ରାଜସ୍ଥାନ ରୟାଲ୍ସର ଓପନର ବୈଭବ ସୂର୍ଯ୍ୟବଂଶୀ ଚଳିତ ଆଇପିଏଲରେ ଦମଦାର ବ୍ୟାଟିଂ କରୁଛନ୍ତି । ତାଙ୍କର ବିସ୍ଫୋରକ ବ୍ୟାଟିଂର ଭିଡିଓ ସୋସିଆଲ ମିଡିଆରେ ବେଶ୍‌ ଭାଇରାଲ ହେଉଛି । ତେବେ ଏହାରି ମଧ୍ୟରେ ବୈଭବଙ୍କ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି । ଯେଉଁଥିରେ ଦେଖିବାକୁ ମିଳୁଛି କି ବୈଭବ ବିମାନବନ୍ଦରରେ ଦୁଇ ଯୁବ ପ୍ରଶଂସକଙ୍କ ସହ ମଜାକ୍‌ କରୁଛନ୍ତି । ସେ କହୁଛନ୍ତି ଯେ ସେ ଗୋଟିଏ ଫଟୋ ପାଇଁ ୧୦୦ ଟଙ୍କା ନେବେ । ଏହି ଭିଡିଓଟି ରାଜସ୍ଥାନ ରୟାଲ୍ସ ସେମାନଙ୍କର ସୋସିଆଲ ମିଡିଆ ପ୍ଲାଟଫର୍ମରେ ସେୟାର କରିଛନ୍ତି ।

କ୍ଲିପ୍‌ରେ ଦୁଇଜଣ ଛୋଟ ଛୋଟ ପିଲା ସୂର୍ଯ୍ୟବଂଶୀଙ୍କ ପାଖକୁ ଫଟୋ ପାଇଁ ଆସନ୍ତି । ସେ ତାଙ୍କୁ ମନା କରୁନାହାନ୍ତି, କିନ୍ତୁ କହନ୍ତି ଯେ ସେ ମାଗଣାରେ ପୋଜ୍ ଦେବେ ନାହିଁ । ସୂର୍ଯ୍ୟବଂଶୀ କହିଥିଲେ, “ଭାଇ, ମୁଁ ଟଙ୍କା ନେଉଛି । ମୁଁ ତୁମକୁ ସତ କହୁଛି, ଭାଇ । ମୁଁ ୧୦୦ ଟଙ୍କା ନେବି ।” ତାପରେ ସେହି ଫ୍ୟାନ୍‌ମାନେ ୨୦୦ ଟଙ୍କା ନେଇ ଆସନ୍ତି । ତାପରେ ସୂର୍ଯ୍ୟବଂଶୀ କହିନ୍ତି ଏହା ଗୋଟିଏ ପ୍ରାଙ୍କ ଥିଲା । ପରେ ସେ ତାଙ୍କ ସହ କିଛି ଫଟୋ ପାଇଁ ପୋଜ୍‌ ଦିଅନ୍ତି ।

Baccha party always a step ahead 😂 pic.twitter.com/locrozR0Yh

— Rajasthan Royals (@rajasthanroyals) April 27, 2026

ବୈଭବ ସୂର୍ଯ୍ୟବଂଶୀ ସମ୍ପ୍ରତି ହାଇଦ୍ରାବାଦ ବିପକ୍ଷରେ ୩୬ ବଲ୍‌ରେ ତାଙ୍କର ଦ୍ୱିତୀୟ IPL ଶତକ ହାସଲ କରିଛନ୍ତି । ଯାହା ଟୁର୍ଣ୍ଣାମେଣ୍ଟ ଇତିହାସର ତୃତୀୟ ଦ୍ରୁତତମ ଶତକ । ଏହି ଇନିଂସକୁ SRH ଅଧିନାୟକ ପ୍ୟାଟ୍ କମିନ୍ସ ମଧ୍ୟ ପ୍ରଶଂସା କରିଥିଲେ, ଯିଏ କହିଥିଲେ ଯେ ବୈଭବ ଏବେ ତାଙ୍କର ପ୍ରିୟ ଖେଳାଳି ।

ସୂର୍ଯ୍ୟବଂଶୀ ଚଳିତ ଆଇପିଏଲରେ ଏପର୍ଯ୍ୟନ୍ତ ଆଠଟି ମ୍ୟାଚ୍‌ରେ ୩୫୭ ରନ୍ କରିଛନ୍ତି । ସେ ଏହି ସିଜନରେ ୩୧ ଚୌକା ଏବଂ ୩୨ ଛକା ମାରିଛନ୍ତି ।