Yuvraj Singh / ପୁଣି IPLକୁ ଫେରିବେ ଯୁବରାଜ ସିଂ ! ଲକ୍ଷ୍ନୌର ହୋଇପାରନ୍ତି ମୁଖ୍ୟ କୋଚ୍

ପୂର୍ବ ସିଜିନ୍ ତୁଳନାରେ IPL ୨୦୨୬ରେ ଅନେକ ପରିବର୍ତ୍ତନ ହେବ ବୋଲି ଆଶା କରାଯାଉଛି। କୋଲକାତା ନାଇଟ୍ ରାଇଡର୍ସ ଅଭିଷେକ ନାୟରଙ୍କୁ ଆଗାମୀ ସିଜିନ୍‌ ପାଇଁ ମୁଖ୍ୟ ପ୍ରଶିକ୍ଷକ ଭାବେ ନିଯୁକ୍ତି କରିଛି । ସେହିପରି ଲକ୍ଷ୍ନୌ ସୁପର ଜିଆଣ୍ଟସ୍ ପୂର୍ବରୁ କେନ୍‌ ଓ୍ବିଲିୟମସନ୍‌ ଓ ଭରତ ଅରୁଣଙ୍କ ସହ ଚୁକ୍ତି କରିସାରିଛି । କିନ୍ତୁ ଏବେ ପୁଣି ଲକ୍ଷ୍ନୌକୁ ନେଇ ବେଶ୍‌ ଚର୍ଚ୍ଚା ଜାରି ରହିଛି । କାହିଁକି ନା ଗଣମାଧ୍ୟମ ରିପୋର୍ଟରୁ ପ୍ରକାଶ ପାଇଛି ଯେ LSG ଦଳ ଯୁବରାଜ ସିଂହଙ୍କୁ ମୁଖ୍ୟ ପ୍ରଶିକ୍ଷକ ଭାବରେ ନିଯୁକ୍ତ କରିପାରେ ।

ଜାତୀୟ ଗଣମାଧ୍ୟମରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, LSG ଫ୍ରାଞ୍ଚାଇଜ୍ ଯୁବରାଜ ସିଂହଙ୍କୁ ମୁଖ୍ୟ ପ୍ରଶିକ୍ଷକ ଭାବରେ ନିଯୁକ୍ତ କରିବା ପାଇଁ ଯୋଗାଯୋଗ କରିଛି । ରିପୋର୍ଟ କୁହାଯାଇଛି ଯେ ଜଷ୍ଟିନ୍ ଲାଙ୍ଗର ଲକ୍ଷ୍ନୌ ଦଳର ସ୍ଥାନୀୟ ଖେଳାଳିଙ୍କ ସହ ଏକ ଦୃଢ଼ ସମ୍ପର୍କ ସ୍ଥାପନ କରିବାରେ ବିଫଳ ହୋଇଛନ୍ତି। ଏପରି ପରିସ୍ଥିତିରେ ଫ୍ରାଞ୍ଚାଇଜ୍ ଜଣେ ଭାରତୀୟଙ୍କୁ ମୁଖ୍ୟ ପ୍ରଶିକ୍ଷକ ଭାବେ ନିଯୁକ୍ତି ଦେଇପାରେ।

