ସେପ୍ଟେମ୍ବର ୯ରୁ ଆରମ୍ଭ ହେବାକୁ ଯାଉଛି ଏସିଆ କପ୍ । ତେବେ ଚଳିତ ଥର ଭାରତୀୟ କ୍ରିକେଟ୍ ଦଳ ଜର୍ସି ସ୍ପନସର ବିନା ଖେଳିବ । ବିସିସିଆଇ ସହିତ ଡ୍ରିମ ୧୧ର ଚୁକ୍ତି ଶେଷ ହେବା ପରେ ଏହି ପରିସ୍ଥିତି ସୃଷ୍ଟି ହୋଇଛି । ଦଳର ସଦସ୍ୟ ଶିବମ ଦୁବେ ନୂତନ କିଟ୍‌ରେ ନିଜର ଫଟୋ ସେୟାର କରି ଏହା ନିଶ୍ଚିତ କରିଛନ୍ତି । ଭାରତ ଏସିଆ କପର ପ୍ରଥମ ମ୍ୟାଚ୍ ୧୦ ସେପ୍ଟେମ୍ବରରେ ଖେଳିବ । ଭାରତ UAE ବିପକ୍ଷରେ ତା'ର ପ୍ରଥମ ମ୍ୟାଚ୍ ଖେଳିବ।

ଏସିଆ କପ୍ ୨୦୨୫ ପୂର୍ବରୁ, ଭାରତୀୟ ଦଳର ନୂତନ ଜର୍ସିର ଫାଷ୍ଟ୍ ଲୁକ୍ ସାମ୍ନାକୁ ଆସିଛି । ନୂତନ ଜର୍ସିର ଟି-ସାର୍ଟରେ କୌଣସି ପ୍ରାୟୋଜକଙ୍କ ନାମ ନଥିବା ଦେଖିବାକୁ ମିଳିଛି । ଜର୍ସିର ବାମ ପାର୍ଶ୍ୱରେ BCCI ଲୋଗୋ ଅଛି, ସେହିପରି ଡାହାଣ ପାର୍ଶ୍ୱରେ DP World Asia Cup 2025 ଲେଖାଯାଇଛି । DP World ହେଉଛି ଏସିଆ କପ୍ ୨୦୨୫ର ପ୍ରାୟୋଜକ । ଏହା ବ୍ୟତୀତ, ଜର୍ସିର ଉପରେ କେବଳ ଭାରତର ନାମ ଲେଖାଯାଇଛି । ଡ୍ରିମ୍-୧୧ ସହ ଚୁକ୍ତି ରଦ୍ଧ ହେବା ପରେ ଆଶା କରାଯାଉଥିଲା ଯେ ଟିମ୍ ଇଣ୍ଡିଆ କୌଣସି ଜର୍ସି ପ୍ରାୟୋଜକ ବିନା ଏସିଆ କପ୍ ଖେଳିବ । ଆଉ ଏବେ ଖବର ଠିକ୍ ପ୍ରମାଣିତ ହୋଇଛି ।

ଅନଲାଇନ୍ ଗେମିଂ ବିଲ୍ ଆସିବା ପରେ ଡ୍ରିମ୍ ୧୧ ଏବଂ ବିସିସିଆଇ ମଧ୍ୟରେ ଚୁକ୍ତିନାମା ଶେଷ ହୋଇଛି । ୨୦୨୩ ମସିହାରେ, ଡ୍ରିମ୍ ୧୧ ଟିମ୍ ଇଣ୍ଡିଆର ଜର୍ସି ପ୍ରାୟୋଜକ ହୋଇଥିଲା । ଏହି ଚୁକ୍ତି ୩ ବର୍ଷ ପାଇଁ ଥିଲା । କିନ୍ତୁ ଏହି ଚୁକ୍ତି ୬ ମାସ ପୂର୍ବରୁ ବାତିଲ ହୋଇଯାଇଥିଲା ।
ଏବେ ବିସିସିଆଇ ଏକ ନୂତନ ଜର୍ସି ପ୍ରାୟୋଜକ ଖୋଜିବା ଆରମ୍ଭ କରିଛି। ଆବେଦନ କିଣିବାର ଶେଷ ତାରିଖ ସେପ୍ଟେମ୍ବର ୧୨ ରହିଥିବା ବେଳେ ଡକ୍ୟୁମେଣ୍ଟ ଦାଖଲ କରିବାର ଶେଷ ତାରିଖ ସେପ୍ଟେମ୍ବର ୧୬ ରହିଛି ।

ତେବେ ଏଥର ବିସିସିଆଇ ଟିମ୍ ଇଣ୍ଡିଆର ଜର୍ସି ପ୍ରାୟୋଜନର ବେସ୍ ପ୍ରାଇସ୍ ବୃଦ୍ଧି କରିଛି । ଦ୍ୱିପାକ୍ଷିକ ମ୍ୟାଚ୍ ପାଇଁ ୩.୫ କୋଟି ଟଙ୍କା ଏବଂ ମଲ୍‌ଟି ନ୍ୟାସନାଲ ଟୁର୍ଣ୍ଣାମେଣ୍ଟ ପାଇଁ ୧.୫ କୋଟି ଟଙ୍କା ସ୍ଥିର କରାଯାଇଛି । ତିନି ବର୍ଷରେ ପ୍ରାୟ ୧୩୦ଟି ମ୍ୟାଚ୍ ହେବ । ଯେଉଁଥିରୁ ୪୦୦ କୋଟି ଟଙ୍କାରୁ ଅଧିକ ରୋଜଗାର କରିବ ବୋଲି ଆଶା କରାଯାଉଛି ।