Argus News - ଗୁରୁତର ଅସୁସ୍ଥ ଭାରତର ଏହି କ୍ରିକେଟର; କିଛି ମନେ ରହୁନି, ମାଗୁଛନ୍ତି ସାହାଯ୍ୟ

କଥାରେ ଅଛି ସ୍ଵାସ୍ଥ୍ୟ ହିଁ ସମ୍ପଦ । ଦୈନନ୍ଦିନ ଜୀବନ ଯେତେ ବି ବ୍ୟସ୍ତବହୁଳତାରେ ରହୁ ନା କାହିଁକି କେବେ ବି ନିଜ ସ୍ଵାସ୍ଥ୍ୟକୁ ଅଣଦେଖା କରିବା ଉଚିତ ନୁହେଁ । କିନ୍ତୁ ଆଜିର ଆଧୁନିକ ଜୀବନରେ ଲୋକେ ନିଜ କାମରେ ଏପରି ମାତ୍ରାରେ ମଜି ଯାଉଛନ୍ତି ଯେ ଠିକ୍ ସମୟରେ ଖାଇବା, ଯଥେଷ୍ଟ ପାଣି ପିଇବା, ଏପରିକି ଶରୀର ଦେଉଥିବା ସଙ୍କେତକୁ ବି ଅଣଦେଖା କରନ୍ତି । ପରବର୍ତ୍ତୀ ସମୟରେ ଏହା ବଡ଼ ସମସ୍ୟା ସୃଷ୍ଟି କରେ । ବଡ଼ ବଡ଼ ବ୍ୟକ୍ତିବିଶେଷ ବି ଏଥିରୁ ବର୍ତ୍ତିପାରନ୍ତିନି । କାରଣ ଜଣେ ଜଣାଶୁଣା ଭାରତୀୟ କ୍ରିକେଟର ଏବେ ଏପରି କିଛି ପରିସ୍ଥିତିର ସମ୍ମୁଖୀନ ହେଉଛନ୍ତି ।

ସଚିନ ତେନ୍ଦୁଲକରଙ୍କ ବାଲ୍ୟ ବନ୍ଧୁ ତଥା ପୂର୍ବତନ ଭାରତୀୟ କ୍ରିକେଟର ବିନୋଦ କାମ୍ବଲି ବର୍ତ୍ତମାନ ଗୁରୁତର ଅସୁସ୍ଥ ଅଛନ୍ତି। ତାଙ୍କ ମସ୍ତିଷ୍କରେ ରକ୍ତ ଜମାଟ ବାନ୍ଧିଛି, ଯାହାକୁ ହଟାଇବା ବର୍ତ୍ତମାନ ଅସମ୍ଭବ ପରି ଲାଗୁଛି । ଡାକ୍ତରମାନେ ତାଙ୍କୁ ବ୍ରେନ୍ ଷ୍ଟ୍ରୋକର ଆଶଙ୍କା ବିଷୟରେ ଚେତାବନୀ ଦେଉଛନ୍ତି । ତାଙ୍କର ସ୍ମୃତିଶକ୍ତି ହ୍ରାସ ପାଇବାରେ ଲାଗିଛି । ବିନୋଦ କାମ୍ବଲି ଥରେ କୋଟିପତି ଥିଲେ । ଆଜି ତାଙ୍କ ଚିକିତ୍ସା ପାଇଁ ମଧ୍ୟ ତାଙ୍କୁ ଆର୍ଥିକ ସହାୟତାର ଆବଶ୍ୟକତା ପଡ଼ିଛି ।

