Virat Kohli Domestic Cricket / ପୁଣି ଘରୋଇ କ୍ରିକେଟ୍‌କୁ ଫେରିବେ କିଙ୍ଗ୍ କୋହଲି ? ୨୦୨୭ ବିଶ୍ୱକପ୍ ପାଇଁ ବଡ଼ ପ୍ଲାନ୍

୧୫ ବର୍ଷ ପରେ ଘରୋଇ କ୍ରିକେଟ୍‌କୁ ଫେରିଥିଲେ…ଆଉ ମାତ୍ର ଦୁଇଟି ମ୍ୟାଚ୍‌ରେ ନିଜ ବ୍ୟାଟ୍‌ର ଜଲୱା ଦେଖାଇ ୨୦୮ ରନ୍‌ କରିଥିଲେ କିଙ୍ଗ୍ କୋହଲି । ଏବେ ପୁଣି ଥରେ ଦିଲ୍ଲୀର ଜର୍ସିରେ ମଇଦାନକୁ ଓହ୍ଲାଇବେ କି ବିରାଟ ? ୨୦୨୭ ଦିନିକିଆ ବିଶ୍ୱକପ୍‌କୁ ନେଇ ବିରାଟଙ୍କ ଲକ୍ଷ୍ୟ ବହୁତ ବଡ଼ । ଆଉ ସେହି ଲକ୍ଷ୍ୟ ପାଇଁ ବିଜୟ ହଜାରେ ଟ୍ରଫି ହୋଇପାରେ ତାଙ୍କର ପରବର୍ତ୍ତୀ ବଡ଼ ପ୍ରସ୍ତୁତି !

ଗତ ସିଜନ୍‌ରେ ଦୀର୍ଘ ୧୫ ବର୍ଷ ପରେ ବିଜୟ ହଜାରେ ଟ୍ରଫିକୁ ଫେରିଥିଲେ ବିରାଟ କୋହଲି । ଦିଲ୍ଲୀ ପାଇଁ ସେ ମାତ୍ର ଦୁଇଟି ମ୍ୟାଚ୍ ଖେଳିଥିଲେ । କିନ୍ତୁ ଏହି ଦୁଇଟି ମ୍ୟାଚ୍‌ରେ ହିଁ ତାଙ୍କ ବ୍ୟାଟ୍‌ରୁ ଦେଖିବାକୁ ମିଳିଥିଲା ଜବରଦସ୍ତ ଫର୍ମ । ଆନ୍ଧ୍ର ପ୍ରଦେଶ ବିପକ୍ଷ ମ୍ୟାଚ୍‌ରେ କୋହଲି ମାତ୍ର ୧୦୧ଟି ବଲ୍‌ରେ ଧମାକାଦାର ୧୩୧ ରନ୍ କରିଥିଲେ । ତା’ପରେ ଗୁଜରାଟ ବିପକ୍ଷରେ ମଧ୍ୟ ତାଙ୍କ ବ୍ୟାଟ୍ ଚୁପ୍ ରହିନଥିଲା । ୬୧ଟି ବଲ୍‌ରୁ ୭୭ ରନ୍ କରିଥିଲେ କିଙ୍ଗ୍ କୋହଲି । ଅର୍ଥାତ୍ ମାତ୍ର ଦୁଇଟି ମ୍ୟାଚ୍‌ରେ ୨୦୮ ରନ୍ କରିଥିଲେ ବିରାଟ କୋହଲି ।

ଏବେ ପ୍ରଶ୍ନ ହେଉଛି—୨୦୨୬-୨୭ ସିଜିନ୍‌ର ବିଜୟ ହଜାରେ ଟ୍ରଫିରେ ପୁଣି ଥରେ କୋହଲିଙ୍କୁ ଦେଖିବାକୁ ମିଳିବ କି ? ବିଜୟ ହଜାରେ ଟ୍ରଫିର ଆଗାମୀ ସିଜିନ୍ ଡିସେମ୍ବର ୧୪ରୁ ଆରମ୍ଭ ହେବ । ଏହା ପୂର୍ବରୁ ଏହି ପ୍ରଶ୍ନର ଉତ୍ତର ଦେଇଛନ୍ତି DDCAର ଅଧ୍ୟକ୍ଷ ରୋହନ ଜେଟଲୀ ।

