ମହିଳା ଦିବସରେ ଇତିହାସ ରଚିଲା ଭାରତୀୟ ପୁରୁଷ କ୍ରିକେଟ୍ ଟିମ୍‌ । ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ନୂଆ ଇତିହାସ ଲେଖିଲା ଟିମ୍‌ ଇଣ୍ଡିଆ । ଟି-୨୦ ବିଶ୍ବକପ୍‌ ଫାଇନାଲରେ ନ୍ୟୁଜିଲାଣ୍ଡକୁ ହରାଇ ଲଗାତର ଦ୍ବିତୀୟ ଥର ପାଇଁ ବିଶ୍ବକପ୍‌ ଟ୍ରଫି ଜିତିଲା ଭାରତ । ୨୦୨୪ରେ ରୋହିତଙ୍କ ଅଧିନାୟକତ୍ବରେ ଆଉ ୨୦୨୬ରେ ସୂର୍ଯ୍ୟକୁମାର ଯାଦବଙ୍କ କ୍ୟାପଟେନ୍ସିରେ ବିଶ୍ବକପ୍‌ ଟ୍ରଫି ହତେଇଲା ଭାରତ । ଆଉ ୨୦୨୬ ଟି-୨୦ ବିଶ୍ବକପ୍‌ ବିଜୟରେ ପ୍ରମୁଖ ଭୂମିକା ତୁଲାଇଥିଲେ ଇଶାନ କିଶାନ ।

ଇଶାନ କିଶାନ ଟି-୨୦ ବିଶ୍ବକପ୍‌ରେ ମୋଟ୍‌ ୯ଟି ମ୍ୟାଚ୍‌ ଖେଳି ୧୯୩.୨୯ ଷ୍ଟ୍ରାଇକ୍‌ ରେଟ୍‌ରେ ୩୧୭ ରନ୍‌ କରିଥିଲେ । ଏହି ଫର୍ମ ବଳରେ ଭାରତ ବିଶ୍ବକପ୍‌ ହାତେଇବାରେ ସଫଳ ହୋଇଥିଲା । ସବୁଠୁ ବଡ଼ କଥା ହେଉଛି ଇଶାନ କିଶାନ ବିଶ୍ବକପ୍‌ ପର୍ବରୁ ଭାରତୀୟ ଦଳର ସଦସ୍ୟ ନଥିଲେ । କିନ୍ତୁ ସୟଦ ମୁସ୍ତାକ ଅଲ୍ଲୀ ଟ୍ରଫିରେ ଦମଦାର ଫର୍ମ ତାଙ୍କୁ ଟିମ୍‌ ଇଣ୍ଡିଆକୁ ଟାଣି ଆଣିଥିଲା । ବିଶ୍ବକପ୍‌ ପୂର୍ବରୁ ନ୍ୟୁଜିଲାଣ୍ଡ ସିରିଜ୍‌ ପାଇଁ ଇଶାନ କିଶାନଙ୍କୁ ଉପ-ଅଧିନାୟକ ଥିବା ଶୁବମନ ଗିଲ୍‌ଙ୍କ ସ୍ଥାନରେ ଚୟନ କରାଯାଇଥିଲା । ଆଉ ସେ ନ୍ୟୁଜିଲାଣ୍ଡ ସିରିଜ୍‌ରେ ଆକ୍ରମଣାତ୍ମକ ବ୍ୟାଟିଂ କରି ଟି-୨୦ ବିଶ୍ବକପ୍‌ରେ ନିଜ ସ୍ଥାନ ପକ୍କା କରିଥିଲେ ।

