ଜୁନ୍‌ ୨୬ରୁ ଭାରତ-ଆର୍ୟାଲାଣ୍ଡ ମଧ୍ୟରେ ଆରମ୍ଭ ହେବାକୁ ଯାଉଛି ଦୁଇ ମ୍ୟାଚ୍‌ ବିଶିଷ୍ଟ ଟି-୨୦ ସିରିଜ୍‌ । ଆଉ ଏହି ସିରିଜ୍‌ ପୂର୍ବରୁ "ବେବି ବସ୍" ବୈଭବ ସୂର୍ଯ୍ୟବଂଶୀଙ୍କୁ ନେଇ କ୍ରିକେଟ୍ ପ୍ରେମୀଙ୍କ ମଧ୍ୟରେ ଦେଖିବାକୁ ମିଳୁଛି ପ୍ରବଳ ଉତ୍ସାହ । ଆୟାର୍ଲାଣ୍ଡ ବିପକ୍ଷ ଟି-୨୦ ସିରିଜ୍‌ରେ ବୈଭବ ଡେବ୍ୟୁ କରିପାରନ୍ତି । ତେଣୁ ସୂର୍ଯ୍ୟବଂଶୀଙ୍କ ଧୁଆଁଧାର ବ୍ୟାଟିଂ ଦେଖିବାକୁ କ୍ରିକେଟ ପ୍ରେମୀଙ୍କ ମଧ୍ୟରେ ନାହିଁ ନଥିବା ଉତ୍ସାହ ଦେଖିବାକୁ ମିଳୁଛି ।

ପୂର୍ବତନ ଭାରତୀୟ ଏବଂ ଆଇରିଶ କ୍ରିକେଟର ଏମଭି ନରସିଂହ ରାଓ ବିଶ୍ୱାସ କରନ୍ତି ଯେ ସମଗ୍ର ୟୁରୋପରୁ କ୍ରିକେଟ୍ ପ୍ରେମୀ ବୈଭବଙ୍କୁ ପଡ଼ିଆରେ ଦେଖିବା ପାଇଁ ବେଲଫାଷ୍ଟ ଆସୁଛନ୍ତି । ସେ କହିଛନ୍ତି ଯେ ଷ୍ଟର୍ମଣ୍ଟ କ୍ରିକେଟ୍ ଗ୍ରାଉଣ୍ଡରେ ପ୍ରାୟ ୭,୦୦୦ ଦର୍ଶକଙ୍କ କ୍ଷମତା ଅଛି । କିନ୍ତୁ ବୈଭବଙ୍କୁ ଦେଖିବା ପାଇଁ ଟିକେଟ୍ ଚାହିଦା ନିରନ୍ତର ବୃଦ୍ଧି ପାଉଛି । ରାଓ କହିଛନ୍ତି ଯେ, ଲୋକମାନେ କେବଳ ଆୟାର୍ଲାଣ୍ଡରୁ ନୁହେଁ ବରଂ ପ୍ୟାରିସ ସମେତ ଅନ୍ୟାନ୍ୟ ୟୁରୋପୀୟ ସହରରୁ ମଧ୍ୟ ଆସିବାକୁ ଚାହାଁନ୍ତି । ତେଣୁ ଟିକେଟ୍‌ ନେଇ ଆୟୋଜକମାନେ ଏକ ବଡ଼ ଚ୍ୟାଲେଞ୍ଜର ସମ୍ମୁଖୀନ ହୋଇପାରନ୍ତି ।

ସେ ଆହୁରି ମଧ୍ୟ କହିଛନ୍ତି ଯେ ବୈଭବ ସୂର୍ଯ୍ୟବଂଶୀଙ୍କୁ ନେଇ ଜନସାଧାରଣଙ୍କ ମଧ୍ୟରେ ପ୍ରବଳ ଉତ୍ସାହ ଅଛି ଏବଂ ସମସ୍ତେ ତାଙ୍କୁ ଭାରତୀୟ ଦଳର ଜର୍ସିରେ ଖେଳିବାକୁ ଦେଖିବାକୁ ଚାହାଁନ୍ତି । ଯଦି ସେ ପ୍ଲେଇଂ ଇଲେଭେନରେ ସୁଯୋଗ ପାଆନ୍ତି, ତେବେ ଏହା ତାଙ୍କ କ୍ୟାରିୟରର ପ୍ରଥମ ଅନ୍ତର୍ଜାତୀୟ ମ୍ୟାଚ୍ ହେବ ।

ଭାରତୀୟ କ୍ରିକେଟରେ ଜଣେ ଉଦୀୟମାନ ତାରକା ଭାବରେ ନିଜକୁ ପ୍ରତିଷ୍ଠିତ କରିଥିବା ବୈଭବ ସୂର୍ଯ୍ୟବଂଶୀ କମ୍ ବୟସରେ ନିଜ ପ୍ରତିଭା ଦ୍ୱାରା ସମସ୍ତଙ୍କ ଦୃଷ୍ଟି ଆକର୍ଷଣ କରିସାରିଛନ୍ତି । ଏହି କାରଣରୁ ତାଙ୍କର ସମ୍ଭାବ୍ୟ ଡେବ୍ୟୁ କେବଳ ଭାରତ ନୁହେଁ ବରଂ ୟୁରୋପର କ୍ରିକେଟ ପ୍ରଶଂସକଙ୍କ ମଧ୍ୟରେ ଯଥେଷ୍ଟ ଉତ୍ସାହ ସୃଷ୍ଟି କରୁଛି ।