Rajesh Mohanty Hat trick / IPL ଅକ୍ସନରେ କେହି କିଣିଲେନି, ଏବେ ବିଜୟ ହଜାରେ ହ୍ୟାଟ୍ରିକ୍‌ ନେଲେ ଓଡ଼ିଆ ପୁଅ

ଇତିହାସ ରଚିଛନ୍ତି ଓଡ଼ିଶାର ଦ୍ରୁତ ବୋଲର ରାଜେଶ ମହାନ୍ତି । ଚଳିତ ବିଜୟ ହଜାରେ ଟ୍ରଫିରେ ସେ ନୂଆ ଇତିହାସ ସୃଷ୍ଟି କରିଛନ୍ତି । ଶୁକ୍ରବାର ସର୍ଭିସେସ୍ ବିପକ୍ଷ ମ୍ୟାଚ୍‌ରେ ସେ ଏପରି କିଛି ହାସଲ କରିଛନ୍ତି ଯାହା ଓଡ଼ିଶାରୁ କେହି କେବେ ହାସଲ କରିନାହାଁନ୍ତି ।

ବେଙ୍ଗାଲୁରୁର ଆଲୁରରେ ଶୁକ୍ରବାର ଓଡ଼ିଶା-ସର୍ଭିସେସ୍‌ ମଧ୍ୟରେ ବିଜୟ ହଜାରେ ଟ୍ରଫିର ଏକ ମ୍ୟାଚ୍‌ ଖେଳାଯାଉଥିଲା । ଏହି ମ୍ୟାଚ୍‌ରେ ପ୍ରଥମେ ବ୍ୟାଟିଂ କରୁଥିବା ସର୍ଭିସେସ୍‌କୁ ଆରମ୍ଭରୁ ନିଜ ଆକମ୍ରଣାତ୍ମକ ବୋଲିଂରେ ବ୍ୟାକଫୁଟ୍‌କୁ ଠେଲି ଦେଇଥିଲେ । ରାଜେଶ ଏହି ମ୍ୟାଚ୍‌ରେ ହ୍ୟାଟ୍ରିକ୍ ନେଇଥିଲେ । ଲିଷ୍ଟ ଏ କ୍ରିକେଟ୍‌ରେ ଏହି ସଫଳତା ହାସଲ କରିବାରେ ଓଡ଼ିଶାରୁ ରାଜେଶ ହେଉଛନ୍ତି ପ୍ରଥମ କ୍ରିକେଟ୍‌ର । ରାଜେଶଙ୍କ ଏହି ଚମତ୍କାର ପ୍ରଦର୍ଶନ ବଳରେ ଓଡ଼ିଶା ଚାରି ୱିକେଟ୍‌ରେ ସର୍ଭିସେସ୍‌କୁ ପରାସ୍ତ କରିଛି ।

ରାଜେଶ ସର୍ଭିସେସ୍‌ ଇନିଂସ୍‌ର ସପ୍ତମ ଓଭରରେ ହ୍ୟାଟ୍ରିକ୍ ନେଇଥିଲେ । ସେ ପ୍ରଥମ ବଲ୍‌ରେ ସାଗର ଦହିୟାଙ୍କୁ ଆଉଟ୍ କରିଥିଲେ । ସାଗର ବୋଲ୍ଡ ହୋଇଥିଲେ । ତା’ପରେ ସେ ପରବର୍ତ୍ତୀ ବଲ୍‌ରେ ଅମିତ ଶୁକ୍ଳାଙ୍କୁ LBW ଆଉଟ୍ କରିଥିଲେ । ରବି ଚୌହାନ ରାଜେଶଙ୍କ ତୃତୀୟ ଶିକାର ହୋଇଥିଲେ । ସେ ମଧ୍ୟ LBW ହୋଇଥିଲେ । ରାଜେଶ ୯ ଓଭରରେ ଦୁଇଟି ମେଡେନ ଓଭର ସମେତ ୨୫ ରନ୍‌ ଦେଇ ୪ ଓ୍ବିକେଟ୍‌ ନେଇଥିଲେ ।

ରାଜେଶ ମହାନ୍ତିଙ୍କ ଘାତକ ବୋଲିଂ ବଳରେ ସର୍ଭିସେସ୍‌ ୨୧.୫ ଓଭରରେ ମାତ୍ର ୮୩ ରନ୍‌ କରି ଅଲଆଉଟ୍‌ ହୋଇଥିଲା । ଓଡ଼ିଶା ପକ୍ଷରୁ ରାଜେଶ ମହାନ୍ତି ଓ ସମ୍ବିତ ବରାଳ ୪ଟି ଲେଖାଏଁ ଓ୍ବିକେଟ୍‌ ଅକ୍ତିଆର କରିଥିଲେ ।

ଓଡ଼ିଶା ସମ୍ମୁଖରେ ୮୪ ରନର ଲକ୍ଷ୍ୟ ଥିଲା। ଏହା ସହଜ ଥିଲା, କିନ୍ତୁ ଓଡ଼ିଶା ଏହାକୁ ହାସଲ କରିବାକୁ ସଂଘର୍ଷ କରିଥିଲା। ସେମାନେ ଛଅଟି ୱିକେଟ ହରାଇଥିଲେ। ଦଳ ଖରାପ ଆରମ୍ଭ କରିଥିଲା । ସ୍ୱସ୍ତିକ ସାମଲ ପ୍ରଥମ ଓଭରରେ ହିଁ ନିତିନ ଯାଦବଙ୍କ ଦ୍ୱାରା କ୍ୟାଚ୍ ହୋଇଥିଲେ । ଓମ୍ ଟି. ମୁଣ୍ଡେଙ୍କୁ ପୁନମ ପୁନିଆ ଆଉଟ୍‌ କରିଥିଲେ । ପୁନିଆ ଲଗାତାର ୱିକେଟ ନେଇ ଓଡ଼ିଶାକୁ ଅସୁବିଧାରେ ପକାଇଥିଲେ । କିନ୍ତୁ ସନ୍ଦୀପ ପଟ୍ଟନାୟକ ଶେଷ ପର୍ଯ୍ୟନ୍ତ କ୍ରିଜ୍‌ରେ ରହିଥିଲେ ଏବଂ ଦଳକୁ ବିଜୟୀ କରାଇଥିଲେ । ଏହି ଟାର୍ଗେଟ୍‌କୁ ଓଡ଼ିଶା ୬ ଓ୍ବିକେଟ୍‌ ହରାଇ ହାସଲ କରିଥିଲା । ସନ୍ଦୀପ ୬୯ ବଲରୁ ଅପରାଜିତ ୩୨ ରନ କରିଥିଲେ । ସେହିପରି ରାଜେଶ ୧୨ ରନ ଓ ଗୋବିନ୍ଦ ପୋଦାର ୧୧ ରନ କରିଥିଲେ । ସର୍ଭିସେସ୍‌ ପକ୍ଷରୁ ପୁନିଆ ଚାରିଟି ୱିକେଟ ନେଇଥିଲେ ।