40 Storey Tall Rocket: ଇସ୍ରୋ ତିଆରି କରୁଛି ବିଶାଳ ରକେଟ୍, ଯାହାର ଉଚ୍ଚତା ୪୦ ମହଲା କୋଠା ପରି...
Key Points
ପୁଣି ଇତିହାସ ରଚିବ ଇସ୍ରୋ। ତିଆରି କରୁଛି ବିଶାଳ ରକେଟ୍ । ଯାହାର ଉଚ୍ଚତା ୪୦ ମହଲା କୋଠା ସହ ସମାନ ।
ପୁଣି ଇତିହାସ ରଚିବ ଇସ୍ରୋ। ପୁଣି ଥରେ ନିଜର ଶକ୍ତି ଦେଖାଇବାକୁ ପ୍ରସ୍ତୁତ ହେଉଛି ଭାରତୀୟ ମହାକାଶ ଗବେଷଣା ସଂଗଠନ । ISRO ଅଧ୍ୟକ୍ଷ ଭି. ନାରାୟଣନ୍ ଘୋଷଣା କରିଛନ୍ତି ଯେ, ISRO ଏକ ବିଶାଳ ରକେଟ୍ ନିର୍ମାଣ କରୁଛି ଯାହା ୪୦ ମହଲା ବିଶିଷ୍ଟ କୋଠା ପରି ଉଚ୍ଚ ହେବ । ଏହା ୭୫ ହଜାର କିଲୋଗ୍ରାମ ଅର୍ଥାତ ୭୫ ଟନ୍ ଓଜନକୁ ନିମ୍ନ-ପୃଥିବୀ କକ୍ଷପଥରେ ବହନ କରିବ । ଏହା ଭାରତର ମହାକାଶ କାର୍ଯ୍ୟକ୍ରମ ପାଇଁ ଏକ ଐତିହାସିକ ପଦକ୍ଷେପ।
ISRO ଅଧ୍ୟକ୍ଷ ଭି. ନାରାୟଣନ୍ ହାଇଦ୍ରାବାଦର ଓସମାନିଆ ବିଶ୍ୱବିଦ୍ୟାଳୟର ସମାବର୍ତ୍ତନ ଉତ୍ସବରେ ଯୋଗ ଦେଇ ଏହି ନୂତନ ରକେଟ୍ ବିଷୟରେ କହିଥିଲେ । ସେ କହିଛନ୍ତି ଯେ ଏହି ରକେଟ୍ ଏତେ ବିଶାଳ ହେବ ଯେ ଏହାର ଉଚ୍ଚତା ୪୦ ମହଲା କୋଠା ସହିତ ସମାନ ହେବ । ଏହି ରକେଟ୍ ୭୫ ଟନ୍ ଓଜନର ଏକ ଉପଗ୍ରହକୁ ନିମ୍ନ ପୃଥିବୀ କକ୍ଷପଥ (LEO) ରେ ସ୍ଥାପନ କରିପାରିବ । ନିମ୍ନ ପୃଥିବୀ କକ୍ଷପଥ ହେଉଛି ସେହି କକ୍ଷପଥ ଯାହା ପୃଥିବୀଠାରୁ ୬୦୦-୯୦୦ କିଲୋମିଟର ଉଚ୍ଚତାରେ ଥାଏ । ଯେଉଁଠାରେ ଯୋଗାଯୋଗ-ପର୍ଯ୍ୟବେକ୍ଷଣ ଉପଗ୍ରହଗୁଡ଼ିକୁ ସ୍ଥାପନ କରାଯାଏ ।
📱 Get Argus News App
✨ଇସ୍ରୋ ଅଧ୍ୟକ୍ଷ ଭି. ନାରାୟଣନ୍ ଏହାକୁ ଭାରତର ପ୍ରଥମ ରକେଟ୍ ସହିତ ତୁଳନା କରିଥିଲେ, ଯାହା ଡକ୍ଟର APJ ଅବଦୁଲ କଲାମଙ୍କ ଦ୍ୱାରା ନିର୍ମିତ ହୋଇଥିଲା । ସେହି ରକେଟ୍ SLV-3 ର ଓଜନ ମାତ୍ର ୧୭ ଟନ୍ ଥିଲା। ଏହା ୩୫ କିଲୋଗ୍ରାମ ଓଜନର ଏକ ଉପଗ୍ରହକୁ କକ୍ଷପଥରେ ନେଇପାରିବ। ISROର ନୂତନ ରକେଟ୍ ଏହାର ୨୦୦୦ ଗୁଣ ଅଧିକ ଓଜନ ବହନ କରିବାର କ୍ଷମତା ରଖିଛି। ଏହା ଭାରତର ମହାକାଶ କାର୍ଯ୍ୟକ୍ରମର ପ୍ରଗତିକୁ ଦର୍ଶାଉଛି ବୋଲି ଭି.ନାରାୟଣନ୍ କହିଛନ୍ତି ।
୭୫ ଟନ୍ ଓଜନ ବହନ କରିବା ଏକ ବଡ଼ ସଫଳତା। ବର୍ତ୍ତମାନ, ISROର ସବୁଠାରୁ ଭାରୀ ରକେଟ୍ ହେଉଛି LVM3, ଯାହା ପୃଥିବୀର ନିମ୍ନ କକ୍ଷପଥରେ ୧୦,୦୦୦ କିଲୋଗ୍ରାମ ପର୍ଯ୍ୟନ୍ତ ଓଜନ ବହନ କରିପାରିବ। ନୂତନ ରକେଟ୍ ଏହାଠାରୁ ସାତ ଗୁଣ ଅଧିକ ଓଜନ ବହନ କରିବ ।