୧୨୮ ବର୍ଷ ପରେ ଅଲିମ୍ପିକ୍ସକୁ ଫେରିବ କ୍ରିକେଟ୍‌ । ୨୦୨୮ରେ ଲସ୍‌ ଆଞ୍ଜେଲସ୍‌ରେ ହେବାକୁ ଥିବା ଅଲିମ୍ପିକ୍ସରେ କ୍ରିକେଟ୍‌କୁ ଆନୁଷ୍ଠାନିକ ଭାବେ ସାମିଲ କରାଯାଇଛି । ଟି-୨୦ ଫର୍ମାଟ୍‌ରେ ୨୦୨୮ ଅଲିମ୍ପିକ୍ସରେ କ୍ରିକେଟ୍‌ ଖେଳାଯିବ । ତେବେ ଏହି ଇଭେଣ୍ଟରେ ଭାରତକୁ ସ୍ବର୍ଣ୍ଣ ପଦକ ପାଇଁ ଏକ ଦୃଢ଼ ଦାବିଦାର ବୋଲି ବିବେଚନା କରାଯାଉଛି । ତେବେ ଏସବୁ ମଧ୍ୟରେ ଦୁଇଟି ବିଶ୍ବକପ୍‌ରେ ଭାରତକୁ ପ୍ରତିନିଧିତ୍ବ କରିଥିବା ପୂର୍ବତନ ଦ୍ରୁତ ବୋଲର ଏସ୍‌. ଶ୍ରୀସନ୍ଥ ବିସିସିଆଇ ଚୟନକର୍ତ୍ତାଙ୍କୁ ଗୁରୁତ୍ବପୂର୍ଣ୍ଣ ପରାମର୍ଶ ଦେଇଛନ୍ତି ।

ଶ୍ରୀସନ୍ଥ କହିଛନ୍ତି ଯେ, ଭାରତ ଅଲିମ୍ପିକ୍ସ ସ୍ୱର୍ଣ୍ଣ ପଦକ ଜିତିବା ପାଇଁ ତା'ର ସବୁଠାରୁ ଶକ୍ତିଶାଳୀ ଦଳକୁ ପଡ଼ିଆକୁ ଓହ୍ଲାଇବା ଉଚିତ୍ । ଅଲିମ୍ପିକ୍ସରେ ସ୍ବର୍ଣ୍ଣ ଜିତିବା ପାଇଁ ବିରାଟ କୋହଲିଙ୍କ ପ୍ରତ୍ୟାବର୍ତ୍ତନ ଉପରେ ବିଚାର କରାଯିବା ଉଚିତ । ସେ କହିଛନ୍ତି ଯେ ଅଭିଜ୍ଞ ବିରାଟ କୋହଲି ଏବଂ ବିସ୍ମୟ ବାଳକ ବୈଭବ ସୂର୍ଯ୍ୟବଂଶୀଙ୍କ ଯୋଡ଼ି ଭାରତୀୟ ଦଳ ପାଇଁ ଏକ ସନ୍ତୁଳନ ସୃଷ୍ଟି କରିପାରିବେ ।

ଏକ ସାକ୍ଷାତକାରରେ ଆଲୋଚନା ସମୟରେ ଶ୍ରୀସନ୍ଥ କହିଛନ୍ତି, "ବିରାଟ ଭାରତୀୟ କ୍ରିକେଟ୍ ପାଇଁ ଯାହା କରିଛନ୍ତି ତାହା ଅବିଶ୍ୱସନୀୟ । ଯଦି ଅଲିମ୍ପିକ୍ସ ସ୍ୱର୍ଣ୍ଣ କଥା ଆସେ, ତେବେ ମୁଁ ଅନୁରୋଧ କରିବି ଯେ ବିରାଟ ଟିମ୍‌ରେ ଖେଳିବା ଉଚିତ୍ । ବରିଷ୍ଠ ଏବଂ ଜୁନିଅର ଖେଳାଳିଙ୍କ ଏହି ମିଶ୍ରଣ ଚମତ୍କାର ହେବ ।''

ସେ ଆହୁରି କହିଛନ୍ତି, "ଚୟନକର୍ତ୍ତାମାନେ ବିରାଟ କୋହଲିଙ୍କୁ ଟି-୨୦ ଦଳରେ ରଖିବା ଉଚିତ । ତାଙ୍କ ଫିଟନେସ୍ ଦେଖନ୍ତୁ। ଏହି ବକ୍ତବ୍ୟ ବିବାଦୀୟ ହୋଇପାରେ, କିନ୍ତୁ ମୁଁ ଚୟନକର୍ତ୍ତାମାନଙ୍କୁ ଅନୁରୋଧ କରିବି କି ସେମାନେ ଅଲିମ୍ପିକ୍ସ ପାଇଁ ବିରାଟଙ୍କୁ ଟିମ୍‌ରେ ସାମିଲ କରନ୍ତୁ ।

ସୂଚନା ଅନୁସାରେ, ବିରାଟ କୋହଲି ୨୦୨୪ ଟି-୨୦ ବିଶ୍ୱକପରେ ଭାରତକୁ ବିଜୟୀ କରାଇବା ପରେ ଟି-୨୦ ଅନ୍ତର୍ଜାତୀୟ କ୍ରିକେଟରୁ ଅବସର ନେଇଥିଲେ । ଦକ୍ଷିଣ ଆଫ୍ରିକା ବିପକ୍ଷରେ ଫାଇନାଲ ଜିତିବା ପରେ ସେ ତାଙ୍କ ଟି-୨୦ କ୍ୟାରିୟରର ଅଲବିଦା କହିଥିଲେ ।

ଅନ୍ୟପକ୍ଷରେ, ବୈଭବ ସୂର୍ଯ୍ୟବଂଶୀ ଭାରତୀୟ କ୍ରିକେଟ୍‌ରେ ଏକ ବଡ଼ ନାମ ଭାବରେ ଉଭା ହୋଇଛନ୍ତି। ମାତ୍ର ୧୫ ବର୍ଷ ବୟସରେ, ସେ ୨୦୨୬ ଆଇପିଏଲ୍‌ରେ ୭୭୬ ରନ୍ ସହିତ ସର୍ବାଧିକ ରନ୍ ସ୍କୋରରଙ୍କ ଆଖ୍ୟା ଅର୍ଜନ କରିଥିଲେ । ତାଙ୍କର ପ୍ରଭାବଶାଳୀ ପ୍ରଦର୍ଶନ ଚୟନକର୍ତ୍ତାମାନଙ୍କୁ ପ୍ରଭାବିତ କରିଥିଲା ​​ଏବଂ ଯାହାଫଳରେ ଆର୍ୟାଲାଣ୍ଡ ଓ ଇଂଲଣ୍ଡ ବିପକ୍ଷ ସିରିଜ୍‌ରେ ତାଙ୍କୁ ଭାରତୀୟ ଦଳରେ ସାମିଲ କରାଯାଇଛି ।