AI ଆଉ କେବଳ ପ୍ରଯୁକ୍ତିବିଦ୍ୟାରେ ସୀମିତ ରହିନାହିଁ । ବରଂ ଏହା ଆମ ସହରଗୁଡ଼ିକରେ ସୁରକ୍ଷାର ରୂପ ମଧ୍ୟ ପରିବର୍ତ୍ତନ କରୁଛି । ବିଶ୍ୱର ଅନେକ ଦେଶରେ ଅପରାଧର ପୂର୍ବାନୁମାନ କରିବା, ସ୍ମାର୍ଟ କ୍ୟାମେରା ମାଧ୍ୟମରେ ସନ୍ଦେହଜନକ କାର୍ଯ୍ୟକଳାପ ଚିହ୍ନଟ କରିବା ଏବଂ ବାସ୍ତବ ସମୟରେ ଘଟଣାଗୁଡ଼ିକର ସୂଚନା ଦେବା ପାଇଁ AIର ବ୍ୟବହାର କରାଯାଉଛି।

ଭାରତ ଏବେ ସ୍ମାର୍ଟ ସହର, ବଡ଼ ବଡ଼ ସପିଂ ମଲ୍, ଆଇଟି ପାର୍କ, ବିମାନବନ୍ଦର ଏବଂ ପରିବହନ ହବ୍ ଦ୍ରୁତ ଗତିରେ ବଢ଼ୁଛି । ଏଭଳି ସ୍ଥିତିରେ ପ୍ରତିଦିନ ଲକ୍ଷ ଲକ୍ଷ ଲୋକଙ୍କ ସୁରକ୍ଷା ସୁନିଶ୍ଚିତ କରିବା ସହଜ ନୁହେଁ । ପାରମ୍ପରିକ CCTV ଏବଂ ଗାର୍ଡ ପାଟ୍ରୋଲିଂ ପ୍ରାୟତଃ ଏତେ ବଡ଼ ଏବଂ ଜଟିଳ କ୍ଷେତ୍ରରେ ସମ୍ପୂର୍ଣ୍ଣ ପ୍ରଭାବଶାଳୀ ପ୍ରମାଣିତ ହୁଏ ନାହିଁ। ଏହି କାରଣରୁ ବର୍ତ୍ତମାନ ସ୍ୱୟଂଚାଳିତ ସୁରକ୍ଷା ରୋବୋଟ୍‌ର ଆବଶ୍ୟକତା ଅନୁଭୂତ ହେଉଛି।

ପେରେଗ୍ରୀନ୍ ସିଙ୍ଗାପୁର (ଟେନନ୍ ଗ୍ରୁପ୍‌ର ଅଂଶ) ଇଣ୍ଡୋର ସିକ୍ୟୁରିଟି ପାଇଁ iRobo ନାମକ ଏକ ସ୍ୱତନ୍ତ୍ର AI-ଚାଳିତ ରୋବୋଟ୍ ତିଆରି କରିଛି। ଏହା ପୂର୍ବରୁ ସିଙ୍ଗାପୁରର ବ୍ୟବସାୟିକ କେନ୍ଦ୍ର ଏବଂ ଶିକ୍ଷାନୁଷ୍ଠାନ କ୍ୟାମ୍ପସରେ ଏହି ରୋବଟର ପରୀକ୍ଷଣ କରାଯାଇଛି । ଆଉ ଏବେ ଏହି iRobo ଭାରତରେ ପ୍ରବେଶ କରିବାକୁ ଯାଉଛି। iRoboରେ 360-ଡିଗ୍ରୀ କ୍ୟାମେରା, ବାସ୍ତବ-ସମୟ ବିଶ୍ଳେଷଣ ଏବଂ ସ୍ୱୟଂଚାଳିତ ପାଟ୍ରୋଲିଂ ଭଳି କ୍ଷମତା ଅଛି। ଏହା ସୁରକ୍ଷାକର୍ମୀଙ୍କ ସହିତ ମିଶି କାର୍ଯ୍ୟ କରେ ଏବଂ ସୁରକ୍ଷାକୁ ସୁଦୃଢ଼ କରିବାରେ ସାହାଯ୍ୟ କରେ।