କିନ୍ତୁ ଆପଣ ଜାଣିଛନ୍ତି କି ଇଶାନ କିଶାନଙ୍କୁ ଟି-୨୦ ବିଶ୍ବକପ୍‌ ଦଳରେ ଚୟନ କରିବା ପଛରେ ରହିଛି ଦୁଇ ଓଡ଼ିଆ ପୁଅଙ୍କ ହାତ । ଜଣେ ହେଉଛନ୍ତି ପ୍ରଜ୍ଞାନ ଓଝା ଓ ଆଉ ଜଣେ ହେଉଛନ୍ତି ଶିବ ସୁନ୍ଦର ଦାସ । ଉଭୟ ଏବେ ପୁରୁଷ ସିନିୟର ଟିମ୍‌ର ଚୟନ କମିଟିର ସଦସ୍ୟ ରହିଛନ୍ତି । ଆଉ ବିଶ୍ବକପ୍‌ ଦଳକୁ ଚୟନ କରିବାରେ ଏହି ଦୁଇ ଓଡ଼ିଆ ଗୁରୁତ୍ବପୂର୍ଣ୍ଣ ଭୂମିକା ତୁଲାଇଥିଲେ ।

୭ ଜାନୁଆରୀ ୨୦୨୩ରୁ ଚୟନ କମିଟିର ସଦସ୍ୟ ଅଛନ୍ତି ଶିବ ସୁନ୍ଦର । ଆଉ ସେ ଚୟନ କମିଟି ସଦସ୍ୟ ଭାବେ ୨୦୨୩ ଦିନିକିଆ ବିଶ୍ବକପ୍‌ ପାଇଁ ଟିମ୍ ଇଣ୍ଡିଆ ଦଳ ମଧ୍ୟ ଚୟନ କରିଥିଲେ । ଏହା ସହ ୨୦୨୪ ଟି-୨୦ ବିଶ୍ବକପ୍‌ ଓ ୨୦୨୫ ଚାମ୍ପିଆନ୍ସ ଟ୍ରଫି ପାଇଁ ହୋଇଥିବା ଦଳ ଚୟନରେ ସେ ଗୁରୁତ୍ବପୂର୍ଣ୍ଣ ଭୂମିକା ତୁଲାଇଥିଲେ । ଆଉ ସବୁଠୁ ବଡ଼ କଥା ହେଉଛି ଶିବ ସୁନ୍ଦରଙ୍କ ଦ୍ବାରା ଚୟନ ହୋଇଥିବା ଦଳ ୨୦୨୪ ଟି-୨୦ ବିଶ୍ବକପ୍‌ ଓ ୨୦୨୫ ଚାମ୍ପିଆନ୍ସ ଟ୍ରଫି ଟାଇଟଲ୍ ଜିତିଥିଲା । ଏହା ସହ ୨୦୨୩ ଦିନିକିଆ ବିଶ୍ବକପରେ ରନର୍ସ ଅପ୍‌ ହୋଇଥିଲା । ଆଉ ଏବେ ଆଉ ଏକ ଟି-୨୦ ବିଶ୍ବକପ୍ ମଧ୍ୟ ଜିତିଛି ।

