Yashasvi Jaiswal / 'ମୁଁ କ୍ୟାପଟେନ୍ ହେବାକୁ ଚାହେଁ...', ଗିଲ୍ ଅଧିନାୟକ ହେବା ପରେ ମନର କଥା କହିଲେ ଏହି ଖେଳାଳି

ଭାରତୀୟ କ୍ରିକେଟରେ ଏବେ ଅନେକ ପରିବର୍ତ୍ତନ ଦେଖିବାକୁ ମିଳୁଛି । ଅନେକ ଅଭିଜ୍ଞ ଖେଳାଳି ମଧ୍ୟ ବିଭିନ୍ନ ଫର୍ମାଟରୁ ଅବସର ଘୋଷଣା କରିସାରିଛନ୍ତି । ଏପରି ସ୍ଥିତିରେ ସବୁ ଫର୍ମାଟରେ କିଛି ନା କିଛି ପରିବର୍ତ୍ତନ କରାଯାଉଛି । ନିକଟରେ ଦିନିକିଆରେ ଭାରତୀୟ ଅଧିନାୟକତ୍ବରେ ମଧ୍ୟ ପରିବର୍ତ୍ତନ କରାଯାଇଛି । ରୋହିତ ଶର୍ମାଙ୍କ ଟେଷ୍ଟ କ୍ରିକେଟରୁ ଅବସର ପରେ ଶୁବମନ ଗିଲଙ୍କୁ ପ୍ରଥମେ ଟିମ୍ ଇଣ୍ଡିଆର ଟେଷ୍ଟ ଦଳର ଅଧିନାୟକ ଭାବେ ଦାୟିତ୍ବ ଦିଆଯାଇଥିଲା । ଆଉ ଏବେ ହଠାତ୍ ରୋହିତଙ୍କୁ ହଟାଇ ଗିଲଙ୍କୁ ଦିନିକିଆରେ ମଧ୍ୟ କ୍ୟାପଟେନ୍ ଭାବେ ନିଯୁକ୍ତ କରାଯାଇଛି । ଆଉ ଏସବୁ ମଧ୍ୟରେ ଯୁବ ଭାରତୀୟ ବ୍ୟାଟ୍ସମ୍ୟାନ୍ ଯଶସ୍ୱୀ ଜୟସ୍ୱାଲଙ୍କ ଏକ ବୟାନ ସାମ୍ନାକୁ ଆସିଛି । ଯେଉଁଥିରେ ସେ ଦଳର ଅଧିନାୟକ ହେବାକୁ ଇଚ୍ଛା ପ୍ରକାଶ କରିଛନ୍ତି ।

"ମୁଁ ମଧ୍ୟ ଜଣେ ଅଧିନାୟକ ହେବାକୁ ଚାହେଁ"

ଯୁବ ଭାରତୀୟ କ୍ରିକେଟର ଯଶସ୍ୱୀ ଜୟସ୍ୱାଲ ଏକ ପଡକାଷ୍ଟରେ ତାଙ୍କ ଭବିଷ୍ୟତକୁ ନେଇ ପ୍ରତିକ୍ରିୟା ଦେଇଥିଲେ । ଜୟସ୍ୱାଲ କହିଛନ୍ତି, 'ମୁଁ ପ୍ରତିଦିନ ମୋର ଫିଟନେସ୍ ଏବଂ ଦକ୍ଷତା ଉପରେ କାମ କରୁଛି । ନିଜକୁ ଉନ୍ନତ କରିବା ପାଇଁ ପ୍ରତିଦିନ ମୋ ଶରୀର ଉପରେ କାମ କରିବା ଗୁରୁତ୍ୱପୂର୍ଣ୍ଣ । ମୁଁ ଭାବୁଛି ମୋତେ ଆହୁରି ଫିଟ୍ ହେବାକୁ ପଡିବ । ମୁଁ ଜଣେ ଭଲ ଲିଡର୍ ହେବା ପାଇଁ ନିଜ ଉପରେ ଯଥେଷ୍ଟ କାମ କରିବାକୁ ଚାହେଁ , କାରଣ ମୁଁ ଭବିଷ୍ୟତରେ ଏକ ଦଳର ଅଧିନାୟକ ହେବାକୁ ଚାହେଁ ।"

ଯଶସ୍ୱୀ ଜୟସ୍ୱାଲଙ୍କ କ୍ରିକେଟ କ୍ୟାରିଅର

ଯଶସ୍ୱୀ ଜୟସ୍ୱାଲ ଟିମ୍ ଇଣ୍ଡିଆର ଜଣେ ବିସ୍ଫୋରକ ଓପନିଂ ବ୍ୟାଟ୍ସମ୍ୟାନ୍ । ସେ ଭାରତ ପାଇଁ ଟେଷ୍ଟ, ଦିନିକିଆ ଓ ଟି-୨୦ ତିନୋଟି ଫର୍ମାଟରେ ଖେଳିଛନ୍ତି । ଜୟସ୍ୱାଲ ଏପର୍ଯ୍ୟନ୍ତ ଟିମ୍ ଇଣ୍ଡିଆ ପାଇଁ ୨୫ଟି ଟେଷ୍ଟ ମ୍ୟାଚ୍ ଖେଳି, ୪୯.୮୮ ହାରରେ ୩,୩୯୦ ରନ୍ କରିଛନ୍ତି । ସେ ଟେଷ୍ଟ କ୍ରିକେଟରେ ସର୍ବାଧିକ ୨୧୪ ରନ୍ କରିଛନ୍ତି ।

ଅଧିକ ପଢ଼ନ୍ତୁ: ଅଭିଷେକ ଶର୍ମାଙ୍କୁ ମିଳିଲା SUV ପୁରସ୍କାର, କିନ୍ତୁ ଭାରତ ଆଣିପାରିବେନି...ଜାଣନ୍ତୁ କାହିଁକି

ଏହି ୨୩ ବର୍ଷୀୟ ଭାରତୀୟ ଖେଳାଳି ଏପର୍ଯ୍ୟନ୍ତ କେବଳ ଗୋଟିଏ ଦିନିକିଆ ମ୍ୟାଚ୍ ଖେଳିଛନ୍ତି । ଯଦି ଟି-୨୦ କଥା କହିବା ତାହାଲେ, ଜୟସ୍ୱାଲ ୨୩ଟି ଟି-୨୦ ଆନ୍ତର୍ଜାତୀୟ ମ୍ୟାଚରେ ୩୬.୧୫ ହାରରେ ୭୨୩ ରନ୍ କରିଛନ୍ତି । ତେବେ ଟି-୨୦ରେ ଗୋଟିଏ ଶତକ ଓ ପାଞ୍ଚଟି ଅର୍ଦ୍ଧଶତକ ହାସଲ କରିଛନ୍ତି ।