India ICC T20 Ranking / ୧୫ ଦିନରେ ବଦଳିଗଲା ଚିତ୍ର, ICC ରାଙ୍କିଂରେ ପୁଣି ନମ୍ବର-୧ ଭାରତ

ମାତ୍ର ୧୫ ଦିନରେ ବଦଳିଗଲା ପୂରା ଚିତ୍ର । ଯେଉଁ ଇଂଲଣ୍ଡ ଟିମ୍ ଇଣ୍ଡିଆଠାରୁ ନମ୍ବର-୧ ମୁକୁଟ ଛଡ଼ାଇ ନେଇଥିଲା, କିନ୍ତୁ ଇଂଲଣ୍ଡ ଅଧିକ ଦିନ ପାଇଁ ନମ୍ବର-୧ ସ୍ଥାନରେ ରହିପାରିଲା ନାହିଁ । ଜିମ୍ବାୱେ ବିପକ୍ଷରେ ଦମଦାର ବିଜୟ ସହ ଭାରତ ପୁଣି ଆଇସିସି ଟି-୨୦ ରାଙ୍କିଂର ଶୀର୍ଷ ସ୍ଥାନ ଦଖଲ କରିଛି । ଲଗାତାର ୬ଟି ପରାଜୟର ଝଟକା ପରେ ଟିମ୍ ଇଣ୍ଡିଆ ଏବେ ପୁଣି ନିଜର ଦବଦବା ଫେରାଇ ଆଣିଛି ।

ଲଗାତାର ପରାଜୟ ପରେ ଆଇସିସି ଟି-୨୦ ରାଙ୍କିଂରେ ନମ୍ବର-୧ ସ୍ଥାନ ହରାଇଥିବା ଭାରତୀୟ ଦଳ ମାତ୍ର ୧୫ ଦିନ ମଧ୍ୟରେ ପୁଣି ଶୀର୍ଷ ସ୍ଥାନକୁ ଫେରିଛି । ଜିମ୍ବାୱେ ବିପକ୍ଷ ଦ୍ୱିତୀୟ ଟି-୨୦ରେ ଦମଦାର ବିଜୟ ପରେ ଶ୍ରେୟସ ଆୟରଙ୍କ ନେତୃତ୍ୱାଧୀନ ଟିମ୍ ଇଣ୍ଡିଆ ପୁଣି ଆଇସିସି ଟି-୨୦ ରାଙ୍କିଂରେ ନମ୍ବର-୧ ସ୍ଥାନ ହାସଲ କରିଛି ।
୨୦୨୨ ମସିହାରେ ଭାରତ ଟି-୨୦ ଫର୍ମାଟରେ ବିଶ୍ୱର ନମ୍ବର-୧ ଦଳ ହୋଇଥିଲା । ଏହାପରେ ଦଳ କ୍ରମାଗତ ଭାବେ ଦୁଇଟି ଟି-୨୦ ବିଶ୍ୱକପ୍ ଜିତିଥିଲା । ତେବେ ଅଧିନାୟକ ପରିବର୍ତ୍ତନ ପରେ ଦଳର ପ୍ରଦର୍ଶନ ଖରାପ ହେବାରୁ ଭାରତ ପ୍ରଥମେ ଆର୍ୟଲ୍ୟାଣ୍ଡରେ ସିରିଜ୍‌ ହାରିଥିଲା । ଏହା ପରେ ଇଂଲଣ୍ଡ ବିପକ୍ଷରେ ୪-୦ରେ ସିରିଜ୍ ହାରିବା ସହ ଟିମ୍ ଇଣ୍ଡିଆ ଲଗାତାର ୬ଟି ଟି-୨୦ ମ୍ୟାଚ୍ ହାରିଥିଲା। ଏହାର ପ୍ରଭାବ ଆଇସିସି ରାଙ୍କିଂରେ ମଧ୍ୟ ପଡ଼ିଥିଲା ।

ଜୁଲାଇ ୧୧ରେ ଇଂଲଣ୍ଡ ବିପକ୍ଷ ପଞ୍ଚମ ଟି-୨୦ରେ ପରାଜୟ ପରେ ଭାରତ ଦ୍ୱିତୀୟ ସ୍ଥାନକୁ ଖସିଯାଇଥିଲା ଏବଂ ଇଂଲଣ୍ଡ ନମ୍ବର-୧ ସ୍ଥାନକୁ ଉଠିଥିଲା। ଯଦିଓ ଉଭୟ ଦଳର ରେଟିଂ ପଏଣ୍ଟ ସମାନ ଥିଲା, ତଥାପି ଇଂଲଣ୍ଡ ଶୀର୍ଷରେ ରହିଥିଲା ।

୧୫ ଦିନରେ ପୁଣି ଶୀର୍ଷ ସ୍ଥାନ

ମାତ୍ର ୧୫ ଦିନ ମଧ୍ୟରେ ଭାରତ ପୁଣି ନମ୍ବର-୧ ସ୍ଥାନ ଫେରି ପାଇଛି । ବର୍ତ୍ତମାନ ଭାରତ ୨୬୮ ରେଟିଂ ସହ ଆଇସିସି ଟି-୨୦ ଟିମ୍ ରାଙ୍କିଂର ଶୀର୍ଷରେ ରହିଛି। ଇଂଲଣ୍ଡ ମଧ୍ୟ ୨୬୮ ରେଟିଂ ଥିଲେ ସୁଦ୍ଧା ଦ୍ୱିତୀୟ ସ୍ଥାନକୁ ଖସିଯାଇଛି। ଅଷ୍ଟ୍ରେଲିଆ ତୃତୀୟ, ନ୍ୟୁଜିଲ୍ୟାଣ୍ଡ ଚତୁର୍ଥ ଏବଂ ଦକ୍ଷିଣ ଆଫ୍ରିକା ପଞ୍ଚମ ସ୍ଥାନରେ ରହିଛି।

ଜିମ୍ବାୱେ ବିପକ୍ଷରେ ଦମଦାର ପ୍ରଦର୍ଶନ

ଜିମ୍ବାୱେ ବିପକ୍ଷ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍‌ର ପ୍ରଥମ ମ୍ୟାଚ୍‌ରେ ଭାରତ ୭ ୱିକେଟରେ ବିଜୟୀ ହୋଇଥିଲା । ଦ୍ୱିତୀୟ ଟି-୨୦ରେ ଶ୍ରେୟସ ଆୟରଙ୍କ ଦଳ ୯୦ ରନର ବିଶାଳ ବିଜୟ ହାସଲ କରି ସିରିଜ୍‌ରେ ୨-୦ର ଆଗୁଆ ରହିଛି ।