ଭାରତରେ ଇଲେକ୍ଟ୍ରିକ୍ ଯାନର ଚାହିଦା କ୍ରମାଗତ ଭାବରେ ବୃଦ୍ଧି ପାଇବାରେ ଲାଗିଛି । ଏହାରି ମଧ୍ୟରେ ଇଲେକଟ୍ରିକ୍ ଦୁଇଚକିଆ ଯାନ କମ୍ପାନୀ ଆଭୋର ଇଲେକ୍ଟ୍ରିକ୍ ତାର ନୂତନ ଇଲେକଟ୍ରିକ୍ ମୋଟର ସାଇକେଲର ପ୍ରଥମ ଟିଜର ରିଲିଜ୍ କରିଛି । କମ୍ପାନୀ ଏପର୍ଯ୍ୟନ୍ତ ବାଇକ୍‌ର ନାମ ପ୍ରକାଶ କରିନାହିଁ, କିନ୍ତୁ ଟିଜରରେ ସାଇଡ୍ ପ୍ୟାନେଲରେ EX/2S ଲେଖାଯାଇଥିବା ଦେଖାଯାଇଛି । ଲଞ୍ଚ ସମୟରେ ଏହି ନାମ ବ୍ୟବହାର କରାଯାଇପାରେ ବୋଲି ବିଶ୍ଵାସ କରାଯାଉଛି ।

କିଛି ସମୟ ପୂର୍ବରୁ ଏହି ବାଇକ୍‌କୁ ଅହମ୍ମଦାବାଦର ରାସ୍ତାରେ ପରୀକ୍ଷଣ ସମୟରେ ଦେଖାଯାଇଥିଲା । ସେତେବେଳେ ବାଇକ୍‌ଟି ସମ୍ପୂର୍ଣ୍ଣ ଭାବେ ଏକ ଖୋଳରେ ଲୁଚାଯାଇଥିଲା, କିନ୍ତୁ ଏବେ ରିଲିଜ୍‌ ହୋଇଥିବା ଟିଜର୍‌ରେ ଏହାର ଅନେକ ଡିଜାଇନ୍ ଏବଂ ଫିଚର ସ୍ପଷ୍ଟ ଭାବରେ ପ୍ରକାଶ ପାଇଛି ।

• ପ୍ରିମିୟମ୍ ଲୁକ୍‌ ସହ ଆସିବ ଏହି ବାଇକ୍

ନୂତନ ଆଭୋର ଇଲେକ୍ଟ୍ରିକ୍ ବାଇକ୍‌କୁ ସ୍ପୋର୍ଟି ଏବଂ ପ୍ରିମିୟମ୍ ଭାବରେ ଡିଜାଇନ୍ କରାଯାଇଛି । ଏଥିରେ ଏକ ମସ୍କୁଲାର ଟ୍ୟାଙ୍କ୍ ଡିଜାଇନ୍, ତୀକ୍ଷ୍ଣ ବଡି ପ୍ୟାନେଲ୍ ଏବଂ ଏକ ଆକର୍ଷଣୀୟ LED ହେଡଲାଇଟ୍ ରହିଛି । ହେଡଲାଇଟ୍‌ରେ LED DRL ମଧ୍ୟ ରହିଛି, ଯାହା ବାଇକ୍‌କୁ ଅଧିକ ଆଧୁନିକ ଲୁକ୍ ଦେଇଛି । ଟିଜରରେ ବାଇକ୍‌ର ସାଇଡ୍ ପ୍ରୋଫାଇଲ୍‌ ମଧ୍ୟ ବହୁତ ଆକର୍ଷଣୀୟ ଦେଖାଯାଉଛି । ଏଥିରେ ଷ୍ଟାଇଲିସ୍ ଆଲୟ ଚକ, ଏକ ସ୍ପ୍ଲିଟ୍ ବଡି ଡିଜାଇନ୍ ଏବଂ ଏକ ଲାଲ-ସିଲଭର ଡୁଆଲ୍-ଟୋନ୍ ପେଣ୍ଟ୍ ସ୍କିମ୍ ରହିଛି ।


