Vaibhav Explosive Batting / ସେମିଫାଇନାଲରେ ଛକାର ବର୍ଷା, ୧୦ ଚୌକା...୯ ଛକା ସହ ବୈଭବଙ୍କ ବିସ୍ଫୋରଣ

ବୟସ ମାତ୍ର ୧୫, କିନ୍ତୁ ବିସ୍ଫୋରକ ବ୍ୟାଟିଂ ବଳରେ ସୃଷ୍ଟି କରିଛନ୍ତି ଏକ ସ୍ବତନ୍ତ୍ର ପରିଚୟ । ପ୍ରଥମେ IPL, ପରେ ଇଣ୍ଡିଆ A ଓ ଅଣ୍ଡର-୧୯ ବିଶ୍ୱକପ୍‌ରେ ଧମାଲ କରିଥିବା ବୈଭବ ସୂର୍ଯ୍ୟବଂଶୀ ଏବେ ସବୁଠୁ ବଡ଼ ଘରୋଇ ଟୁର୍ଣ୍ଣାମେଣ୍ଟ ଦୁଲୀପ ଟ୍ରଫିରେ ବି ରଚିଛନ୍ତି ନୂଆ ଇତିହାସ । ୪୨ ବଲ୍‌ରେ ଅର୍ଦ୍ଧଶତକ, ଦୁଇଟି ପାଳିରେ ୧୩୨ ରନ୍ ଏବଂ ବ୍ୟାଟ୍‌ରୁ ଚୌକା-ଛକାର ବର୍ଷା । ଖାଲି ବ୍ୟାଟିଂ ନୁହେଁ, ଅଧିନାୟକ ଭାବେ ନିଆ ଗୋଟିଏ DRS ନିଷ୍ପତ୍ତି ମଧ୍ୟ ତାଙ୍କୁ ଚର୍ଚ୍ଚା କେନ୍ଦ୍ରବିନ୍ଦୁ କରିଛି ।
ଦୁଲୀପ ଟ୍ରଫିରେ ଇଷ୍ଟ ଜୋନ୍ ପାଇଁ ଖେଳୁଥିବା ବୈଭବ ସୂର୍ଯ୍ୟବଂଶୀ ସେଣ୍ଟ୍ରାଲ ଜୋନ୍ ବିପକ୍ଷ ସେମିଫାଇନାଲରେ ଦୁଇଟି ପାଳିକୁ ମିଶାଇ ମୋଟ ୧୩୨ ରନ୍ କରିଛନ୍ତି । ତାଙ୍କ ବ୍ୟାଟ୍‌ରୁ ଆସିଛି ୧୦ଟି ଚୌକା ଓ ୯ଟି ଛକା । ବୈଭବ ପ୍ରଥମ ପାଳିରେ ଖେଳିଥିଲେ ବିସ୍ଫୋରକ ୯୨ ରନ୍‌ର ଇନିଂସ୍ । ଶତକଠାରୁ ମାତ୍ର ୮ ରନ୍ ଦୂରରେ ଥାଇ ସେ ଆଉଟ ହୋଇ ପ୍ୟାଭିଲିୟନ୍ ଫେରିଥିଲେ ।

ଦ୍ୱିତୀୟ ପାଳିରେ ମଧ୍ୟ ବୈଭବଙ୍କ ବ୍ୟାଟ୍ ଶାନ୍ତ ରହିନଥିଲା । ମାତ୍ର ୪୩ଟି ବଲ୍‌ରେ ସେ ଧୁଆଁଧାର ୪୦ ରନ୍ କରିଥିଲେ। ଏହି ପାଳିରେ ସେ ୩ଟି ଚୌକା ଓ ୨ଟି ଛକା ମାରିଥିଲେ ।

ଦୁଲୀପ ଟ୍ରଫିରେ ନୂଆ ରେକର୍ଡ

ଏହି ପ୍ରଦର୍ଶନ ସହ ବୈଭବ ଦୁଲୀପ ଟ୍ରଫି ଇତିହାସରେ ସବୁଠାରୁ କମ୍ ବୟସରେ ଅର୍ଦ୍ଧଶତକ ହାସଲ କରିଥିବା ବ୍ୟାଟ୍ସମ୍ୟାନ୍‌ ହୋଇଛନ୍ତି । ଇଷ୍ଟ ଜୋନ୍‌ର ଇନିଂସ୍‌ର ପ୍ରଥମ ୧୫ ଓଭର ମଧ୍ୟରେ ବୈଭବ ନିଜର ଅର୍ଦ୍ଧଶତକ ହାସଲ କରିଥିଲେ । ୧୫ ବର୍ଷ ୧୫୭ ଦିନ ବୟସରେ ଦୁଲୀପ ଟ୍ରଫିରେ ୫୦ ରନ୍ କରି ବୈଭବ ନୂଆ ରେକର୍ଡ ତିଆରି କରିଛନ୍ତି।

ସବୁଠୁ କମ୍‌ ବୟସରେ ଦୁଲୀପ ଟ୍ରଫିରେ ଅର୍ଦ୍ଧଶତକ

୧୫ ବର୍ଷ ୧୫୭ ଦିନ – ବୈଭବ ସୂର୍ଯ୍ୟବଂଶୀ
୧୬ ବର୍ଷ ୨୩ ଦିନ – ଲକ୍ଷ୍ମଣ ସିଂହ
୧୬ ବର୍ଷ ୩୦୭ ଦିନ – ପୀୟୁଷ ଚାୱଲା

କେବଳ ବ୍ୟାଟିଂ ନୁହେଁ, ଏହି ସେମିଫାଇନାଲର ପ୍ରଥମ ଦିନ ବୈଭବଙ୍କୁ ଅଧିନାୟକ ଭାବେ ମଧ୍ୟ ଦେଖିବାକୁ ମିଳିଥିଲା । ଅଧିନାୟକ ଭାବେ ତାଙ୍କର ଗୋଟିଏ DRS ନିଷ୍ପତ୍ତି ମଧ୍ୟ ଖୁବ୍ ଚର୍ଚ୍ଚାରେ ରହିଥିଲା । ବୈଭବ ନେଇଥିବା DRS ସଠିକ୍ ପ୍ରମାଣିତ ହୋଇଥିଲା ଏବଂ ଅମ୍ପାୟାରଙ୍କୁ ନିଜ ନିଷ୍ପତ୍ତି ବଦଳାଇବାକୁ ପଡ଼ିଥିଲା । ଏବେ ଦେଖିବାକୁ ବାକି, ଏହି ଯୁବ ତାରକା ଆଗାମୀ ଦିନରେ ଆଉ କେତେ ବଡ଼ ରେକର୍ଡ ନିଜ ନାମରେ କରୁଛନ୍ତି ।