ତାଙ୍କ କହିବା ଅନୁସାରେ, ଦିଲ୍ଲୀ ହେଉଛି ବିରାଟଙ୍କ ଘରୋଇ କ୍ରିକେଟ୍ ଆସୋସିଏସନ୍ । ଯେତେବେଳେ ବି ବିରାଟ ଉପଲବ୍ଧ ରହିବେ ଏବଂ ତାଙ୍କ ୱର୍କଲୋଡ୍ ଅନୁମତି ଦେବ, ସେତେବେଳେ ସେ ପୁଣି ଦିଲ୍ଲୀ ପାଇଁ ଘରୋଇ କ୍ରିକେଟ୍ ଖେଳିବେ । ରୋହନ ଜେଟଲୀଙ୍କ ଏହି ବୟାନ ପରେ କୋହଲିଙ୍କ ଫ୍ୟାନ୍ସଙ୍କ ମଧ୍ୟରେ ଉତ୍ସାହ ଆହୁରି ବଢ଼ିଯାଇଛି । କାରଣ ଏବେ ବିରାଟଙ୍କ ଆଗରେ ରହିଛି ଆଉ ଏକ ବଡ଼ ଲକ୍ଷ୍ୟ—୨୦୨୭ ଦିନିକିଆ ବିଶ୍ୱକପ୍ ।

T20I ଏବଂ ଟେଷ୍ଟ କ୍ରିକେଟ୍‌ରୁ ଅବସର ନେବା ପରେ ବିରାଟଙ୍କ ମ୍ୟାଚ୍ ସଂଖ୍ୟା ନିଶ୍ଚିତ ଭାବରେ କମିଛି । କିନ୍ତୁ ତାଙ୍କ ଲକ୍ଷ୍ୟ ଏବେ ବି ସ୍ପଷ୍ଟ, ୨୦୨୭ ODI ବିଶ୍ୱକପ୍ ପାଇଁ ନିଜକୁ ସମ୍ପୂର୍ଣ୍ଣ ଫିଟ୍ ଏବଂ ପ୍ରସ୍ତୁତ ରଖିବା । ଆଉ ଏହି କାରଣରୁ ବିଜୟ ହଜାରେ ଟ୍ରଫି ତାଙ୍କ ପାଇଁ ଏକ ବଡ଼ ପ୍ଲାଟଫର୍ମ ହୋଇପାରେ ।

ଘରୋଇ କ୍ରିକେଟ୍‌ରେ ଖେଳିଲେ ତାଙ୍କର ମ୍ୟାଚ୍ ପ୍ରାକ୍ଟିସ୍ ବଢ଼ିବ, ଫର୍ମ ମଜବୁତ ହେବ ଏବଂ ୨୦୨୭ ବିଶ୍ୱକପ୍ ପାଇଁ ପ୍ରସ୍ତୁତି ମଧ୍ୟ ଆହୁରି ଶକ୍ତିଶାଳୀ ହୋଇପାରିବ । ତେବେ ଏବେ ସମସ୍ତଙ୍କ ନଜର ରହିବ ଡିସେମ୍ବର ୧୪ ଉପରେ । କାରଣ ଯଦି କିଙ୍ଗ୍ କୋହଲି ପୁଣି ଥରେ ଦିଲ୍ଲୀର ଜର୍ସି ପିନ୍ଧି ମଇଦାନକୁ ଓହ୍ଲାନ୍ତି, ତାହେଲେ ଘରୋଇ କ୍ରିକେଟ୍‌ରେ ମଧ୍ୟ ତାଙ୍କ ବ୍ୟାଟ୍‌ର ଗର୍ଜନ ଦେଖିବାକୁ ମିଳିପାରେ ।