ଆଇପିଏଲ ୨୦୨୬ ପରଠୁ ଚର୍ଚ୍ଚାରେ ଅଛନ୍ତି ୧୫ ବର୍ଷୀୟ ବିସ୍ମୟ ବାଳକ ବୈଭବ ସୂର୍ଯ୍ୟବଂଶୀ । ସମସ୍ତ ବୈଭବଙ୍କ ବିସ୍ଫୋରକ ବ୍ୟାଟିଂର ଫ୍ୟାନ୍‌ ହୋଇଛନ୍ତି । କେବଳ ଭାରତର ନୁହେଁ ବରଂ ସାରା ବିଶ୍ବର ପୂର୍ବତନ କ୍ରିକେଟର ଏବଂ କ୍ରିକେଟ୍‌ ଫ୍ୟାନ୍‌ ସୂର୍ଯ୍ୟବଂଶୀଙ୍କ ପ୍ରଶଂସା କରୁଛନ୍ତି । ଏହାରି ମଧ୍ୟରେ ପୂର୍ବତନ ଦକ୍ଷିଣ ଆଫ୍ରିକା ଦ୍ରୁତ ବୋଲର ଡେଲ୍ ଷ୍ଟେନ୍ ବୈଭବ ସୂର୍ଯ୍ୟବଂଶୀଙ୍କ ବିଷୟରେ ଏକ ସାହସିକ ଭବିଷ୍ୟବାଣୀ କରିଛନ୍ତି। ଡେଲ୍ ଷ୍ଟେନ୍ କହିଛନ୍ତି ଯେ ବୈଭବ ସୂର୍ଯ୍ୟବଂଶୀ ତାଙ୍କ କ୍ୟାରିଅରର ଶେଷ ସୁଦ୍ଧା ସଚିନ ତେନ୍ଦୁଲକର ଏବଂ ବିରାଟ କୋହଲିଙ୍କଠାରୁ ମଧ୍ୟ ଅଧିକ ସଫଳତା ହାସଲ କରିପାରିବେ ।

ଡେଲ୍ ଷ୍ଟେନ୍ ବୈଭବ ସୂର୍ଯ୍ୟବଂଶୀଙ୍କ ବିଷୟରେ କ’ଣ କହିଥିଲେ ଜାଣନ୍ତୁ ?

ବୈଭବ ସୂର୍ଯ୍ୟବଂଶୀ IPL 2026ରେ ଅରେଞ୍ଜ କ୍ୟାପ୍ ଜିତିଥିଲେ । ସେ IPL 2026ରେ ଚମତ୍କାର ପ୍ରଦର୍ଶନ କରି ୭୭୬ ରନ କରିଥିଲେ । ଏହା ପରେ, ବୈଭବ ସୂର୍ଯ୍ୟବଂଶୀଙ୍କୁ ଆୟର୍ଲାଣ୍ଡ ଏବଂ ଇଂଲଣ୍ଡ ଗସ୍ତ ପାଇଁ ଭାରତର T20 ଦଳରେ ମଧ୍ୟ ସାମିଲ କରାଯାଇଛି। "ସୂର୍ଯ୍ୟବଂଶୀ ଜଣେ ଭିନ୍ନ କ୍ଷମତାର ଖେଳାଳି । ସେ ବର୍ତ୍ତମାନ ଅନେକ ଅନ୍ତର୍ଜାତୀୟ ଖେଳାଳିଙ୍କ ତୁଳନାରେ ଭଲ। ସେ ଜଣେ ବିସ୍ମୟ ବାଳକ ଏବଂ ଭାରତୀୟ କ୍ରିକେଟ୍ ପାଇଁ ଏକ ସମ୍ପତ୍ତି" ବୋଲି କହିଛନ୍ତି ଡେଲ୍ ଷ୍ଟେନ୍‌ ।

ଷ୍ଟେନ୍ ଆହୁରି ମଧ୍ୟ କହିଛନ୍ତି, "ଯଦି ଆମେ ସଚିନ ତେନ୍ଦୁଲକର ଏବଂ ବିରାଟ କୋହଲିଙ୍କ ପରି କିମ୍ବଦନ୍ତୀ ବିଷୟରେ କଥା ହେବା, ତେବେ ଏହି ପିଲା ଭବିଷ୍ୟତରେ ସେମାନଙ୍କଠାରୁ ଆହୁରି ବଡ଼ ହୋଇପାରିବ । କିନ୍ତୁ ତାଙ୍କୁ ସଠିକ୍ ଭାବରେ ପରିଚାଳନା କରିବା ଗୁରୁତ୍ୱପୂର୍ଣ୍ଣ । ଯଦି ତାଙ୍କୁ ଠିକ୍ ଭାବରେ ପରିଚାଳନା କରାଯାଏ ନାହିଁ, ତେବେ ଆମେ ତାଙ୍କୁ ହରାଇ ପାରିବୁ ।"

ଷ୍ଟେନ୍ କହିଛନ୍ତି ଯେ ସୂର୍ଯ୍ୟବଂଶୀଙ୍କ ସବୁଠାରୁ ବଡ଼ ଶକ୍ତି ହେଉଛି ସର୍ବୋତ୍ତମ ବୋଲିଂକୁ ମଧ୍ୟ ସହଜରେ ମାରିବାର କ୍ଷମତା । ସେ କହିଛନ୍ତି, "ସେ ଜଣେ ଉତ୍କୃଷ୍ଟ ଷ୍ଟ୍ରାଇକର । ସେ ଭାରତରେ ଭଲ ୱିକେଟ୍ ଏବଂ ଛୋଟ ପଡ଼ିଆର ବହୁତ ଭଲ ଭାବରେ ଲାଭ ଉଠାଇଛନ୍ତି । ସେ ଜଣେ ବହୁତ ପ୍ରତିଭାଶାଳୀ ବ୍ୟାଟ୍ସମ୍ୟାନ " ବୋଲି ଷ୍ଟେନ୍‌ କହିଛନ୍ତି ।