ବ୍ଲାକ୍ ଫିନିଶ ସହ ଏହାର ମେଟାଲ୍ ପାର୍ଟ ବାଇକ୍‌କୁ ଏକ ପ୍ରିମିୟମ୍ ଅନୁଭବ ପ୍ରଦାନ କରୁଛି । ପଛରେ ବସିଥିବା ଯାତ୍ରୀଙ୍କ ପାଇଁ ଏକ ଦୃଢ଼ ଗ୍ରାବ୍ ହ୍ୟାଣ୍ଡେଲ୍ ମଧ୍ୟ ପ୍ରଦାନ କରାଯାଇଛି । ଏହାବ୍ୟତୀତ ବାଇକ୍‌ର ପଛ ପାର୍ଶ୍ୱରେ ଏକ LED ଟେଲଲାଇଟ୍ ଏବଂ LED ଇଣ୍ଡିକେଟର ରହିଛି । ସୁରକ୍ଷା ପାଇଁ ବାଇକ୍‌ର ଆଗ ଏବଂ ପଛ ଉଭୟ ପାର୍ଶ୍ୱରେ ଡିସ୍କ ବ୍ରେକ୍ ଦିଆଯାଇଛି ।

• ଲମ୍ବା ରେଞ୍ଜ ସାଜିଲା ମୁଖ୍ୟ ଆକର୍ଷଣ

ଏହି ବାଇକ୍‌ର ସବୁଠାରୁ ଆକର୍ଷଣୀୟ ଦିଗ ହେଉଛି ଏହାର ରେଞ୍ଜ । ଟିଜରରେ ଦେଖାଯାଇଥିବା ଅନୁସାରେ ଏହି ବାଇକଟି ୮୨ ପ୍ରତିଶତ ବ୍ୟାଟେରୀ ଚାର୍ଜ ସହିତ ପ୍ରାୟ ୨୧୫ କିଲୋମିଟରର ରେଞ୍ଜ ପ୍ରଦାନ କରିବ । ଏହାର ଅର୍ଥ ହେଉଛି ଏହି ବାଇକ୍‌ଟି ପୂର୍ଣ୍ଣ ଚାର୍ଜରେ ୨୫୦ରୁ ୨୬୦ କିଲୋମିଟର କିମ୍ବା ତା'ଠାରୁ ଅଧିକ ଯାତ୍ରା କରିପାରିବ । ଡିଜିଟାଲ୍ ଡିସପ୍ଲେ ବିଭିନ୍ନ ରାଇଡିଂ ମୋଡ୍ ଦେଖାଉଛି, ଯାହା ସୂଚାଇ ଦିଏ ଯେ ବାଇକ୍‌ରେ ଅନେକ ସ୍ମାର୍ଟ ଫିଚର୍ ଦିଆଯିବ । ଏହା ବ୍ୟତୀତ, ଚାର୍ଜିଂ ପୋର୍ଟକୁ ଇନ୍ଧନ ଟ୍ୟାଙ୍କର ତଳେ ରଖାଯାଇଛି । ସେଠାରେ ଏକ ଛୋଟ ଷ୍ଟୋରେଜ୍ ସ୍ପେସ୍ ମଧ୍ୟ ମିଳିପାରେ ।

• ବାଇକଟି କେତେ ଦମଦାର ?

କମ୍ପାନୀ ଏପର୍ଯ୍ୟନ୍ତ ବ୍ୟାଟେରୀ କ୍ଷମତା, ମୋଟର ପାୱାର, ଚାର୍ଜିଂ ସମୟ କିମ୍ବା ମୂଲ୍ୟ ପ୍ରକାଶ କରିନାହିଁ। ଆଶା କରାଯାଉଛି ଯେ ଲଞ୍ଚ୍ ପୂର୍ବରୁ ଏହି ବିବରଣୀ ପ୍ରକାଶ ପାଇବ । ଯଦି ଟିଜରରେ ଦେଖାଯାଇଥିବା ଅନୁସାରେ ଏହି ବାଇକଟି ଆସୁଛି, ତେବେ ଏଥିରେ ଲମ୍ବା ରେଞ୍ଜ, ଉନ୍ନତ ଫିଚର ଏବଂ ସ୍ପୋର୍ଟି ଡିଜାଇନ୍ ପାଇଁ ଭାରତୀୟ ବଜାରରେ ଏକ ଦୃଢ଼ ଉପସ୍ଥିତି ସୃଷ୍ଟି କରିପାରିବ । Ola ଓ Revolt ଭଳି କମ୍ପାନୀକୁ ଟକ୍କର ଦେବ ।