ସେହିପରି ୨୮ ସେପ୍ଟେମ୍ବର ୨୦୨୫ରୁ ଚୟନ କମିଟିର ସଦସ୍ୟ ଅଛନ୍ତି ଆଉ ଜଣେ ଓଡ଼ିଆ ପୁଅ ପ୍ରଜ୍ଞାନ ଓଝା । ସେ ସାଉଥ୍‌ ଜୋନ୍‌ରୁ ଶ୍ରୀଧରନ୍‌ ଶରଥଙ୍କ ସ୍ଥାନରେ ଚୟନ କମିଟିରେ ସ୍ଥାନ ପାଇଛନ୍ତି । ଆଉ ସେ ଯେବେଠୁ ଏହି ଦାୟିତ୍ବ ଗ୍ରହଣ କରିଛନ୍ତି ସେବେଠୁ ସେ ଭାରତୀୟ ଦଳକୁ ଦୃଢ଼ କରିବା ପାଇଁ ଏବେ ବେଞ୍ଚ ଷ୍ଟ୍ରେନ୍ଥକୁ ସୁଦୃଢ଼ ରଖିବାକୁ ନିରନ୍ତର ପ୍ରୟାସ ଜାରି ରଖିଛନ୍ତି । ନିକଟରେ ଶେଷ ହୋଇଥିବା ଘରୋଇ ଟୁର୍ଣ୍ଣାମେଣ୍ଟ ସୟଦ ମୁସ୍ତାକ ଅଲି ଟ୍ରଫିର ମ୍ୟାଚ୍‌କୁ ଯାଇ ବିଭିନ୍ନ ଖେଳାଳିଙ୍କ ପ୍ରଦର୍ଶନ ଉପରେ ତୀଖ୍ଣ ନଜର ରଖିଥିଲେ । ଯାହାର ପ୍ରଭାବ ଘୋଷଣା ଟି-୨୦ ବିଶ୍ବକପ୍‌ ପାଇଁ ଘୋଷଣା ହୋଇଥିବା ଟିମ୍‌ରେ ଦେଖିବାକୁ ମିଳିଥିଲା । ସେ ସୟଦ ମୁସ୍ତାକ ଅଲି ଟ୍ରଫିର ଫାଇନାଲରେ ମଧ୍ୟ ଉପସ୍ଥିତ ଥିଲେ । ଯେଉଁଠାରେ ଇଶାନ କିଶାନ ଶତକ ହାସଲ କରି ପ୍ରଥମ ଥର ପାଇଁ ଝାଡ଼ଖଣ୍ଡକୁ SMAT ଟ୍ରଫି ଦେଇଥିଲେ । ଏହା ସହ ଇଶାନ କିଶାନ ସେହି ଟୁର୍ଣ୍ଣାମେଣ୍ଟ ୫୦୦ରୁ ଅଧିକ ରନ୍‌ କରିଥିଲେ । ଆଉ ଏସବୁ ପଡ଼ିଆ ବାହାରେ ରହି ଟିକ୍‌ନିକ୍‌ ଦେଖୁଥିଲେ ପ୍ରଜ୍ଞାନ । ଯାହାଫଳରେ ବିଶ୍ବକପ୍‌ ପାଇଁ ଘୋଷଣା ହୋଇଥିବା ଟିମ୍‌ରେ ଶୁବମନଙ୍କ ସ୍ଥାନରେ ଇଶାନ କିଶାନଙ୍କୁ ସ୍ଥାନ ମିଳିଥିଲା ।

ପ୍ରାୟ ଦୁଇ ବର୍ଷ ପରେ ଟିମ୍ ଇଣ୍ଡିଆକୁ ଫେରିଥିଲେ ଇଶାନ କିଶାନ । ସେ ପୁଣି ସିଧାସଳଖ ନ୍ୟୁଜିଲାଣ୍ଡ ସିରିଜ୍‌ ଓ ଟି-୨୦ ବିଶ୍ବକପ୍‌ରେ । ଆଉ ଇଶାନଙ୍କୁ ମିଳିଥିବା ଏହି ସୁଯୋଗକୁ ସେ ମଧ୍ୟ ହାତଛଡ଼ା କରିନଥିଲେ । ନ୍ୟୁଜିଲାଣ୍ଡ ବିପକ୍ଷ ପାଞ୍ଚ ମ୍ୟାଚ୍‌ ବିଶିଷ୍ଟ ଟି-୨୦ ସିରିଜ୍‌ରେ ୪ଟି ମ୍ୟାଚ୍‌ ଖେଳି ୨୧୫ ରନ୍‌ କରିଥିଲେ । ଯେଉଁଥିରେ ଗୋଟିଏ ଶତକ ଓ ଗୋଟିଏ ଅର୍ଦ୍ଧଶତକ ରହିଥିଲା । ଆଉ ଟି-୨୦ ବିଶ୍ବକପ୍‌ରେ ସେ ୯ଟି ମ୍ୟାଚ୍‌ ଖେଳି ୩୧୭ ରନ୍‌ କରିଥିଲେ ।