ଲଣ୍ଡନ: ଇଂଲଣ୍ଡ ବିପକ୍ଷ ଦିନିକିଆ ସିରିଜ୍ ଏବଂ ଜିମ୍ବାୱେ ଗସ୍ତ ପୂର୍ବରୁ ଟିମ୍ ଇଣ୍ଡିଆ ଦୁଇଟି ବଡ଼ ବିପର୍ଯ୍ୟୟର ସମ୍ମୁଖୀନ ହୋଇଛି । ଦ୍ରୁତ ବୋଲର ହର୍ଷିତ ରାଣା ଏବଂ ସ୍ପିନର ବରୁଣ ଚକ୍ରବର୍ତ୍ତୀ ଆହତ ଯୋଗୁଁ ଦିନିକିଆ ସିରିଜ୍ ଏବଂ ଜିମ୍ବାୱେ ଗସ୍ତରୁ ବାଦ ପଡ଼ିଛନ୍ତି । ଏହି ସମୟରେ ଟିମରେ ଜଣେ ଧୁରନ୍ଧର ଖେଳାଳିଙ୍କ ଏଣ୍ଟ୍ରି ହୋଇଛି । ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ (BCCI) ଉଭୟ ଖେଳାଳିଙ୍କ ବଦଳ ଘୋଷଣା କରିଛି ।

• ଟିମରେ କାହାର ଏଣ୍ଟ୍ରି ହେଲା ?

ଜୁଲାଇ ୧୪ ତାରିଖରୁ ଆରମ୍ଭ ହେବାକୁ ଥିବା ଇଂଲଣ୍ଡ ବିପକ୍ଷରେ ଦିନିକିଆ ପାଇଁ ହର୍ଷିତ ରାଣାଙ୍କ ସ୍ଥାନରେ ଦଳରେ ଦ୍ରୁତ ବୋଲର ପ୍ରିନ୍ସ ଯାଦବଙ୍କୁ ସାମିଲ କରାଯାଇଥିବାବେଳେ ଜିମ୍ବାୱେ ଗସ୍ତ ପାଇଁ ବରୁଣ ଚକ୍ରବର୍ତ୍ତୀଙ୍କ ସ୍ଥାନରେ ଲେଗ୍-ସ୍ପିନର ରବି ବିଷ୍ଣୋଇଙ୍କୁ ଟି-୨୦ ଦଳରେ ସାମିଲ କରାଯିବ । ଟ୍ରେଣ୍ଟ ବ୍ରିଜରେ ଇଂଲଣ୍ଡ ବିପକ୍ଷରେ ତୃତୀୟ ଟି-୨୦ ମ୍ୟାଚ୍ ସମୟରେ ହର୍ଷିତଙ୍କ ଡାହାଣ ହାତରେ ଆଘାତ ଲାଗିଥିଲା । ଏଣୁ ସେ ଆଗାମୀ ମ୍ୟାଚ୍ ଖେଳିପାରିବେ ନାହିଁ ।

ପ୍ରିନ୍ସ ଯାଦବ ପୂର୍ବରୁ ଆୟରଲ୍ୟାଣ୍ଡ ବିପକ୍ଷରେ ଟି-୨୦ ସିରିଜରେ ଟିମ୍ ଇଣ୍ଡିଆ ପାଇଁ ତାଙ୍କର ଟି-୨୦ ଅନ୍ତର୍ଜାତୀୟ ଡେବ୍ୟୁ କରିଥିଲେ । ସେ ଆଫଗାନିସ୍ତାନ ବିପକ୍ଷରେ ଏକଦିବସୀୟ ସିରିଜରେ ମଧ୍ୟ ତାଙ୍କର ଏକଦିବସୀୟ ଡେବ୍ୟୁ କରିଥିଲେ । ବର୍ତ୍ତମାନ ଚୟନକର୍ତ୍ତାମାନେ ତାଙ୍କୁ ଆଶ୍ୱସ୍ତ କରିଛନ୍ତି ଏବଂ ଇଂଲଣ୍ଡ ବିପକ୍ଷ ସିରିଜ ପାଇଁ ODI ଦଳରେ ସାମିଲ କରିଛନ୍ତି।

• ବରୁଣ ଚକ୍ରବର୍ତ୍ତୀଙ୍କ ସ୍ଥାନରେ କିଏ ?

