ଫେବୃଆରୀ ୭ ତାରିଖରେ ଆରମ୍ଭ ହେବାକୁ ଥିବା ୨୦୨୬ ଟି-୨୦ ବିଶ୍ୱକପ୍ ଏବେ ବିବାଦ ଘେରରେ ରହିଛି । ଭାରତ ଏବଂ ଶ୍ରୀଲଙ୍କା ଦ୍ୱାରା ଆୟୋଜିତ ହେବାକୁ ଥିବା ବିଶ୍ୱକପ୍ ପାଇଁ ଆଉ ତିନି ସପ୍ତାହରୁ କମ୍ ସମୟ ବାକି ଅଛି । ଦିନ ପାଖେଇବା ସହ ପାକିସ୍ତାନୀ ବଂଶୋଦ୍ଭବ କ୍ରିକେଟରଙ୍କ ଚିନ୍ତା ବଢ଼ିବାରେ ଲାଗିଛି । ରିପୋର୍ଟ ଅନୁଯାୟୀ ପ୍ରାୟ ୪୨ ଜଣ ପାକିସ୍ତାନୀ ବଂଶୋଦ୍ଭବ କ୍ରିକେଟର ଏବଂ ଅଧିକାରୀଙ୍କ ଭିସା ଏପର୍ଯ୍ୟନ୍ତ ମଞ୍ଜୁର ହୋଇନାହିଁ ।

ଭିସା ବିଳମ୍ବ ଯୋଗୁଁ ଅନେକ ଦେଶ ଏପର୍ଯ୍ୟନ୍ତ ଟି-୨୦ ବିଶ୍ୱକପ୍ ପାଇଁ ସେମାନଙ୍କର ଦଳ ଘୋଷଣା କରିନାହାଁନ୍ତି । ଆଉ ଏବେ ଏହି ମାମଲାରେ ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ହସ୍ତକ୍ଷେପ କରିଛି । ଆମେରିକା ମଧ୍ୟ ଏହାର ଦଳ ଘୋଷଣା କରିନାହିଁ, ଯେଉଁଥିରେ ଅଲି ଖାନ ଏବଂ ଶାୟାନ ଜାହାଙ୍ଗୀର ସାମିଲ ହେବେ । ସେହିପରି ନେଦରଲ୍ୟାଣ୍ଡ ଏବଂ ଇଂଲଣ୍ଡର ମଧ୍ୟ ସେମାନଙ୍କ ଦଳରେ ପାକିସ୍ତାନୀ ବଂଶୋଦ୍ଭବ ଖେଳାଳି ଅଛନ୍ତି । ତଥାପି ନ୍ୟୁଜ ଏଜେନ୍ସି ପିଟିଆଇ ଅନୁଯାୟୀ ଆଦିଲ ରସିଦ, ରେହାନ ଅହମ୍ମଦ ଏବଂ ସାକିବ ମହମୁଦଙ୍କ ଭିସା ମଞ୍ଜୁର ହୋଇଛି ।

ଆଇସିସି ଦାୟିତ୍ୱ ନେଇଛି

ଟି-୨୦ ବିଶ୍ୱକପ୍ ଦଳରେ ସାମିଲ ପାକିସ୍ତାନୀ ବଂଶୋଦ୍ଭବ କ୍ରିକେଟରଙ୍କ ପାଇଁ ଭିସା ସୁରକ୍ଷିତ କରିବା ପାଇଁ ଆଇସିସି ଦାୟିତ୍ୱ ନେଇଛି । ଆଇସିସି ବିଶ୍ୱବ୍ୟାପୀ ଭାରତୀୟ ହାଇ କମିଶନଙ୍କ ସହିତ ନିରନ୍ତର ଯୋଗାଯୋଗରେ ଅଛି । ଲକ୍ଷ୍ୟ ହେଉଛି ସମସ୍ତ ଖେଳାଳି ଏବଂ ଅଧିକାରୀମାନେ ବିଳମ୍ବ କିମ୍ବା ଅସୁବିଧା ବିନା ସେମାନଙ୍କର ଭିସା ପାଇବା ନିଶ୍ଚିତ କରିବା । ଭିସା ପାଇବାର ଶେଷ ତାରିଖ ଜାନୁଆରୀ ୩୧ ରହିଛି ।

ଯେଉଁ ଦେଶଗୁଡ଼ିକର ଖେଳାଳିଙ୍କ ଭିସା ବିଚାରାଧୀନ ଅଛି ସେମାନଙ୍କ ମଧ୍ୟରେ ମୁଖ୍ୟତଃ ବାଂଲାଦେଶ, ଆମେରିକା, ୟୁଏଇ, ବାଂଲାଦେଶ, ଇଟାଲୀ ଏବଂ କାନାଡା ଅନ୍ତର୍ଭୁକ୍ତ । ଏହି ଖେଳାଳିମାନଙ୍କ ପାଇଁ ଭିସା ନିଯୁକ୍ତି ପ୍ରାୟ ତିନି ସପ୍ତାହ ପୂର୍ବରୁ ସ୍ଥିର କରାଯାଇଥିଲା, କିନ୍ତୁ ପ୍ରକ୍ରିୟା ଏବେ ଶେଷ ପର୍ଯ୍ୟାୟରେ ।

କାହିଁକି ବିଳମ୍ବ ହେଉଛି ?

ପାକିସ୍ତାନୀ ବଂଶୋଦ୍ଭବ ଲୋକଙ୍କୁ ଭିସା ପ୍ରଦାନ କରିବା ସମୟରେ ଭାରତ ଅତିରିକ୍ତ ଯାଞ୍ଚ କରେ । ଭିସା ମଞ୍ଜୁର କରିବା ପୂର୍ବରୁ ଅନେକ ବିଭାଗରୁ କ୍ଲିୟରାନ୍ସ ଆବଶ୍ୟକ । ଶେଷ ଏବଂ ସବୁଠାରୁ ଗୁରୁତ୍ୱପୂର୍ଣ୍ଣ ହେଉଛି ଗୃହ ମନ୍ତ୍ରଣାଳୟର କ୍ଲିୟରାନ୍ସ । ଯାହା ଫଳରେ T-୨୦ ବିଶ୍ୱକପ୍ ପାଇଁ ପାକିସ୍ତାନୀ ବଂଶୋଦ୍ଭବ ଖେଳାଳିଙ୍କ ପାଇଁ ଭିସା ବିଳମ୍ବ ହେଉଛି ।