥିଲା ୩୫ । ମୁମ୍ବାଇ ବିପକ୍ଷରେ ଶେଷ ବିଜୟ ହଜାରେ ଟ୍ରଫି ମ୍ୟାଚରେ ଅଭିଷେକ କେବଳ ୮ ରନ୍ କରିପାରିଥିଲେ ।

ଅଭିଷେକଙ୍କ ଫର୍ମ ଟିମ୍‌ ଇଣ୍ଡିଆର ଚିନ୍ତା ବଢ଼ାଇଛି । କାରଣ ଗିଲ୍‌ଙ୍କ ଅନୁପସ୍ଥିତିରେ ଅଭିଷେକଙ୍କ ଉପରେ ଏକ ଦୃଢ଼ ଆରମ୍ଭ କରିବାର ବଡ଼ ଦାୟିତ୍ବ ରହିଛି । ଏସିଆ କପରେ ସମସ୍ତେ ତାଙ୍କ ଫର୍ମ ଦେଖିଥିଲେ । ସେ ଏସିଆ କପ୍‌ରେ ଆକ୍ରମଣାତ୍ମକ ବ୍ୟାଟିଂ କରି ପାଓ୍ବାର ପ୍ଲେ'ରେ ହିଁ ମ୍ୟାଚ୍‌କୁ ଏକତରଫା କରି ଦେଉଥିଲେ । କିନ୍ତୁ ବିଶ୍ବକପ୍‌ରେ ଯଦି ତାଙ୍କ ବ୍ୟାଟ୍ ନୀରବ ରୁହେ ତେବେ ଏହା ଚିନ୍ତାର ବିଷୟ ହେବ । ଅଧିନାୟକ ସୂର୍ଯ୍ୟ ମଧ୍ୟ ଫର୍ମ ବାହାରେ ଅଛନ୍ତି । ତିଲକ ବର୍ମାଙ୍କ ଫିଟନେସ୍ ମଧ୍ୟ ସନ୍ଦେହରେ ଅଛି । ଏହି ସମୟରେ, ଇଶାନ କିଶନଙ୍କ ଭୂମିକା ଏବେ ବି ଅନିଶ୍ଚିତ । ଏପରି ସ୍ଥିତିରେ ଅଭିଷେକଙ୍କ ଫର୍ମ ବେଶ୍ ଗୁରୁତ୍ବପୂର୍ଣ୍ଣ ।