ଅନ୍ୟପଟେ ଇଂଲଣ୍ଡ ବିପକ୍ଷ ତୃତୀୟ ଟି-୨୦ ମ୍ୟାଚ୍ ସମୟରେ ବରୁଣ ଚକ୍ରବର୍ତ୍ତୀଙ୍କ ବାମ ହାତରେ ଆଘାତ ଲାଗିଥିଲା । ଏକ MRI ସ୍କାନରୁ ଜଣାପଡ଼ିଛି ​​ଯେ ତାଙ୍କର ଆଘାତ ହର୍ଷିତ ରାଣାଙ୍କ ଆଘାତ ଅପେକ୍ଷା ଅଧିକ ଗୁରୁତର । ବିଶେଷଜ୍ଞ ଡାକ୍ତରଙ୍କ ପରାମର୍ଶ ପରେ ବରୁଣଙ୍କୁ ଜିମ୍ବାୱେ ବିପକ୍ଷ ଟି-୨୦ ସିରିଜରୁ ବାଦ ଦିଆଯାଇଛି । ସେ BCCIର ସେଣ୍ଟର ଅଫ୍ ଏକ୍ସିଲେନ୍ସରେ ଚିକିତ୍ସିତ ହେବେ । ଏଣୁ ଜିମ୍ବାୱେ ଗସ୍ତ ପାଇଁ ରବି ବିଷ୍ଣୋଇଙ୍କ ପ୍ରତ୍ୟାବର୍ତ୍ତନ ଭାରତର ସ୍ପିନ୍ ବୋଲିଂ ଆକ୍ରମଣକୁ ଆହୁରି ମଜଭୁତ କରିବ ବୋଲି ଆଶା କରାଯାଉଛି ।

• ପୁଣି ଖେଳିବେ ରୋ-କୋ

ଜିମ୍ବାୱେ ଗସ୍ତରେ ଶ୍ରେୟସ ଆୟର ଭାରତୀୟ ଦଳର ନେତୃତ୍ୱ ନେବେ । ସେହିପରି ତିଲକ ବର୍ମାଙ୍କୁ ଉପ-ଅଧିନାୟକ ନିଯୁକ୍ତ ଦିଆଯିବ । ଇଂଲଣ୍ଡ ବିପକ୍ଷ ଦିନିକିଆ ସିରିଜରେ ଶୁବମନ ଗିଲ୍ ଭାରତୀୟ ଦଳର ଅଧିନାୟକ ହେବେ । ରୋହିତ ଶର୍ମା, ବିରାଟ କୋହଲି, ଜସପ୍ରିତ ବୁମରାହ, କୁଲଦୀପ ଯାଦବ ଏବଂ କେଏଲ ରାହୁଲଙ୍କ ଭଳି ଷ୍ଟାର ଖେଳାଳିମାନେ ମଧ୍ୟ ଦିନିକିଆ ଦଳରେ ସାମିଲ ଅଛନ୍ତି ।

ଇଂଲଣ୍ଡ ବିପକ୍ଷ ODI ସିରିଜ ପାଇଁ ଭାରତୀୟ ଦଳ: ଶୁବମନ ଗିଲ (ଅଧିନାୟକ), ରୋହିତ ଶର୍ମା, ବିରାଟ କୋହଲି, ଶ୍ରେୟସ ଆୟର (ଉପ-ଅଧିନାୟକ), କେ.ଏଲ୍ ରାହୁଲ (ୱିକେଟ୍ କିପର), ଇଶାନ କିଶନ (ୱିକେଟ୍ କିପର), ୱାଶିଂଟନ୍ ସୁନ୍ଦର, ଅକ୍ଷର ପଟେଲ, ଶିବମ୍ ଦୁବେ, କୁଲଦୀପ ଯାଦବ, ଜସପ୍ରୀତ ଏବଂ ପ୍ରିନ୍ସ ଯାଦବ ।

ଜିମ୍ବାୱେ ଗସ୍ତ ପାଇଁ ଭାରତୀୟ ଟି-୨୦ ଦଳ: ଶ୍ରେୟସ୍ ଆୟର୍ (ଅଧିନାୟକ), ବୈଭବ ସୂର୍ଯ୍ୟବଂଶୀ, ଅଭିଷେକ ଶର୍ମା, ତିଲକ ବର୍ମା (ଉପ-ଅଧିନାୟକ), ଇଶାନ୍ କିଶାନ୍ (ୱିକେଟ୍ ରକ୍ଷକ), ଶିବମ୍ ଦୁବେ, ସୂୟାଂଶ ଶେଡଗେ, ରିଙ୍କୁ ସିଂ, ହର୍ଷ ଦୁବେ, ପ୍ରିନ୍ସ ଯାଦବ, ପ୍ରଭସିମରନ ସିଂହ (ୱିକେଟ୍ ରକ୍ଷକ) ଏବଂ ରବି ବିଷ୍ଣୋଇ ।

ପଢନ୍ତୁ ଏହି ଖବର: ୱିମ୍ଵଲଡନରେ ଛାଇଗଲା ସଚିନ-ଗିଲ୍ ଯୋଡ଼ି; ସେପଟେ ସ୍ପେନରେ ସାରା ତେନ୍ଦୁଲକର...