ଭାରତ ଉପରେ ୫୦ ପ୍ରତିଶତ ଟାରିଫ୍‌ ଲଗାଇଛି ଆମେରିକା । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଏହି ଶୁଳ୍କ ନୀତି କେବଳ ବିଶ୍ୱବ୍ୟାପୀ ବ୍ୟବସାୟକୁ ପ୍ରଭାବିତ କରିନାହିଁ, ବରଂ ଏସିଆର ଦୁଇଟି ବଡ଼ ଦେଶ ଭାରତ ଏବଂ ଚୀନ୍ ମଧ୍ୟରେ ସମ୍ପର୍କକୁ ମଧ୍ୟ ସୁଧାରି ଦେଇଛି । ଏମିତି କହିବାର କାରଣ ହେଉଛି, ଗାଲୱାନ୍ ବିବାଦ ପରେ ଭାରତ-ଚୀନ୍ ମଧ୍ୟରେ ସମ୍ପର୍କ ଖରାପ ହୋଇଥିଲା । ଆଉ ଅପରେସନ୍ ସିନ୍ଦୂରରେ ଚୀନ୍ ପାକିସ୍ତାନକୁ ସାହଯ୍ୟ ଏହାକୁ ଅଧିକ ଜଟିଳ କରିଥିଲା । ତେବେ ଟ୍ରମ୍ପଙ୍କ ଶୁଳ୍କ ନୀତି ପାଇଁ ଏବେ ଏହି ଦୁଇ ଦେଶର ସମ୍ପର୍କ ସୁଧାରିଛି । ଉଭୟ ଦେଶ ମଧ୍ୟରେ ଖରାପ ହୋଇଥିବା ସମ୍ପର୍କରେ ଉନ୍ନତି ଆଣିବା ପାଇଁ ପ୍ରୟାସ ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ଦ୍ୱାରା ଆରମ୍ଭ କରାଯାଇଥିଲା। ଭାରତ-ଚୀନ୍ ସମ୍ପର୍କକୁ ସୁଧାରିବା ପାଇଁଇଚ୍ଛା ପ୍ରକାଶ କରି ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଏକ ଗୁପ୍ତ ଚିଠି ମଧ୍ୟ ଲେଖିଥିଲେ ।

ସମ୍ପର୍କକୁ ସୁଧାରିବା ପାଇଁ ଚୀନ୍ ଛଅ ମାସ ପୂର୍ବରୁ ମୂଳଦୁଆ ପକାଇଥିଲା । ଚୀନ୍ ରାଷ୍ଟ୍ରପତି ସି ଜିନପିଙ୍ଗ ମାର୍ଚ୍ଚ ମାସରେ ଭାରତୀୟ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଏକ ଗୁପ୍ତ ଚିଠି ଲେଖିଥିଲେ। ଏହି ଚିଠିକୁ ଭାରତ-ଚୀନ୍ ସମ୍ପର୍କକୁ ସୁଧାରିବା ପାଇଁ ଏକ ପ୍ରମୁଖ ପଦକ୍ଷେପ ଭାବରେ ବର୍ଣ୍ଣନା କରାଯାଇଥିଲା। ଏହି ଚିଠି ଏପରି ସମୟରେ ପଠାଯାଇଥିଲା ଯେତେବେଳେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଟାରିଫ୍ ଓ୍ବାର୍ ଆରମ୍ଭ କରିବାକୁ ଇଙ୍ଗିତ ଦେଇଥିଲେ।

ବ୍ଲୁମବର୍ଗର ଏକ ରିପୋର୍ଟ ଅନୁଯାୟୀ, ଜଣେ ଭାରତୀୟ ବରିଷ୍ଠ ଅଧିକାରୀ କହିଛନ୍ତି ଯେ ମାର୍ଚ୍ଚ ମାସରେ ପଠାଯାଇଥିବା ଚିଠିରେ ଚୀନ୍ ରାଷ୍ଟ୍ରପତି ଭାରତ-ଚୀନ୍ ସମ୍ପର୍କକୁ ସୁଧାରିବା ପାଇଁ ତାଙ୍କର ଇଚ୍ଛା ପ୍ରକାଶ କରିଥିଲେ। ଏହି ଚିଠିକୁ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଦିଆଯାଇଥିଲା।

ଚୀନ୍ ରାଷ୍ଟ୍ରପତି ଏହି ଚିଠି ଏପରି ସମୟରେ ପଠାଇଥିଲେ ଯେତେବେଳେ ବାଣିଜ୍ୟକୁ ନେଇ ଆମେରିକା ଏବଂ ଚୀନ୍ ମଧ୍ୟରେ ଉତ୍ତେଜନା ବୃଦ୍ଧି ପାଇଥିଲା । ଏହି ଚିଠି ଚୀନ୍ ସତର୍କତାର ସହିତ ଏବଂ ଚିନ୍ତା କରି ପଠାଇଥିଲା। ଏହା ପରେ, ଜୁନ୍ ମାସରେ, ଦୀର୍ଘ ସମୟ ପରେ, ନୂଆଦିଲ୍ଲୀ ଏବଂ ବେଜିଂ ମଧ୍ୟରେ ଆଲୋଚନା ଆରମ୍ଭ ହୋଇଥିଲା।

