Chahal Life After Divorce / ଡିଭୋର୍ସ ପରେ ବିଗିଡ଼ିଥିଲା ଅବସ୍ଥା; ମଦ ନିଶାରେ ଥିଲେ ୟୁଜବେନ୍ଦ୍ର ଚହଲ୍

ମୁମ୍ବାଇ: ଭାରତର ଷ୍ଟାର ଲେଗ୍-ସ୍ପିନର ୟୁଜଭେନ୍ଦ୍ର ଚହଲ । କ୍ରିକେଟ୍ ପରେ ଯଦି ସେ କେବେ ବେଶି ଚର୍ଚ୍ଚାକୁ ଆସିଥିଲେ, ତାହା ଥିଲା ତାଙ୍କର ବ୍ୟକ୍ତିଗତ ଜୀବନ । ପତ୍ନୀ ଧନୁଶ୍ରୀ ବର୍ମାଙ୍କ ସହ ଛାଡ଼ପତ୍ର । ହେଲେ ଛାଡ଼ପତ୍ର ପରେ କିପରି ଥିଲା ଚହଲଙ୍କ ଅବସ୍ଥା ? ନିଜ ମୁହଁରେ ଗୋଟି ଗୋଟି କହିଲେ କ୍ରିକେଟର୍ । କିପରି ସେ ମଦ ନିଶାରେ ପଡ଼ିଥିଲେ ଓ ସେଥିରୁ ମୁକୁଳିବା ପାଇଁ କାହାର ସହାୟତା ନେଇଥିଲେ, ନିକଟରେ ଏକ ପଡକାଷ୍ଟରେ କହିଛନ୍ତି ।

ଚହଲ ତାଙ୍କ ସ୍ପିନ୍‌ରେ ସର୍ବୋତ୍ତମ ବ୍ୟାଟ୍ସମ୍ୟାନ୍‌ଙ୍କୁ ନଚାଇଛନ୍ତି । ଯଦିଓ ସେ ବର୍ତ୍ତମାନ ଟିମ୍ ଇଣ୍ଡିଆରୁ ବାହାରେ ଅଛନ୍ତି କିନ୍ତୁ ପ୍ରତିବର୍ଷ ଆଇପିଏଲ୍‌ରେ ଚମତ୍କାର ପ୍ରଦର୍ଶନ କରୁଛନ୍ତି । ଗତ କିଛି ବର୍ଷ ଚହଲଙ୍କ ପାଇଁ ସହଜ ନଥିଲା । ଏହି ସମୟ ମଧ୍ୟରେ ତାଙ୍କୁ ଦଳରୁ ବାହାର କରାଯାଇଥିଲା ଏବଂ ତାଙ୍କର ଛାଡପତ୍ର ମଧ୍ୟ ହୋଇଥିଲା । ଏହି ସମୟ ମଧ୍ୟରେ ଚହଲ ମଧ୍ୟ ମଦ ନିଶାଗ୍ରସ୍ତ ହୋଇଯାଇଥିଲେ, ଯାହାରୁ ସେ ବହୁତ କଷ୍ଟରେ ସୁସ୍ଥ ହୋଇଛନ୍ତି ।

• ଧନୁଶ୍ରୀଙ୍କ ସହ ଛାଡ଼ପତ୍ର

ଚହଲ କୋରିଓଗ୍ରାଫର ଧନଶ୍ରୀ ବର୍ମାଙ୍କୁ ବିବାହ କରିଥିଲେ । କିନ୍ତୁ ୨୦୨୫ ମସିହାରେ ଏହି ଦମ୍ପତିଙ୍କ ଛାଡପତ୍ର ହୋଇଥିଲା । ଚହଲ ପୂର୍ବତନ ଭାରତୀୟ ଓପନର ଆକାଶ ଚୋପ୍ରାଙ୍କ ସହିତ ଏକ ପଡକାଷ୍ଟରେ ପ୍ରକାଶ କରିଥିଲେ ଯେ ତାଙ୍କୁ ଡିଭୋର୍ସ ପରେ ମଦ ନିଶାରେ ପଡ଼ିଯାଇଥିଲେ ଏବଂ ଏହାକୁ ଦୂର କରିବା ପାଇଁ ସେ ପୁନର୍ବାସ ବା ରିହାବ୍‌ର ସହାୟତା ନେଇଥିଲେ ।