• ଦିନେ ଧନୀ ଥିଲେ ବିନୋଦ

ତାଙ୍କ କ୍ୟାରିୟରର ଶିଖର ସମୟରେ, ବିନୋଦ କାମ୍ବଲିଙ୍କ ସମ୍ପତ୍ତି ପ୍ରାୟ ₹୮ କୋଟିରୁ ₹୧୨ କୋଟି ଥିଲା ବୋଲି ଆକଳନ କରାଯାଇଥିଲା । କିଛି ରିପୋର୍ଟ ଏହାକୁ ₹୧୩ କୋଟି ବୋଲି ମଧ୍ୟ କହିଥିଲେ । ତଥାପି, ଏହା କ୍ଷଣସ୍ଥାୟୀ ଥିଲା । ବିନୋଦ କାମ୍ବଲିଙ୍କ ବର୍ତ୍ତମାନର ସମ୍ପତ୍ତି କଥା କହିଲେ, ସେ ବାର୍ଷିକ ୩ ଲକ୍ଷରୁ ୫ ଲକ୍ଷ ଟଙ୍କା ହେବ ବୋଲି ଆକଳନ କରାଯାଇଛି । ଏବେ ତାଙ୍କ ପରିବାର BCCI ଠାରୁ ପାଉଥିବା ୩୦,୦୦୦ ଟଙ୍କା ପେନସନରେ ଘର ଚଳୁଛି ।

• ବିନୋଦ କାମ୍ବଲିଙ୍କ ଘର

ବିନୋଦ କାମ୍ବଲି ବର୍ତ୍ତମାନ ମୁମ୍ବାଇରେ ଏକ ଫ୍ଲାଟ୍ ମାଲିକ । ବର୍ତ୍ତମାନେ ସେ କିଛି ରୋଜଗାର କରୁନଥିବାରୁ ଘରକୁ ସେପରି ନଗଦ ଟଙ୍କା ଆସିପାରୁନାହିଁ । ସେ ଏବେ ଚାଲିପାରୁ ନାହାଁନ୍ତି, ଯାହା ଫଳରେ ତାଙ୍କର ଆୟ ଉତ୍ସ ହ୍ରାସ ପାଇବାରେ ଲାଗିଛି । ବିନୋଦ କାମ୍ବଲିଙ୍କର ଥରେ ଟିଭି ବିଜ୍ଞାପନ ଥିଲା । ସେ ବ୍ରାଣ୍ଡ ଡିଲରୁ ମଧ୍ୟ ଟଙ୍କା ରୋଜଗାର କରୁଥିଲେ । ତାଙ୍କର କ୍ରିକେଟ୍ କ୍ୟାରିଅର ଶେଷ ହେବା ପରେ, ସେ କିଛି ରିଆଲିଟି ଶୋ’ରେ ଦେଖାଦେଇଥିଲେ ଏବଂ କିଛି ସମୟ ପାଇଁ କମେଣ୍ଟ୍ରିରେ ମଧ୍ୟ କରୁଥିଲେ ।

ପଢନ୍ତୁ ଏହି ଖବର: RCBର ବିଜୟ ପରେ ଫ୍ୟାନ୍ସଙ୍କୁ ବଡ଼ କଥା କହିଦେଲେ ବିରାଟ କୋହଲି…

• ସାହାଯ୍ୟ ଲୋଡ଼ିଛନ୍ତି ବିନୋଦ

କାମ୍ବଲିଙ୍କ ଜଣେ ଘନିଷ୍ଠ ବନ୍ଧୁ କହିଛନ୍ତି ଯେ ଅନେକ କ୍ରିକେଟର ଏବେ ତାଙ୍କ ଚିକିତ୍ସା ପାଇଁ ଟଙ୍କା ଦେଉଛନ୍ତି, ଯାହା କାରଣରୁ ସେ ବର୍ତ୍ତମାନ ଚିକିତ୍ସାଧୀନ ଅଛନ୍ତି । ତାଙ୍କ ଅବସ୍ଥା ବର୍ତ୍ତମାନ ସ୍ଥିର ଥିବା ରିପୋର୍ଟ କରାଯାଇଛି, କିନ୍ତୁ ତାଙ୍କୁ ବ୍ରେନ୍ ଷ୍ଟ୍ରୋକ୍ ହେବାର ଆଶଙ୍କା ରହିଛି ।