ରବିବାର ଦୁବାଇରେ ଅଣ୍ଡର-୧୯ ଏସିଆ କପ୍ ଫାଇନାଲ ମ୍ୟାଚ୍‌ ଖେଳାଯାଇଥିଲା । ଏହି ମ୍ୟାଚ୍‌ରେ ଭାରତକୁ ପରାସ୍ତ କରି ଟାଇଟଲ୍‌ ନିଜ ନାମରେ କରିଛି ପାକିସ୍ତାନ । କିନ୍ତୁ ମ୍ୟାଚ୍‌ରେ ଭାରତୀୟ ଦଳ ପାକିସ୍ତାନ କ୍ରିକେଟ୍‌ ବୋର୍ଡ (PCB) ଅଧ୍ୟକ୍ଷ ଏବଂ ଏସୀୟ କ୍ରିକେଟ୍ ପରିଷଦ (ACC) ସଭାପତି ମୋହସିନ୍ ନକଭିଙ୍କୁ ଅଣଦେଖା କରିଥିଲେ ।

ମ୍ୟାଚ୍ ପରେ ପୁରସ୍କାର ପ୍ରଦାନ ଉତ୍ସବରେ ମୋହସିନ୍ ନକଭି ପାକିସ୍ତାନ ଦଳକୁ ଟ୍ରଫି ପ୍ରଦାନ କରିଥିଲେ । ସେ ଖେଳାଳି ଏବଂ ସହାୟକ କର୍ମଚାରୀଙ୍କ ସହିତ ବିଜୟ ଉତ୍ସବର ଫଟୋ ମଧ୍ୟ ଉଠାଇଥିଲେ । କିନ୍ତୁ ଭାରତୀୟ ଖେଳାଳିମାନେ ସେହି ମଞ୍ଚକୁ ଆସିବାକୁ ସ୍ପଷ୍ଟ ଭାବେ ମନା କରିଦେଲେ । ଆଉ ପରେ ଅନ୍ୟ ଜଣେ ଅଧିକାରୀଙ୍କଠାରୁ ମେଡାଲ ଗ୍ରହଣ କରିବାକୁ ମୁଖ୍ୟ ମଞ୍ଚ ଛାଡ଼ି ଚାଲିଗଲେ, ଯେଉଁଠାରେ ନକଭି ଉପସ୍ଥିତ ନଥିଲେ ।

ଫାଇନାଲରେ ପାକିସ୍ତାନ ଭାରତ ବିପକ୍ଷରେ ଚମତ୍କାର ପ୍ରଦର୍ଶନ କରିଥିଲା। ପ୍ରଥମେ ବ୍ୟାଟିଂ କରି ପାକିସ୍ତାନ ୩୪୭ ରନ୍ କରିଥିଲା । ଏହି ବିଶାଳ ସ୍କୋରର ମୂଳଦୁଆ ଓପନର୍ ସମୀର ମିନହାସ୍ ରଖିଥିଲେ । ଯିଏ ୧୭୨ ରନର ଏକ ଚମତ୍କାର ଇନିଂସ ଖେଳିଥିଲେ । ଟାର୍ଗେଟର ପିଛା କରି ବୈଭବ ସୂର୍ଯ୍ୟବଂଶୀ ଭାରତକୁ ଏକ ଆକ୍ରମଣାତ୍ମକ ଆରମ୍ଭ ଦେଇଥିଲେ, କିନ୍ତୁ ବିଜୟରେ ପରିଣତ କରିପାରିନଥିଲେ । ଭାରତୀୟ ବ୍ୟାଟସମ୍ୟାନ୍ ଫାଇନାଲର ଚାପକୁ ସମ୍ଭାଳି ପାରିଲେ ନାହିଁ । ଯାହାଫଳରେ ଭାରତ ମାତ୍ର ୧୫୬ ରନ୍‌ରେ ଅଲଆଉଟ୍‌ ହୋଇଥିଲା । ଏହି ବିଜୟ ସହ ପାକିସ୍ତାନ ଅଣ୍ଡର-୧୯ ବିଶ୍ବକପ୍‌ ଟ୍ରଫି ନିଜ ନାଁରେ କରିଛି ।

ମୋହସିନ ନକଭି ଫାଇନାଲ ସମୟରେ ଦୁବାଇରେ ପହଞ୍ଚିଥିଲେ ଏବଂ ମ୍ୟାଚ୍ ପରେ ଅନ୍ୟମାନଙ୍କ ସହିତ ପୁରସ୍କାର ପ୍ରଦାନ ମଞ୍ଚରେ ଉପସ୍ଥିତ ଥିଲେ। ନକଭି ପାକିସ୍ତାନୀ ଖେଳାଳିମାନଙ୍କୁ ବିଜେତାଙ୍କ ପଦକ ପ୍ରଦାନ କରିଥିଲେ ଏବଂ ଅଧିନାୟକ ଫରହାନ ୟୁସୁଫଙ୍କୁ ଟ୍ରଫି ପ୍ରଦାନ କରିଥିଲେ । କିନ୍ତୁ ଭାରତୀୟ ଖେଳାଳିମାନେ ତାଙ୍କ ସହିତ ମଞ୍ଚ ସେୟାର କରି ନଥିଲେ। ତା’ପରେ ନକଭିଙ୍କୁ ବିଜୟ ଉତ୍ସବ ପାଳନ କରିବା ଏବଂ ପାକିସ୍ତାନୀ ଖେଳାଳି ଏବଂ ଟିମ୍‌ ମ୍ୟାନେଜମେଣ୍ଟ ସହିତ ଫଟୋ ଉଠାଇଥିଲେ ।

ମୋହସିନ ନକଭି ଲଗାତାର ଭାବରେ ଆକର୍ଷଣର କେନ୍ଦ୍ରବିନ୍ଦୁ ରହିଆସିଛନ୍ତି । ପୂର୍ବରୁ ସିନିୟର ପୁରୁଷ ଏସିଆ କପ୍ ଫାଇନାଲ ସମୟରେ ବିବାଦ ଦେଖାଦେଇଥିଲା । ଯେତେବେଳେ ଭାରତୀୟ ଖେଳାଳିମାନେ ACC ମୁଖ୍ୟଙ୍କଠାରୁ ଟ୍ରଫି ଗ୍ରହଣ କରିବାକୁ ମନା କରି ଦେଇଥିଲେ । ଆଉ ଏହା ପରେ ନକଭି ଟ୍ରଫି ନେଇ ଷ୍ଟାଡିୟମରୁ ପଳେଇ ଥିଲେ । ଆଉ ରବିବାର ଭାରତୀୟ ଦଳ ନକଭିଙ୍କୁ ଅଣଦେଖା କରିବା ପରେ ସେ ପୁଣି ଚର୍ଚ୍ଚାକୁ ଆସିଛନ୍ତି ।