ବ୍ଲୁମବର୍ଗ ରିପୋର୍ଟ କରିଛି ଯେ ଦୁଇ ଦେଶ ବ୍ୟାକ ଚ୍ୟାନେଲ୍ ଯୋଗାଯୋଗ ମାଧ୍ୟମରେ ପ୍ରମୁଖ ପ୍ରସଙ୍ଗ ଉପରେ ଆଲୋଚନା କରିଥିଲେ ଏବଂ ସମାଧାନ କରିବାକୁ ଚେଷ୍ଟା କରିଥିଲେ। ଏଥିରେ, ଦୁଇ ଦେଶ ଦୀର୍ଘକାଳୀନ ପ୍ରସଙ୍ଗ, ବିଶେଷକରି ଗାଲୱାନ୍ ଉପତ୍ୟକା ବିବାଦ ସହିତ ଜଡିତ ବିଷୟଗୁଡ଼ିକ ଉପରେ ଆଲୋଚନା କରିଥିଲେ। ଅଗଷ୍ଟରେ ଚୀନ୍ ବୈଦେଶିକ ମନ୍ତ୍ରୀ ୱାଙ୍ଗ ୟିଙ୍କ ଭାରତ ଗସ୍ତ ସମୟରେ, ଉଭୟ ଦେଶ ସୀମା ବିବାଦ ସମାଧାନ ଏବଂ ବାଣିଜ୍ୟ ସହଯୋଗ ବୃଦ୍ଧି କରିବାକୁ ରାଜି ହୋଇଥିଲେ।

ସେପଟେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ସି ଜିନପିଙ୍ଗ ଅଗଷ୍ଟ ୩୧ରେ ସାଂଘାଇ ସହଯୋଗ ସଂଗଠନ (SCO) ବୈଠକ ସମୟରେ ସାକ୍ଷାତ କରିବେ। ସାତ ବର୍ଷ ପରେ ମୋଦିଙ୍କ ଏହା ଚୀନ୍ ଗସ୍ତ। ପୂର୍ବରୁ, ପ୍ରଧାନମନ୍ତ୍ରୀ ମୋଦି ଶେଷ ଥର ପାଇଁ ୨୦୧୯ରେ ଚୀନ୍ ଗସ୍ତ କରିଥିଲେ। ଦୁଇ ନେତାଙ୍କ ମଧ୍ୟରେ ସୀମା ବିବାଦ ହ୍ରାସ କରିବା ପାଇଁ ଠୋସ୍ ପଦକ୍ଷେପ, ବାଣିଜ୍ୟ ସହଭାଗୀତା, ନିବେଶ ବୃଦ୍ଧି, ଆଞ୍ଚଳିକ ସ୍ଥିରତା ଏବଂ ଶାନ୍ତି ସୁନିଶ୍ଚିତ କରିବା ପ୍ରସଙ୍ଗ ଆଲୋଚନା ହେବାର ସମ୍ଭାବନା ରହିଛି ।

ଆମେରିକା ଭାରତ ଉପରେ ଅତିରିକ୍ତ ୫୦% ଶୁଳ୍କ ଲାଗୁ କରିଛି, ଯାହା ଦୁଇ ଦେଶ ମଧ୍ୟରେ ସମ୍ପର୍କରେ ଉତ୍ତେଜନା ବୃଦ୍ଧି କରିଛି। ଅନେକ ଆମେରିକୀୟ ବିଶ୍ଳେଷକ ଏବଂ ରିପବ୍ଲିକାନ ନେତା ମଧ୍ୟ ଏହି ନିଷ୍ପତ୍ତିକୁ ସମାଲୋଚନା କରିଛନ୍ତି। ଏପରି ସ୍ଥିତିରେ, ଭାରତ ଏବଂ ଚୀନ୍ ମଧ୍ୟରେ ସହଭାଗୀତା ବୃଦ୍ଧି କରିବା ଉଭୟ ଦେଶର ଆର୍ଥିକ ସ୍ୱାର୍ଥ ପାଇଁ ଲାଭଦାୟକ ବୋଲି ବିବେଚନା କରାଯାଏ।

ଭାରତ ଏବଂ ଚୀନ୍ ମିଳିତ ଭାବରେ ଶୁଳ୍କ ପ୍ରତିବନ୍ଧକକୁ ହ୍ରାସ କରିପାରିବେ। ଦୁଇ ଦେଶର ଏକାଠି ଆସିବା ଦ୍ୱାରା ଏସିଆରେ ସ୍ଥିରତା, ନିବେଶ ଏବଂ ବିକାଶକୁ ପ୍ରୋତ୍ସାହିତ କରାଯିବ। ଏହା ବ୍ୟତୀତ, ଆମେରିକା ଉପରେ ନିର୍ଭରଶୀଳତା ହ୍ରାସ ପାଇବ ଏବଂ ଭାରତ-ଚୀନ୍ ସେମାନଙ୍କର ସାଧାରଣ ସ୍ୱାର୍ଥ ଉପରେ କାମ କରିପାରିବେ।