ଜାତୀୟ ଗଣମାଧ୍ୟମର ଏକ ରିପୋର୍ଟ ଅନୁଯାୟୀ, iRoboରେ ଉନ୍ନତ ସେନ୍ସର ଏବଂ ଆଧୁନିକ ଟେକ୍ନୋଲୋଜି ବ୍ୟବହାର କରାଯାଇଛି । ଏହା ଅନଧିକୃତ ପାର୍କିଂ, ସନ୍ଦିଗ୍ଧ ବ୍ୟକ୍ତିଙ୍କ ଉପସ୍ଥିତି କିମ୍ବା ପ୍ରତିବନ୍ଧିତ ଅଞ୍ଚଳରେ କିଛି ଗତିବିଧି ହେଲେ ଏହା ତୁରନ୍ତ ଚିହ୍ନଟ କରିପାରେ । ଯେକୌଣସି ସନ୍ଦିଗ୍ଧ କାର୍ଯ୍ୟକଳାପ ଚିହ୍ନଟ ହେବା ମାତ୍ରେ, iRobo ତୁରନ୍ତ ଏକ ସତର୍କତା ଜାରି କରିଥାଏ । ସ୍କ୍ରିନରେ ଏକ ଚେତାବନୀ ବାର୍ତ୍ତା ପ୍ରଦର୍ଶନ କରେ ଏବଂ ସୁରକ୍ଷା ଦଳକୁ ସୂଚିତ କରିଥାଏ ।

iRobo ସୁରକ୍ଷାକର୍ମୀଙ୍କ ବିକଳ୍ପ ନୁହେଁ ବରଂ ସେମାନଙ୍କର ସହଯୋଗୀ। ଏହା ନିୟମିତ ପାଟ୍ରୋଲିଂ ଭଳି କାର୍ଯ୍ୟକୁ ସ୍ୱୟଂଚାଳିତ କରେ ଯାହା ଦ୍ୱାରା ଗାର୍ଡମାନେ ଭିଡ଼ ନିୟନ୍ତ୍ରଣ ଏବଂ ଘଟଣା ତଦନ୍ତ ଭଳି ଅଧିକ ଗୁରୁତ୍ୱପୂର୍ଣ୍ଣ କାର୍ଯ୍ୟରେ ନିଜକୁ ନିୟୋଜିତ କରିପାରିବେ ।

ଭାରତରେ ଆଡଭାନ୍ସ ସିକ୍ୟୁରିଟିର ଚାହିଦା ନିରନ୍ତର ଭାବେ ବୃଦ୍ଧି ପାଉଛି । ଆଉ iRoboର ସବୁଠାରୁ ବଡ଼ ବିଶେଷତ୍ୱ ହେଉଛି ଏହାକୁ ସହଜରେ ଏବେ ଥିବା ସିକ୍ୟୁରିଟି ସିଷ୍ଟମରେ ଇଣ୍ଟିଗ୍ରେଟ୍ କରାଯାଇପାରିବ ଏବଂ ବିଭିନ୍ନ ପରିବେଶରେ କାମ କରିବା ପାଇଁ ନିଜକୁ ଆଡଜଷ୍ଟ କରିପାରିବ । ଏହି କାରଣରୁ ଭାରତରେ ଏହି ଆଡଭାନ୍ସ ସିକ୍ୟୁରିଟି ରୋବୋଟକୁ ବହୁଳ ଭାବେ ବ୍ୟବହାର କରାଯାଇପାରେ ।

Argus News | argus news | -Argusnews Home: Odisha Latest News, Breaking News, Trending News, Live TV and more