• ପୁନର୍ବାସରେ ୨୮ ଦିନ

ଯେତେବେଳେ ଆକାଶ ଚହଲଙ୍କୁ ପଚାରିଲେ ଯେ ତାଙ୍କ କଷ୍ଟକର ସମୟରେ କିଏ ତାଙ୍କ ପାଖରେ ଠିଆ ହୋଇଛି, ଚହଲ କହିଥିଲେ ଯେ ତାଙ୍କ ବନ୍ଧୁ ଏବଂ ପରିବାର ତାଙ୍କ ପାଇଁ ସବୁବେଳେ ଥିଲେ । ତା’ପରେ ଆକାଶ ଚହଲଙ୍କୁ ମଦ୍ୟପାନ ଛାଡ଼ିବା ବିଷୟରେ ପଚାରିଲେ, ଯାହାର ଉତ୍ତରରେ ସେ କହିଲେ, "ଗତ ବର୍ଷ ମୁଁ ମଦ୍ୟପାନ ଛାଡ଼ି ଦେଇଥିଲି । ମୁଁ ଏକ ପୁନର୍ବାସ କେନ୍ଦ୍ରକୁ ଯାଇଥିଲି ଏବଂ ସେଠାରେ ୨୮ ଦିନ ରହିଥିଲି । ଏବେ ମୁଁ ଜାଣିଛି କିପରି ଜିନିଷଗୁଡ଼ିକୁ ପରିଚାଳନା କରିବାକୁ ହୁଏ । ସେହି ନିଷ୍ପତ୍ତି ମୋ ଜୀବନରେ ବହୁତ ପରିବର୍ତ୍ତନ ଆଣିଛି । ମୁଁ ପୂର୍ବାପେକ୍ଷା ଅଧିକ ପରିପକ୍ୱ ହୋଇଗଲିଣି ।"

ପଢନ୍ତୁ ଏହି ଖବର: ୱେଷ୍ଟଇଣ୍ଡିଜ୍ ବିପକ୍ଷ ୫ମ ଟି-୨୦ ଖେଳିବେ ଭୁବନେଶ୍ୱର ? BCCI ବଦଳାଇଲା ଟିମ୍ ଇଣ୍ଡିଆର ସ୍କ୍ୱାଡ୍

• "ଏବେ ପୂର୍ବାପେକ୍ଷା ଅଧିକ ଖୁସି"

ଚହଲ ପ୍ରକାଶ କରିଛନ୍ତି ଯେ ସେ ଯୁବକ ଅବସ୍ଥାରେ ମଦ୍ୟପାନ କରିବା ଆରମ୍ଭ କରିଥିଲେ ଏବଂ ତାଙ୍କ ଛାଡପତ୍ର ପରେ ପରିସ୍ଥିତି ଆହୁରି ଖରାପ ହୋଇଯାଇଥିଲା । ସେ କହିଛନ୍ତି, "ମୁଁ ଯୁବକ ଅବସ୍ଥାରେ ମଦ ପିଇବା ଆରମ୍ଭ କରିଥିଲି । ପାର୍ଟି ହେଉଥିଲା ଏବଂ ସେଠାରୁ ସବୁକିଛି ଆରମ୍ଭ ହୋଇଥିଲା । ମୋର ଛାଡପତ୍ର ପରେ ପରିସ୍ଥିତି ଆହୁରି ଖରାପ ହୋଇଗଲା ଏବଂ ମୋର ମାନସିକ ଅବସ୍ଥା ଭଲ ନଥିଲା । ମୁଁ ଅନୁଭବ କଲି ଯେ ଯଦି ମୁଁ ଏହି ରାସ୍ତାରେ ଆଗକୁ ବଢ଼ିବି, ତେବେ ମୁଁ ଯାହାକୁ ସବୁଠାରୁ ଅଧିକ ଭଲ ପାଉଥିଲି କ୍ରିକେଟକୁ ନଷ୍ଟ କରିଦେବି । ତେଣୁ ମୁଁ ସବୁକିଛି ଶେଷ କରିଦେଲି ଏବଂ ଏବେ ମୁଁ ପୂର୍ବ ଅପେକ୍ଷା ଅଧିକ ଖୁସି ।"