ଅଧିକ ପଢ଼ନ୍ତୁ: ଭାରତର ବିଜୟ ପରେ ବାପାଙ୍କୁ ଧରି କାନ୍ଦିଲେ ଜେମିମା, ଭାଇରାଲ ହେଲା ଭିଡିଓ

ଯୁବରାଜ ବର୍ତ୍ତମାନ କୌଣସି ବୃତ୍ତିଗତ କ୍ରିକେଟ୍ ଦଳ ସହିତ ଜଡିତ ନାହାଁନ୍ତି । କିନ୍ତୁ ଯୁବ ପ୍ରତିଭା ଖୋଜିବାରେ ସକ୍ରିୟ ଅଛନ୍ତି। ଶୁବମନ ଗିଲ୍ ଏବଂ ଅଭିଷେକ ଶର୍ମାଙ୍କ କ୍ୟାରିୟରରେ ଯୁବରାଜ ପ୍ରମୁଖ ଭୂମିକା ଗ୍ରହଣ କରିଛନ୍ତି । ଯେଉଁମାନେ ଆଜି ଭାରତୀୟ କ୍ରିକେଟ୍ ଦଳର ଗୁରୁତ୍ବପୂର୍ଣ୍ଣ ଅଂଶ ହୋଇପାରିଛନ୍ତି । ସେହିପରି ଆଇପିଏଲ ଓ ଘରୋଇ କ୍ରିକେଟରେ ଦମଦାର ପ୍ରଦର୍ଶନ କରିଥିବା ପ୍ରିୟାଂଶ ଆର୍ଯ୍ୟା ଓ ପ୍ରଭସିମରନ୍‌ ସିଂହଙ୍କୁ ମଧ୍ୟ ଯୁବରାଜ ସିଂହ ତିଆରି କରୁଛନ୍ତି ।

ଗତ ବର୍ଷ, ଯୁବରାଜ ସିଂହଙ୍କ ନାମ ଗୁଜୁରାଟ ଟାଇଟାନ୍ସ ସହିତ ଯୋଡା ଯାଇଥିଲା। ଆଶିଷ ନେହେରା ଗୁଜୁରାଟ ଛାଡିପାରନ୍ତି ବୋଲି କଳ୍ପନାଜଳ୍ପନା ଜୋର ଧରିଥିଲା । ଯାହା ଫଳରେ ଯୁବରାଜ ତାଙ୍କ ସ୍ଥାନରେ ମୁଖ୍ୟ ପ୍ରଶିକ୍ଷକ ହୋଇପାରନ୍ତି ବୋଲି ଗୁଜବ ଉଠିଥିଲା । କେବଳ ଗୁଜରାଟ ନୁହେଁ ଏହା ମଧ୍ୟ ଦାବି କରାଯାଇଥିଲା ଯେ ଯୁବରାଜ ରିକି ପଣ୍ଟିଂଙ୍କ ସ୍ଥାନରେ ଦିଲ୍ଲୀ କ୍ୟାପିଟାଲ୍ସର ପ୍ରଶିକ୍ଷକ ହୋଇପାରନ୍ତି । କିନ୍ତୁ ଗତ ସିଜିନ୍‌ରେ କୌଣସି ଦଳର କୋଚ୍‌ ହୋଇନଥିଲେ ।

ସୂଚନା ଅନୁସାରେ, ଲକ୍ଷ୍ନୌ ସୁପରଜାଏଣ୍ଟସ୍ ଗତ ଦୁଇଟି ସିଜିନରେ ପଏଣ୍ଟ ଟେବୁଲରେ ସପ୍ତମ ସ୍ଥାନରେ ରହିଛି। ଲକ୍ଷ୍ନୌ ଦଳ ଆଗାମୀ ସିଜିନ ପାଇଁ ଭରତ ଅରୁଣଙ୍କୁ ବୋଲିଂ ପ୍ରଶିକ୍ଷକ ନିଯୁକ୍ତ କରିଛି। କେନ୍ ୱିଲିୟମ୍ସନ୍ ପରାମର୍ଶଦାତା ଭାବରେ ଦଳରେ ଯୋଗ ଦେଇଛନ୍ତି । ତେବେ ଚଳିତ ସିଜିନ୍‌ରେ ଯୁବରାଜ ସିଂ ଲକ୍ଷ୍ନୌ ସୁପର ଜିଆଣ୍ଟସର ମୁଖ୍ୟ କୋଚ୍‌ ହେଉଛନ୍ତି କି ନାହିଁ ତାକୁ ଅପେକ୍ଷା ।